నోరూరించే "వెల్లుల్లి మిరియాల రసం" - కమ్మగా గొంతులోకి దింగుతుంటే ఆహా అనాల్సిందే!

Vellulli Miriyala Rasam : చాలా మంది వేడివేడి అన్నంలోకి సాంబార్​ లేదా రసం వంటివి తినడానికి​ ఇష్టపడతారు. ఈ నేపథ్యంలోనే ఇండ్లలో వివిధ రకాల రెసిపీలు చేస్తుంటారు. ఇవి ఘాటుగా, పుల్లగా ఉండి గొంతులోకి జారుతుంటే ఆ ఫీలింగ్​ వేరే లెవల్​. అందుకే ఇవాళ మీకోసం ఓ సరికొత్త రెసిపీని తీసుకొచ్చాం. అదే వెల్లుల్లి మిరియాల రసం. చాలా తక్కువ పదార్థాలతో ఇన్​స్టంట్​గా చేసుకోవచ్చు. బిగినర్స్ కూడా ఈ స్టెప్స్ పాటిస్తూ ఈజీగా చేయొచ్చు. మరి ఇక లేట్​ చేయకుండా వెల్లుల్లి మిరియాల రసం చేయడానికి కావాల్సిన పదార్థాలేంటి? ఎలా ప్రిపేర్ చేయాలో ఇప్పుడు చూద్దాం.

నోటికి కమ్మగా ఉండే "కలగూర పులుసు" - ఇలాంటి రెసిపీ ఎపుడైనా ట్రై చేశారా?

మిరియాలు (Getty Images)

కావాల్సిన పదార్థాలు :

• మిరియాలు - 1 టేబుల్ స్పూన్
• జీలకర్ర - 2 టీ స్పూన్లు
• ధనియాలు - 1 టేబుల్ స్పూన్
• వెల్లుల్లి రెబ్బలు - 23
• కరివేపాకు - కొద్దిగా
• చింతపండు - 30 గ్రాములు
• ఆయిల్ - 2 టేబుల్ స్పూన్లు
• పచ్చిమిర్చి - 2
• టమోటాలు - 1
• ఆవాలు - 1 టీ స్పూన్
• ఉప్పు - రుచికి సరిపడా
• పసుపు - అర టీ స్పూన్
• ఎండుమిర్చి - 2
• కొత్తిమీర - అర కట్ట
• ఇంగువ - పావు టీ స్పూన్

టమోటాలు (Getty Images)

తయారీ విధానం :

• ముందుగా మిక్సీజార్​లో ఒక టేబుల్ స్పూన్ మిరియాలు, ఒక టీ స్పూన్ జీలకర్ర, ఒక టేబుల్ స్పూన్ ధనియాలు వేసి కాస్త బరకగా గ్రైండ్ చేయాలి. ఇందులోనే 15 వెల్లుల్లి రెబ్బలు, కొద్దిగా కరివేపాకు యాడ్ చేసి కాస్త బరకగా మిక్సీ పట్టాలి.
• అలాగే చిన్న గిన్నెలో 30 గ్రాముల చింతపండు, సరిపడా నీళ్లు పోసి 10 నిమిషాల పాటు నానబెట్టాలి. పది నిమిషాల తర్వాత రసం తీసి పక్కనుంచాలి.

చింతపండు (Getty Images)

• అదేవిధంగా స్టవ్ ఆన్ చేసి గిన్నెలో ఒక టేబుల్ స్పూన్ ఆయిల్ పోయాలి. నూనె వేడైన తర్వాత ఎనిమిది వెల్లుల్లి రెబ్బలు, రెండు పచ్చిమిర్చి, కొద్దిగా కరివేపాకు వేసి ఒక నిమిషం పాటు ఫ్రై చేయాలి.
• ఇందులోనే కట్ చేసి పెట్టుకున్న టమోటా ముక్కలు, రుచికి సరిపడా ఉప్పు వేసి కలుపుతూ టమోటాలను మగ్గించాలి. ఈ మిశ్రమం మగ్గాక తీసి పెట్టుకున్న చింతపండు రసం, రెండున్నర గ్లాసుల నీళ్లు, అర టీ స్పూన్ పసుపు వేసి కలపాలి.ఆ తర్వాత మంటను మీడియం ఫ్లేమ్​లో ఉంచి 10 నిమిషాల పాటు మరిగించి స్టవ్ ఆఫ్ చేసుకోవాలి.

వెల్లుల్లి (Getty Images)

• మరోవైపు తాలింపు కోసం స్టవ్ ఆన్ చేసి గిన్నెలో ఒక టేబుల్ స్పూన్ ఆయిల్ పోయాలి. నూనె వేడైన తర్వాత ఒక టీ స్పూన్ ఆవాలు, ఒక టీ స్పూన్ జీలకర్ర, పావు టీ స్పూన్ ఇంగువ వేసి వేయించాలి.
• ఆ తర్వాత రెండు ఎండుమిర్చి, కొద్దిగా కరివేపాకు యాడ్ చేసి ఫ్రై చేయాలి. ఇప్పుడు మరిగించిన రసం మిశ్రమం, అర కట్ట కొత్తిమీర తరుగు వేయాలి. అనంతరం రెండు నిమిషాల పాటు మరిగించి స్టవ్ ఆఫ్ చేయాలి.

కరివేపాకు (Getty Images)

• అంతే ఘుమఘుమలాడే వెల్లుల్లి మిరియాల రసం రెడీ అయినట్లే!
• వేడివేడి అన్నంలో ఈ రసం వేసి తిన్నారంటే ఇంకో రెండు ముద్దలు ఎక్కువగానే తింటారు.

నోరూరించే "గోంగూర చికెన్ నిల్వ పచ్చడి" - ముద్దకో ముక్క తినొచ్చు!

జిగురు లేకుండా "బెండకాయ పచ్చడి" - రోటి పచ్చడిలా అద్భుతంగా ఉంటంది!