పశ్చిమాసియా ఉద్రిక్తతల పరిష్కారానికి భారత్, చైనా సహాయపడగలవు : హిల్లరీ క్లింటన్​

Hillary Clinton on US Iran War : పశ్చిమాసియాలో నెలకొన్న ఉద్రిక్తతలపై అమెరికా మాజీ విదేశాంగ మంత్రి హిల్లరీ క్లింటన్ కీలక వ్యాఖ్యలు చేశారు. అమెరికా అధ్యక్షుడు డొనాల్డ్ ట్రంప్ బెదిరింపులకు బదులుగా దౌత్యం మార్గాలను పాటించాలనుకుంటే ఈ సమస్య పరిష్కారానికి భారత్, చైనా కీలక పాత్రలు పోషించవచ్చని అభిప్రాయపడ్డారు. వ్యూహాత్మక స్థాయిలో ఉన్న అపోహలే మనల్ని ఈ దుస్థితికి తీసుకువచ్చాయని చెప్పారు. ఓ మీడియా సంస్థకు ఇచ్చిన ఇంటర్వ్యూలో క్లింటన్ ఈ మేరకు వ్యాఖ్యానించారు. ఇరాన్ నుంచి చమురు, గ్యాస్‌ను కొనుగోలు చేసే అతిపెద్ద దేశాల్లో చైనా ఒకటి కాబట్టి, ముఖ్యంగా ఆ దేశం టెహ్రాన్‌పై ఒత్తిడి తీసుకురాగలదని క్లింటన్ అన్నారు.

"ట్రంప్ ఈ పరిస్థితి నుంచి ఎలా బయటపడగలరో మీరు తెలుసుకోవాలనుకుంటే, దానికి చైనా, భారతదేశం కీలకమని నేను భావిస్తున్నాను. ఎందుకంటే, ఇరాన్ నుంచి అత్యధికంగా చమురు, గ్యాస్‌ను ఎవరు కొనుగోలు చేస్తున్నారో చూస్తే అది చైనా, భారతదేశమే. ఈ విషయంలో చైనా చాలా ముందుంది. వారు ట్యాంకర్ల ద్వారా పొందిన శిలాజ ఇంధనాలను పెద్ద మొత్తంలో నిల్వ చేస్తున్నారు. వారు మరిన్ని నిల్వలను పెంచుకుంటున్నారు. కానీ వారికి ఇరాన్ అవసరం పడుతుంది. ట్రంప్ కేవలం బెదిరింపులకు బదులుగా నిజంగా దౌత్యనీతిని పాటించడానికి సిద్ధంగా ఉంటే అత్యుత్తమ ఒత్తిడి అక్కడి నుంచే వస్తుందని నాకు అనిపిస్తోంది."
--హిల్లరీ క్లింటన్, అమెరికా మాజీ విదేశాంగ మంత్రి

ఫిబ్రవరి 28న అమెరికా, ఇజ్రాయెల్ దేశాలు ఇరాన్‌పై సంయుక్తంగా దాడి చేయడంతో ఈ ఘర్షణ ప్రారంభమైంది. ఇది ప్రతీకార దాడులకు దారితీసింది. అంతేకాకుండా కీలకమైన హర్మూజ్ జలసంధి మూసివేతకు కారణమైంది. అయితే, జూన్‌లో అమెరికా- ఇరాన్ ఒక మధ్యంతర శాంతి ఒప్పందంపై సంతకాలు చేశాయి, కానీ గత నెలలో ఇరుపక్షాలు జరిపిన తాజా దాడులతో అది కుప్పకూలింది. అయితే, ఉద్రిక్తతలు తీవ్రమవుతున్న నేపథ్యంలో ఈ ఘర్షణను ముగించేందుకు అమెరికా- ఇరాన్‌ల మధ్య మధ్యవర్తిత్వం వహించడానికి పాకిస్థాన్, ఒమన్, ఖతార్ ప్రయత్నిస్తున్నాయి. కానీ, హర్మూజ్ జలసంధి దీనికి ప్రధాన అడ్డంకిగా మారింది. యుద్ధం కారణంగా ఇక్కడ నౌకాయానానికి అంతరాయం ఏర్పడింది. సాధారణ సమయాల్లో ప్రపంచ ఇంధన సరఫరాలో సుమారు ఐదో వంతు ఈ గల్ఫ్ జలసంధి గుండానే ప్రయాణించేది.

