దిల్లీలో పెట్రోల్ బాంబు దాడులకు​ ఐఎస్​ఐ కుట్ర- రైల్వే స్టేషన్​, బస్​స్టాప్​, పోలీస్​ లైన్సే టార్గెట్​

ISI Plot To Attack Delhi : దిల్లీ పోలీసులు భారీ ఉగ్రకుట్రను భగ్నం చేశారు. పాకిస్థాన్​ ఐఎస్​ఐ హ్యాండ్లర్​ షెహజాద్​ భట్టీ పర్యవేక్షణలో దిల్లీపై పెట్రోల్ బాంబు దాడులకు కుట్ర పన్నినట్లు వారు గుర్తించారు. బుధవారం దిల్లీ, పంజాబ్​ల్లో ఆరుగురు అనుమానిత వ్యక్తులను దిల్లీ పోలీస్​ స్పెషల్ సెల్ అరెస్టు చేసింది. వారిని తమదైన రీతిలో విచారణ చేయగా, ఈ కుట్ర గురించి కీలక విషయాలు వెలుగులోకి వచ్చాయి.

"పాకిస్థాన్​కు చెందిన ఐఎస్​ఐ హ్యాండ్లర్​ షెహజాద్​ భట్టీ ఆదేశాల మేరకు దేశ రాజధాని దిల్లీలోని పలు కీలక ప్రాంతాల్లో పెట్రోల్ బాంబు దాడులు చేయడానికి ఉగ్రవాదులు కుట్ర పన్నారు. ముఖ్యంగా దిల్లీలోని సివిల్ లైన్స్ ప్రాంతంలో ఉన్న న్యూ పోలీస్ లైన్స్​, ఆనంద్ విహార్​ ఇంటర్​-స్టేట్ బస్ టెర్మినల్​, రైల్వే స్టేషన్ సహా విపరీతమైన రద్దీ ఉండే మార్కెట్ ప్రాంతాల్లో వారు రెక్కీ నిర్వహించి, దాడులు చేయడానికి ప్లాన్ చేశారు" అని పోలీసులు తెలిపారు.

నిషేధిత యాప్స్ ద్వారా చాటింగ్​
దర్యాప్తు సమయంలో నిందితుల మొబైల్ ఫోన్ల నుంచి ఈ ప్రాంతాలకు సంబంధించిన వీడియోలను పోలీసులు స్వాధీనం చేసుకున్నారు. నిందితులు తాము రికార్డు చేసిన రెక్కీ వీడియోలను ఒక నిషేధిత మెసేజింగ్ అప్లికేషన్ ద్వారా ఐఎస్ఐ హ్యాండ్లర్​ భట్టీకి పంపినట్లు దర్యాప్తు అధికారులు గుర్తించారు. భట్టీకి, నిందితులకు మధ్య జరిగిన సోషల్ మీడియా చాట్​లను కూడా రీస్టోర్ చేశారు.

ఆ చాట్​లో ఏముంది?
జూన్ చివరి వారంలో భట్టీ, నిందితుడు డానిష్​ (అలియాస్​ చంద్ మియాన్) మధ్య జరిగిన సంభాషణలు దర్యాప్తులో బయటపడ్డాయి. ఆ చాట్​లో 'మెటీరియల్​' సాయంత్రంలోపు అందుతుందని, దానిని సేకరించాలని భట్టీ, డానిష్​కు తెలిపాడు. ఆ తర్వాత మెటీరియల్ అందిందా అని భట్టీ అడగగా, అంతా సేకరించామని డానిష్ సమాధానం చెప్పాడు. ఆ వస్తువులను సురక్షితంగా సిద్ధంగా ఉంచుకొని, తదుపరి ఆదేశాల కోసం వేచి ఉండాలని భట్టీ ఆదేశించాడు. కాగా ఈ చాట్​లో ప్రస్తావించిన 'మెటీరియల్​' దిల్లీలో పెట్రోల్ బాంబు దాడులకు చేయడానికి ఉద్దేశించిందేనని దర్యాప్తులో తేలింది. అంతకు ముందు పోలీసులు రాజ్​ఘాట్​ వెనుక ఉన్న విజయ్​ ఘాట్ నుంచి పెట్రోల్ బాంబులను స్వాధీనం చేసుకున్నారు.

