వెనెజువెలా అధ్యక్షురాలిగా డెల్సీ బాధ్యతలు- మదురోను కిడ్నాప్ చేశారన్న కొడుకు

Venezuela Interim President : అమెరికా చేపట్టిన సంచలన సైనిక ఆపరేషన్‌తో వెనిజువెలా రాజకీయాలు ఒక్కసారిగా మారాయి. అధ్యక్షుడు నికోలస్ మదురోను అమెరికా బలగాలు అరెస్టు చేసి న్యూయార్క్‌కు తరలించిన కొద్ది గంటల వ్యవధిలోనే, దేశ ఉపాధ్యక్షురాలు డెల్సీ రోడ్రిగెజ్ తాత్కాలిక అధ్యక్షురాలిగా బాధ్యతలు స్వీకరించారు. ఈ పరిణామాలు లాటిన్ అమెరికాలో మాత్రమే కాకుండా అంతర్జాతీయ రాజకీయాల్లోనూ తీవ్ర చర్చకు దారితీశాయి.

అమెరికా అపహరించింది!
సోమవారం (స్థానిక కాలమానం ప్రకారం) మధ్యాహ్నం వెనిజువెలా జాతీయ అసెంబ్లీలో జరిగిన కార్యక్రమంలో డెల్సీ రోడ్రిగెజ్ ప్రమాణ స్వీకారం చేశారు. ఈ ప్రమాణ స్వీకారాన్ని ఆమె సోదరుడు, జాతీయ అసెంబ్లీ అధ్యక్షుడు జార్జ్ రోడ్రిగెజ్ నిర్వహించారు. ప్రమాణం అనంతరం డెల్సీ మాట్లాడుతూ, మదురో, ఫస్ట్ లేడీ సిలియా ఫ్లోరెస్‌ను అమెరికా అపహరించిందని ఆరోపించారు. భారీ మనసుతో బాధ్యతలు స్వీకరిస్తున్నానని, ఇది ప్రజాస్వామ్యంపై దేశ సార్వభౌమత్వంపై జరిగిన దాడి అంటూ వ్యాఖ్యానించారు.

చైనా, రష్యా, ఇరాన్ దేశాల రాయబారులు హాజరు
డెల్సీ రోడ్రిగెజ్ ప్రమాణ స్వీకార కార్యక్రమానికి చైనా, రష్యా, ఇరాన్ దేశాల రాయబారులు హాజరుకావడం విశేషం. ఈ మూడు దేశాలు వెనిజువెలాకు అత్యంత సన్నిహిత మిత్రదేశాలుగా గుర్తింపు పొందాయి. ప్రమాణ స్వీకారం అనంతరం చైనా రాయబారి లాన్ హు, రష్యా రాయబారి సెర్గీ మెలిక్-బగ్దసరోవ్, ఇరాన్ రాయబారి అలీ చెగిని ఆమెను అభినందించారు. ఈ ముగ్గురు రాయబారులు ఒకే వరుసలో నిలబడి తమ మద్దతును తెలియజేయడం రాజకీయంగా ప్రాధాన్యం సంతరించుకుంది. మదురో అరెస్టుకు దారితీసిన అమెరికా సైనిక చర్యను ఈ మూడు దేశాలు తీవ్రంగా ఖండించాయి.

మదురోకు మద్దతుగా ప్లకార్డులతో ప్రదర్శన
ఇదే సమయంలో వెనిజువెలా రాజధాని కరాకాస్‌లో మదురో మద్దతుదారులు వీధుల్లోకి వచ్చారు. వందల సంఖ్యలో ప్రజలు జాతీయ జెండాలతో, మదురోకు మద్దతుగా ప్లకార్డులతో ప్రదర్శనలు నిర్వహించారు. అమెరికా చర్యను వ్యతిరేకిస్తూ, తమ నాయకుడిని తిరిగి దేశానికి తీసుకురావాలని డిమాండ్ చేశారు. ఇంతకుముందు కూడా అమెరికా మదురోపై బహుమతి మొత్తాన్ని పెంచినప్పుడు ఇలాంటి ర్యాలీలు నిర్వహించారని సీనియర్ నేతలు గుర్తు చేశారు. విపక్షాలు నిరసనలు చేపట్టిన ప్రతీసారి ప్రభుత్వ మద్దతుతో ప్రతినిరసనలు జరగడం వెనిజువెలాలో సాధారణంగా మారిందని విశ్లేషకులు చెబుతున్నారు.

అంతర్జాతీయ సమాజం స్పందించాలి: మదురో కొడుకు
మరోవైపు, మదురో కుమారుడు నికోలాస్ మదురో గెర్రా జాతీయ అసెంబ్లీలో భావోద్వేగ ప్రసంగం చేశారు. తన తండ్రిని అమెరికా అపహరించిందని ఆరోపిస్తూ, అంతర్జాతీయ సమాజం స్పందించాలని పిలుపునిచ్చారు. ఒక దేశాధ్యక్షుడిని ఇలా అరెస్టు చేయడాన్ని సహించితే, రేపు ఏ దేశం కూడా సురక్షితంగా ఉండదని హెచ్చరించారు. తమ కుటుంబంపై తప్పుడు కేసులు బనాయిస్తున్నారని ఆయన అన్నారు.

అమెరికాలోని న్యూయార్క్ ఫెడరల్ కోర్టులో మదురో తనపై ఉన్న అభియోగాలను ఖండించారు. కారాకాస్‌లోని తన నివాసంలోనే అరెస్టు చేశారని, ఇది అంతర్జాతీయ చట్టాలకు విరుద్ధమని కోర్టు దృష్టికి తీసుకెళ్లారు. అయితే న్యాయమూర్తి ఆల్విన్ హెల్లర్‌స్టీన్ ఈ అంశాలపై సరైన సమయంలో వాదనలు వినిపించవచ్చని సూచించారు. అమెరికా అధ్యక్షుడు డొనాల్డ్ ట్రంప్ మాత్రం వెనిజువెలాపై అమెరికా నియంత్రణ కొనసాగుతుందని ప్రకటించారు. అవసరమైతే తాత్కాలికంగా దేశాన్ని తామే నిర్వహిస్తామని, చమురు వనరులపై కూడా అమెరికా దృష్టి ఉందని వ్యాఖ్యానించారు. ఈ పరిణామాలతో వెనిజువెలా భవిష్యత్తు, అంతర్జాతీయ రాజకీయ సమీకరణలు ఎలా మారతాయన్నదానిపై ప్రపంచవ్యాప్తంగా ఆసక్తి నెలకొంది.

మరోవైపు, అమెరికా వైఖరిపై మాజీ అమెరికా రాయబారి చార్లెస్ షాపిరో కీలక వ్యాఖ్యలు చేశారు. వెనిజువెలాలో ప్రజాస్వామ్య పునరుద్ధరణ కంటే స్థిరత్వానికే అమెరికా ప్రాధాన్యం ఇస్తోందని ఆయన అభిప్రాయపడ్డారు. మదురో ప్రభుత్వంలోని కీలక నేతలు అదే స్థానాల్లో కొనసాగుతుండటం ఇందుకు నిదర్శనమని చెప్పారు. అంతర్గత వ్యవహారాల మంత్రి డియోస్డాడో కబెల్లోపై కూడా అమెరికాలో అభియోగాలు ఉన్నప్పటికీ, ఆయన పదవిలో కొనసాగడాన్ని షాపిరో ప్రస్తావించారు. మదురో లేని మదురో వ్యవస్థ కొనసాగుతోందని వ్యాఖ్యానించారు.