పచ్చికారంతో ఇలా "దొండకాయ కూర" వండండి - అన్నం, చపాతీ, రోటీల్లోకి అద్భుతమే!

New Style Dondakaya Curry Recipe : కొన్ని కూరలు ఎండుకారంతో కంటే పచ్చికారం వేసి చేసినప్పుడే భలే రుచికరంగా ఉంటాయి. ఈ క్రమంలోనే చాలా మంది పచ్చికారంతో సొరకాయ, వంకాయ, కోడిగుడ్డు వంటివి ఎక్కువగా చేసుకుంటుంటారు. అవి మాత్రమే కాదు మీరు టేస్ట్ చేయాల్సిన మరో సూపర్ రెసిపీ ఉంది. అదే, నోరూరించే "దొండకాయ పచ్చికారం". ఇది రెగ్యులర్​గా చేసుకునే వాటికంటే సూపర్ టేస్టీగా ఉండి వేడి వేడి అన్నంలోకి అద్దిరిపోతుంది.

పచ్చిమిర్చితో ఈ స్టైల్​లో దొండకాయ కర్రీ చేశారంటే పిల్లల నుంచి పెద్దల వరకు వావ్ భలే రుచిగా ఉందంటూ లొట్టలేసుకుంటూ తింటారు. ఈ కర్రీ రైస్​లోకి మాత్రమే కాకుండా చపాతీ, రోటీల్లోకి కూడా చాలా బాగుంటుంది. అలాగే, దీని తయారీకి ఎక్కువగా శ్రమించాల్సిన అక్కర్లేదు. ఇంట్లో ఉన్న పదార్థాలతోనే అప్పటికప్పుడు ఈజీగా తయారు చేసుకోవచ్చు. మరి, లేట్ చేయకుండా పచ్చిమిర్చితో ఈ సూపర్ టేస్టీ దొండకాయ కర్రీని ఎలా చేసుకోవాలో ఇప్పుడు చూద్దాం.

దొండకాయలు (ETV Bharat)

కావాల్సిన పదార్థాలు :

• అర కిలో - దొండకాయలు
• ఆరేడు టేబుల్​స్పూన్లు - నూనె
• ఒక టీస్పూన్ - జీలకర్ర
• కొద్దిగా - కరివేపాకు
• అర టీస్పూన్ - పసుపు
• రుచికి తగినంత - ఉప్పు
• ఆరు టేబుల్​స్పూన్లు - పెరుగు
• ఒకట్రెండు టేబుల్​స్పూన్లు - ధనియాల పొడి
• ఒక టీస్పూన్ - కారం
• రెండు టీస్పూన్లు - కసూరి మేతి
• ఒక టీస్పూన్ - గరంమసాలా
• కొంచెం - సన్నని కొత్తిమీర తరుగు

పచ్చిమిర్చి (Getty Images)

పచ్చికారం కోసం :

• రెండు - మీడియం సైజ్ ఉల్లిపాయలు
• పచ్చిమిర్చి - రుచికి తగినన్ని
• వెల్లుల్లి రెబ్బలు - 15 నుంచి 20
• అల్లం - రెండించుల ముక్క
• కొత్తిమీర - రెండు పిడికెళ్లు

కొత్త పద్ధతిలో నోరూరించే "టమాటా గుడ్డు పులుసు" - బ్యాచిలర్స్ కూడా ఈజీగా చేసుకోవచ్చు!

దొండకాయ ముక్కలు (ETV Bharat)

తయారీ విధానం :

• ఈ రెసిపీ కోసం ముందుగా ఫ్రెష్ దొండకాయలను తీసుకుని శుభ్రంగా కడిగి చివర్లు కట్ చేయాలి.
• తర్వాత ఒక్కొ దొండకాయను సన్నగా, పొడుగ్గా నాలుగు ముక్కలుగా కట్ చేసి ఒక ప్లేట్​లోకి తీసుకుని పక్కన పెట్టుకోవాలి.
• ఇప్పుడు కర్రీలోకి అవసరమైన పచ్చిమిర్చి పేస్ట్​ను ప్రిపేర్ చేసుకోవాలి.
• ఇందుకోసం మిక్సీ జార్​లో ఉల్లిపాయ ముక్కలు, అల్లం ముక్క, పొట్టు తీసిన వెల్లుల్లి రెబ్బలు, పచ్చిమిర్చి తుంపలు, కొత్తిమీర వేసుకొని మరీ మెత్తగా కాకుండా కాస్త బరకగా, పేస్ట్​లా మిక్సీ పట్టుకోవాలి.

