మార్కెట్లోకి "కల్తీ పుచ్చకాయలు" - ఈ చిన్న టెస్ట్ చేసి తీసుకోవాలంటున్న FSSAI

Identify Adulterated Watermelon : ఏప్రిల్ రాకముందే పగటిపూట ఉష్ణోగ్రతలు జనాలను ఉక్కిరిబిక్కిరి చేస్తున్నాయి. ఈ క్రమంలోనే ఎండ వేడిమి నుంచి ఉపశమనం పొందేందుకు మజ్జిగ, కొబ్బరినీళ్లు, చెరుకు రసంతోపాటు ఒంటికి చలువ చేసే పండ్లు ఎక్కువగా తింటుంటారు మెజార్టీ పీపుల్. అలాంటి వాటిల్లో "పుచ్చకాయ" ఫస్ట్ ప్లేస్​లో ఉంటుంది. నీటి శాతంతోపాటు పీచు, పొటాషియం, కాల్షియం, మెగ్నీషియం, విటమిన్లు ఎ, సి కూడా పుష్కలంగా ఉంటాయి. అందుకే, పుచ్చకాయలు ఆరోగ్యానికి ఎంతో మేలు చేస్తాయి. పిల్లల నుంచి పెద్దల వరకు అందరూ ఈ పండును చాలా ఇష్టంగా తింటుంటారు. అయితే, ప్రస్తుతం కల్తీకి కాదేది అనర్హం అన్నట్లుగా కొందరు వ్యాపారులు తినే పండ్లను వదలట్లేదు.

సమ్మర్ స్పెషల్ ఫ్రూట్​గా పిలుచుకునే పుచ్చకాయను త్వరగా పండటానికి, ఎర్రగా కనిపించడానికి ఇంజెక్షన్లు వేస్తూ కల్తీ చేస్తున్నారు. ఇలా కల్తీ చేసిన వాటిని తినడం వల్ల లేనిపోని ఆరోగ్య సమస్యలు కొని తెచ్చుకోవడమేనని హెచ్చరిస్తున్నారు నిపుణులు. అలాంటి వాటి విషయంలో జాగ్రత్తగా ఉండాలని సూచిస్తున్నారు. ఈ నేపథ్యంలోనే పుచ్చకాయను కొనేటప్పుడు మీరు కొనేది మంచిదా? కాదా? అని తెలుసుకోవడానికి 'ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా(FSSAI)' కొన్ని టిప్స్ సూచిస్తుంది. మరి, అవేంటో ఈ స్టోరీలో తెలుసుకుందాం.

• మార్కెట్లోకి వస్తున్న కల్తీ పుచ్చకాయలను కనిపెట్టేందుకు వీలుగా FSSAI ఒక సింపుల్​ని టెస్ట్​ని సూచిస్తుంది. దాని ద్వారా ఎవరైనా చాలా సింపుల్​గా ఏది మంచిది? ఏది కల్తీదో ఈజీగా గుర్తించవచ్చు. అందుకోసం పెద్దగా రిస్క్ తీసుకోవాల్సిన పని లేదు. వీడియోలో చూపిస్తున్న ఈ టెస్ట్ ద్వారా సులువుగా కనిపెట్టవచ్చు.
• మీరు ఎక్కడైనా పుచ్చకాయను కొంటున్నప్పుడు ముందుగా ఒక చిన్న పీస్​ని కట్ చేసి ఇవ్వమనాలి. అప్పుడు ఒక చిన్న కాటన్ బాల్ లేదా టిష్యూ పేపర్​ తీసుకుని కట్ చేసిన ఆ ముక్క లోపలి భాగాన్ని అక్కడక్కడా రబ్ చేయాలి.
• అలా కాటన్ బాల్ లేదా టిష్యూ పేపర్​తో రబ్ చేసినప్పుడు దూది/టిష్యూ పేపర్ అనేది రెడ్ కలర్​లోకి మారితే అది కల్తీ చేసిన పుచ్చకాయగా గుర్తించాలంటున్నారు FSSAI అధికారులు.
• ఇలా ఎరుపు రంగులోకి మారిన కల్తీ పుచ్చకాయలో "ఎరిథ్రోసిన్" అనే కెమికల్ కలిసిందని తెలుసుకోవాలి. ఎందుకంటే పుచ్చకాయకు ఎరుపు రంగు రావడానికి ఎరిథ్రోసిన్ అనే రసాయనాన్ని అందులోకి ఇంజెక్ట్ చేస్తారట. అలాంటి పుచ్చకాయలు తినడం శరీరానికి అనేక విధాలుగా హాని కలిగిస్తుందంటున్నారు.
• అదే, ఆ పుచ్చకాయ ముక్క రబ్ చేసినప్పుడు దూది లేదా టిష్యూ పేపర్ రంగు మారకుండా ఉంటే అది మంచిదని తెలుసుకోవాలంటున్నారు FSSAI అధికారులు.

మీరు తాగే "పాలు" కల్తీవి కావొచ్చు! - FSSAI టిప్స్​తో క్షణాల్లో గుర్తించండిలా!

మరికొన్ని చిట్కాలు :

• మామిడిపండ్ల మాదిరిగానే పుచ్చకాయలు త్వరగా పండడానికి చాలా మంది పండ్ల వ్యాపారులు "కార్బైడ్" అనే కెమికల్​ను ఉపయోగిస్తుంటారు.
• ఈ కెమికల్ చల్లిన పుచ్చకాయలపై అక్కడక్కడ పసుపు రంగులో మచ్చలు ఏర్పడతాయంటున్నారు నిపుణులు. ఇలాంటివి కూడా ఆరోగ్యానికి మంచికాదని గుర్తుంచుకోవాలంటున్నారు.
• ఒకవేళ మీరు తీసుకున్న పుచ్చకాయ పైన అక్కడక్కడా పసుపు మచ్చలు కనిపించినట్లయితే అలాంటి వాటిని ఉప్పు నీటితో బాగా కడిగి ఆపై తినడం బెటర్ అని సూచిస్తున్నారు.
• మీరు పుచ్చకాయ కొనేటప్పుడు గుర్తుంచుకోవాల్సిన మరో ముఖ్యమైన టిప్ ఏంటంటే, ఆ కాయను ఒకటికి రెండుసార్లు బాగా పరిశీలించాలి. ఒకవేళ దానిపై ఎక్కడైనా చిన్న చిన్న రంధ్రాలు కనిపిస్తే మాత్రం దాన్ని కొనుగోలు చేయకండి. ఎందుకంటే అలాంటి పుచ్చకాయలు ఇంజెక్షన్ చేసి ఉండవచ్చంటున్నారు నిపుణులు.

కర్బూజతో "సేమియా పాయసం" - సూపర్​ టేస్టీగా ఉంటుంది - స్పెషల్​ అకేషన్స్​కు బెస్ట్​!

మార్కెట్​లో "కల్తీ పనీర్" - ఇంట్లోనే 'పల్లీలతో' హెల్దీగా తయారు చేసుకోండి! - చాలా ఈజీ!