అనిల్ అంబానీకి ED షాక్- రూ. 3.7 వేల కోట్లు విలువైన నివాసం జప్తు!
అనిల్ అంబానీ నివాసం అబోడ్ను అటాచ్ చేసిన ఈడీ- ఈ ఇంటి విలువ రూ.3,716.83 కోట్లు
Published : February 25, 2026 at 6:30 PM IST
Anil Ambani Apartment ED Attached : రిలయన్స్ ఏడీఏ గ్రూప్ ఛైర్మన్ అనిల్ అంబానీ(66)కి చెందిన ముంబయి నివాసం 'అబోడ్'ను కేంద్ర దర్యాప్తు సంస్థ ఎన్ఫోర్స్మెంట్ డైరెక్టరేట్ (ఈడీ) బుధవారం అటాచ్ చేసింది. ఈ నివాసం విలువ దాదాపు రూ.3,716.83 కోట్లు ఉంటుంది. మనీ లాండరింగ్ నిరోధక చట్టం (పీఎంఎల్ఏ) ప్రకారం అనిల్ అంబానీ ఇంటిని అటాచ్ చేశామని ఈడీ అధికార వర్గాలు తెలిపాయి. ఈమేరకు ఈడీ నుంచి ఒక తాత్కాలిక ఆదేశం జారీ అయిందని చెప్పాయి. రిలయన్స్ ఏడీఏ గ్రూప్నకు చెందిన రిలయన్స్ కమ్యూనికేషన్స్ (ఆర్కామ్) బ్యాంకు మోసానికి పాల్పడిందనే అభియోగాలను ఎదుర్కొంటోంది. ఈ కేసులోనే ముంబయిలోని పాలీ హిల్ ఏరియాలో ఉన్న అనిల్ అంబానీ నివాసం 'అబోడ్'ను ఈడీ అటాచ్ చేసింది.
దీంతో బ్యాంకును ఆర్కామ్ మోసగించిన కేసులో ఇప్పటివరకు ఈడీ జప్తు చేసిన అనిల్ అంబానీ ఆస్తుల విలువ దాదాపు రూ.15,700 కోట్లకు చేరింది. విలాసవంతమైన అబోడ్ భవన సముదాయం ఎత్తు 66 మీటర్లు. ఇందులో 17 ఫ్లోర్లు ఉన్నాయి. ఈనేపథ్యంలో త్వరలోనే ముంబయిలోని ఈడీ ఆఫీసులో అనిల్ అంబానీని మరోసారి ప్రశ్నిస్తారని తెలుస్తోంది. ఇంతకుముందు తొలిసారిగా 2025 ఆగస్టులో ఆయన్ను ఈడీ అధికారులు ప్రశ్నించారు. అప్పట్లో అనిల్ అంబానీ స్టేట్మెంట్ను ఈడీ అధికారులు నమోదు చేశారు.
యస్ బ్యాంకు నుంచి రూ.3వేల కోట్ల లోన్లు
దర్యాప్తు వర్గాల కథనం ప్రకారం, 2017 నుంచి 2019 మధ్యకాలంలో యస్ బ్యాంకు నుంచి అనిల్ అంబానీకి చెందిన పలు కంపెనీలు దాదాపు రూ.3వేల కోట్ల దాకా లోన్లు తీసుకున్నాయి. అయితే ఆ రుణాలను నిర్దేశిత వ్యాపార అవసరాల కోసం వినియోగించలేదు. ఆ డబ్బులను షెల్ కంపెనీల ద్వారా విదేశాలకు దారిమళ్లించారనే అభియోగాలు ఉన్నాయి. యస్ బ్యాంకు నుంచి ఆర్కామ్ తీసుకున్న రుణాన్ని ఇలాగే దారిమళ్లించారని అంటున్నారు. దీనిపై తొలుత సీబీఐ విచారణ జరిపి, రెండు ఎఫ్ఐఆర్లను నమోదు చేసింది. ఆర్కామ్ సహా పలు అనిల్ అంబానీ కంపెనీలపై మోసం, లంచాలు ఇవ్వడం, ప్రజాధనాన్ని దారి మళ్లించడం అనే అభియోగాలతో కేసులు నమోదు చేసింది.
The Enforcement Directorate (ED) has provisionally attached the Pali Hill Residential Property ‘Abode’ of industrialist Anil Ambani worth Rs 3,716.83 crores under the provisions of the Prevention of Money Laundering Act, 2002 (PMLA): ED pic.twitter.com/DnzRforZYS
— ANI (@ANI) February 25, 2026
అనిల్ అంబానీకి సుప్రీంకోర్టు ఫ్రెష్ నోటీసులు- భారీ బ్యాంకింగ్, కార్పొరేట్ మోసాలపై విచారణకు ఆదేశం
అనిల్ అంబానీ కేసు- రిలయన్స్ పవర్ లిమిటెడ్ ఎగ్జిక్యూటివ్ డైరెక్టర్ అరెస్ట్