వెల్లుల్లి (Getty Images)

• అనంతరం కర్రీ ప్రిపరేషన్ కోసం స్టవ్ మీద పాన్ పెట్టి ఆయిల్ వేసుకోవాలి. నూనె హీట్ అయ్యాక జీలకర్ర, కరివేపాకు వేసి వేయించాలి.
• అవి లైట్​గా వేగాక గ్రైండ్ చేసి పెట్టుకున్న పచ్చిమిర్చి పేస్ట్ మిశ్రమాన్ని యాడ్ చేసుకుని లో ఫ్లేమ్​లో కాసేపు కలుపుతూ వేయించుకోవాలి.
• పచ్చిమిర్చి పేస్ట్​లోని​ పచ్చివాసన పోయి ఆయిల్ సెపరేట్ అవుతున్నప్పుడు అందులో పసుపు, రుచికి సరిపడా ఉప్పు వేసుకుని ఒకసారి అంతా కలిసేలా బాగా మిక్స్ చేసుకోవాలి.
• ఆ తర్వాత ముందుగా కట్ చేసి పెట్టుకున్న దొండకాయ ముక్కలు వేసుకుని పచ్చిమిర్చి మిశ్రమం ముక్కలకు పట్టేలా ఒకసారి మంచిగా కలపాలి.

పోపు దినుసులు (Getty Images)

• ఆపై కర్రీ అడుగంటకుండా ఒకట్రెండు స్పూన్ల వాటర్ వేసుకుని కలిపి మూతపెట్టి సన్నని సెగ మీద నాలుగైదు నిమిషాలు ఉడకనివ్వాలి.
• ఇలా ఉడికించేటప్పుడు మధ్యమధ్యలో మూత తీసి కలుపుతుండాలి. లేదంటే కర్రీ అడుగంటే అవకాశం ఉంటుంది.
• దొండకాయ ముక్కలు సగం వరకు ఉడికాయనుకున్నాక అందులో పెరుగును ఉండలు లేకుండా కలిపి వేసుకోవాలి.
• అలాగే, ధనియాల పొడి, కారం, గరంమసాలా వేసుకుని మిశ్రమం మొత్తం చక్కగా కలిసేలా ఒకసారి బాగా మిక్స్ చేయాలి.

కొత్తిమీర (Getty Images)

• ఆ తర్వాత గ్రేవీకి సరిపడా నీళ్లు పోసుకుని కలిపి మూతపెట్టి మీడియం ఫ్లేమ్​లో మరో నాలుగైదు నిమిషాలు కుక్ చేసుకోవాలి.
• దొండకాయ ముక్కలు మంచిగా ఉడికి, ఆయిల్ సెపరేట్ అవుతున్నప్పుడు చివరగా కసూరి మేతి, సన్నని కొత్తిమీర తరుగు వేసుకుని కలిపి దింపేసుకుంటే చాలు.
• అంతే, పచ్చికారంతో నోరూరించే "దొండకాయ కర్రీ" మీ ముందు ఉంటుంది!
• మరి, నచ్చితే మీరూ ఓసారి ఇలా దొండకాయ కూర చేసి చూడండి. ఇంటిల్లిపాదీ తృప్తిగా తినేస్తారు.
• ఒకవేళ మీరు ఈ కర్రీని తక్కువ క్వాంటిటీలో చేసుకోవాలనుకుంటే దొండకాయలతో పాటు ఇతర పదార్థాలను తగ్గించి తీసుకుంటే సరిపోతుంది.

అన్నం, టిఫెన్స్​లోకి "టమాటా పచ్చడి" - పుదీనాతో కలిపి ఇలా చేస్తే ఆ టేస్ట్ నెక్ట్స్ లెవల్!

ఎన్నడూ ట్రై చేయని కొత్తరకం "బెండకాయ పచ్చడి" - పెనంపై కాల్చి చేయడంలోనే టేస్ట్ సీక్రెట్!