పాక్ నెట్​వర్క్​తో సంబంధాలు
ఇంతకు ముందు అరెస్టు చేసిన ఆరుగురు నిందితులకు, షెహజాద్​ భట్టీ కోసం పనిచేస్తున్న మరో 10 మంది పాకిస్థాన్ వ్యక్తులతో కూడా పరిచయం ఉన్నట్లు పోలీసులు గుర్తించారు. ఈ ఉగ్రకుట్రలో వారి పాత్ర, ప్రమేయంపై దర్యాప్తు అధికారులు విచారణ జరుపుతున్నారు.

ఎవరికి ఏ పని అప్పగించారంటే,
పోలీసులు తెలిపిన వివరాల ప్రకారం, డానిష్​ (అలియాస్ చంద్ మియాన్)కు దిల్లీలో రెక్కీ నిర్వహించడం, దాడికి ప్రణాళిక వేసే బాధ్యతను భట్టీ అప్పగించాడు. ఈ ఆపరేషన్ విజయవంతంగా పూర్తి చేస్తే డానిష్​కు రూ.20వేలు ఇస్తానని మాటిచ్చాడు. సల్మాన్ అనే మరో నిందితుడికి ఒక ప్రత్యేకమైన పని అప్పగించారు. ఇతను డానిష్​కు సహకరిస్తూ, ఉగ్ర దాడులకు సంబంధించిన వీడియో తీసి, ఆ ఫుటేజ్​ని నేరుగా షెహజాద్​ భట్టీకి పంపాలని చెప్పారు. దిల్లీలోని షాహీన్​ బాగ్​కు చెందిన తయ్యబ్​, ఐఎస్​ఐ పంపిన ఆయుధాలు అందుకోవడం, వాటిని అమ్మే పనులను చూసుకుంటున్నాడు. ఘజియాబాద్​లోని మోదీనగర్​కు చెందిన జుబేర్​ ఖాన్​ అమృత్​సర్ నుంచి ఆయుధాల కన్సైన్​మెంట్​ను తీసుకువచ్చాడు. మేరఠ్​కు చెందిన అలీ ఫజల్​ ఆయుధాలను విక్రయించే బాధ్యత చూసుకున్నాడు. అమృత్​సర్​కు చెందిన మల్కిత్​ సింగ్​ ఈ నెట్​వర్క్​లో కీలక వ్యక్తి. ఇతను పాకిస్థాన్ నుంచి డ్రోన్ల ద్వారా పడేసిన ఆయుధాలను సేకరించి, వాటిని తమ ఉగ్ర నెట్​వర్క్​లోని మిగిలిన సభ్యులకు పంపిణీ చేసే బాధ్యత తీసుకున్నాడు. అయితే ఐఎస్​ఐ హ్యాండ్లర్​ షెహజాద్ భట్టీతో సంబంధం ఉన్న రెండు మోడ్యాళ్లును ఛేదించిన తర్వాత, దిల్లీ పోలీసులు ఈ ఆరుగురు నిందితులను అరెస్టు చేశారు. సరిహద్దు అవతల ఉన్న పెద్ద నెట్​వర్క్​, ఇతర పాకిస్థానీ హ్యాండర్ల పాత్రపై ప్రస్తుతం దర్యాప్తు చేస్తున్నారు.

'ఎంత దూరమైనా పారిపోవచ్చు- కానీ తప్పించుకోలేరు'- ఎన్​కౌంటర్​లో లష్కరే ఉగ్రవాది హతం

''VB G RAM G' అంటే ఉపాధి హక్కులను దొంగలించడమే'- కొత్త చట్టంపై కాంగ్రెస్ విమర్శలు​