ఇదిలా ఉండగా, ఇరాన్‌ను లక్ష్యంగా చేసుకుని ఆ దేశ ఆర్థిక వ్యవస్థ నడ్డివిరిచేలా కొత్త ఆంక్షలను అమెరికా ప్రకటించింది. 'ఆపరేషన్ ఎకనామిక్ అవుట్‌కాస్ట్' పేరిట 60 సంస్థలు, వ్యక్తులు, నౌకలపై అమెరికా ఆంక్షలు విధించింది. ఇరాన్ సైనిక కార్యకలాపాలు, పెట్రోలియం, పెట్రో కెమికల్ వాణిజ్యంతో సంబంధాలున్నాయని ఆరోపిస్తూ వాటిపై ఆంక్షలు విధించింది. టెహ్రాన్​తో వ్యాపారం చేసే ప్రతి దేశం ఆ ఆర్థిక సంబంధాలను తెంచుకోవాలని లేదంటే అమెరికా నుంచి ప్రతీకార చర్యలను ఎదుర్కోవాల్సి వస్తుందని అమెరికా ఆర్థిక మంత్రి స్కాట్ బెసెంట్ హెచ్చరించారు. ఈ నేపథ్యంలో హిల్లరీ క్లింటన్​ ఈ వ్యాఖ్యలు చేశారు. మరోవైపు, కొత్త ఆంక్షలు విధించాలన్న అమెరికా ప్రణాళికలకు సైనిక ప్రతిస్పందన ఇస్తామని టెహ్రాన్ హెచ్చరించింది.

ఇరాన్‌తో సహకారం ఎల్లప్పుడూ అంతర్జాతీయ చట్ట పరిధిలోనే ఉంటుంది : చైనా
ఇదిలా ఉండగా, ఇరాన్​పై అమెరికా ప్రకటించిన ఆంక్షలపై చైనా స్పందించింది. ప్రపంచవ్యాప్తంగా ఉన్న ఇరాన్ ఆర్థిక సంబంధాలపై అమెరికా ప్రకటించిన "ఆర్థిక దాడి"లో ఒక పెద్ద మెలిక ఉండవచ్చని చైనా అభిప్రాయపడింది. ఇరాన్‌తో తమ సహకారం ఎల్లప్పుడూ అంతర్జాతీయ చట్ట పరిధిలోనే ఉందని బీజింగ్ స్పష్టం చేసింది. చైనా-ఇరాన్ సహకారాన్ని "అంతరాయం కలిగించకూడదు లేదా బలహీనపరచకూడదు. ఈ సంబంధిత పరిణామాలను చైనా నిశితంగా గమనిస్తోంది. తన హక్కులు, ప్రయోజనాలను దృఢంగా కాపాడుకోవడానికి అవసరమైన అన్ని చర్యలను తీసుకుంటుంది. చట్టవిరుద్ధమైన ఏకపక్ష ఆంక్షలను చైనా వ్యతిరేకిస్తుంది" అని చైనా విదేశాంగ మంత్రిత్వ శాఖ ప్రతినిధి లిన్ జియాన్ అన్నారు. కాగా, ఇరాన్ నుంచి వచ్చే చమురు రవాణాలో పరోక్ష మార్గాల ద్వారానే 80 శాతానికి పైగా చైనాకే అందుతుంది.

ఇరాన్‌తో చమురు డీల్​- భారత్​కు చెందిన నాలుగు కంపెనీలపై అమెరికా ఆంక్షలు

రికార్డ్ స్థాయిలో పడిపోయిన ట్రంప్ పాపులారిటీ- ఇరాన్​తో యుద్ధమే కారణం: సర్వే