పుదుచ్చేరిలో రికార్డు స్థాయిలో 89.87 శాతం పోలింగ్‌ నమోదు

2026 అసెంబ్లీ ఎన్నికల్లో కేంద్ర పాలిత ప్రాంతమైన పుదుచ్చేరిలో రికార్డు స్థాయిలో 89.87 శాతం పోలింగ్‌ నమోదు అయ్యింది. స్వాతంత్ర్యం అనంతరం 1964లో జరిగిన తొలి ఎన్నికల తర్వాత ఈ మేరకు జరగడం ఇదే తొలిసారి అని ఓ అధికారి తెలిపారు. 1974లో పోలింగ్ శాతం 85.33గా, 2006లో 85.29గా, 2011లో 85.57గా నమోదైందని తెలిపారు.

కేరళ, అసోం, పుదుచ్చేరిలో పోలింగ్ ముగిసింది. సాయంత్రం 5 గంటల వరకు అసోంలో 84.42 శాతం, కేరళలో 75.01 శాతం పోలింగ్‌, అలాగే పుదుచ్చేరిలో 86.92 శాతం పోలింగ్‌ నమోదు అయ్యింది. అయితే, అసోంలో సాయంత్రం 5 గంటల వరకు రికార్డుస్థాయిలో పోలింగ్‌ నమోదు అయినట్లు అధికారులు తెలిపారు.

కేరళ, అసోం, పుదుచ్ఛేరి రాష్ట్ర అసెంబ్లీ ఎన్నికల్లో మధ్యాహ్నం 3 గంటల నాటికి భారీగా పోలింగ్ జరిగింది. అసోంలో ఇప్పటి వరకు 75.91 శాతం, కేరళలో 62.71 శాతం, పుదుచ్ఛేరిలో 72.40 శాతం మేర పోలింగ్ నమోదు అయ్యింది.

పుదుచ్ఛేరిలోని ఓ పోలింగ్ కేంద్రం వద్ద వినూత్నంగా ఒక రోబో ఓటర్లకు స్వాగతం పలుకుతోంది. ఓటు వేయడం మీ కర్తవ్యం. మీరు ఆ బాధ్యతను నెరవేర్చండి అంటూ చెబుతోంది.

కేరళ అసెంబ్లీ ఎన్నికల్లో భారీ స్థాయిలో వయోవృద్ధులు తమ ఓటింగ్ హక్కును వినియోగించుకుంటున్నారు. వారిని అనుసరించి ప్రతి ఒక్కరూ ఓటు హక్కు వినియోగించుకోవాలని ఈసీ సూచన

కేరళ అసెంబ్లీ ఎన్నికల్లో చాలా మంది సినీ ప్రముఖులు తమ ఓటు హక్కును వినియోగించుకున్నారు. వారిలో మలయాళ సినీ అగ్రనటులు మోహన్​లాల్​, మమ్ముట్టి, పృథ్వీరాజ్​ సుకుమారన్​, నటుడు, కేంద్రమంత్రి అయిన సురేశ్ గోపి, టొవినో థామస్​, దిలీప్​ తదితరులు ఉన్నారు.

2026 అసెంబ్లీ ఎన్నికలకు సంబంధించి భారత ఎన్నికల సంఘం వెల్లడించిన గణాంకాల ప్రకారం, గురువారం మధ్యాహ్నం ఒంటి గంట సమయానికి అసోంలో 59.63 శాతం మేర గణనీయమైన ఓటింగ్ నమోదైంది. అదే సమయంలో కేరళలో ఆ శాతం 49.70గా ఉంది. కేంద్ర పాలిత ప్రాంతమైన పుదుచ్చేరిలో పోలింగ్ సరళిని పరిశీలిస్తే, అక్కడ 56.83 శాతం మేర చెప్పుకోదగ్గ స్థాయిలో ఓటింగ్ నమోదైనట్లు తేలింది.

• అసోం, కేరళ, పుదుచ్చేరిలో కొనసాగుతున్న పోలింగ్‌
• మధ్యాహ్నం ఒంటిగంట వరకు అసోంలో 59.63 శాతం పోలింగ్‌ నమోదు
• మధ్యాహ్నం ఒంటిగంట వరకు కేరళలో 49.70 శాతం పోలింగ్‌ నమోదు
• మధ్యాహ్నం ఒంటిగంట వరకు పుదుచ్చేరిలో 56.83 శాతం పోలింగ్‌ నమోదు

తిరువనంతపురంలోని తొలిసారి ఓటు వేస్తున్న ఓటర్లకు అంతర్జాతీయ ప్రతినిధులు స్వీట్లు పంచారు.

మాలీవుడ్ యాక్టర్ మమ్ముట్టి, ఆయన సతీమణి సుల్ఫత్ కుట్టి కొచ్చిలోని ఒక పోలింగ్ కేంద్రంలో తమ ఓటు హక్కును వినియోగించుకున్నారు.

కేరళ అసెంబ్లీ ఎన్నికల్లో ఓటేసిన కాంగ్రెస్ ఎంపీ శశి థరూర్ మీడియాతో మాట్లాడూతూ, రాష్ట్రంలో బీజేపీ ఫ్యాక్టర్​పై కీలక వ్యాఖ్యలు చేశారు. "ఇక్కడ బీజేపీ పెద్ద ఫ్యాక్టర్ ఏం కాదు. అసెంబ్లీలో ఒక్క సీటు కూడా లేని 'సున్నా సీట్ల పార్టీ'గా బీజేపీ ఉన్న రాష్ట్రం ఇది. వారిని మిగతా పార్టీలతో సమానంగా ప్రస్తావించడమే వారికి మనం ఇచ్చే అతిపెద్ద గౌరవం అవుతుంది. ఇది అధికారంలో ఉన్న LDF ప్రభుత్వానికి, దానికి సవాలు విసురుతున్న UDF కూటమికి మధ్య జరుగుతున్న పోరు" అని తెలిపారు.

అసోం, కేరళ, పుదుచ్చేరి రాష్ట్రాల్లో పోలింగ్‌ కొనసాగుతోంది. ఉదయం 11 గంటల వరకు అసోంలో 38.92 శాతం పోలింగ్‌ నమోదు కాగా, కేరళలో 33.28 శాతం మంది ఓటేశారు. పుదుచ్చేరిలో 37.06 శాతం పోలింగ్‌ నమోదైంది.

అసోం, కేరళ, పుదుచ్చేరిలో పోలింగ్ కొనసాగుతోంది. ఉదయం 11 గంటల వరకు పోలింగ్ శాంత ఈ విధంగా నమోదయ్యాయి.

అసోం- 38.92 శాతం

కేరళ - 33.28 శాతం

పుదుచ్చేరి- 37.06 శాతం

కేరళ అసెంబ్లీ ఎన్నికల్లో యూడీఎఫ్ 100పై స్థానాల్లో విజయం సాధిస్తుందని కాంగ్రెస్ ప్రధాన కార్యదర్శి కేసీ వేణుగోపాల్ అన్నారు. సీఎం పినరయి విజయన్​పై ప్రజలు విసుగుచెందారని, మార్పును కోరుకుంటున్నారని అన్నారు. శబరిమల బంగారు దొంగతనం కేసులో దోషులను ఎల్‌డిఎఫ్ ప్రభుత్వం రక్షిస్తోందని కూడా ఆయన ఆరోపించారు .

మూడు అసెంబ్లీల ఎన్నికల్లో ఉదయం 9 గంటల నాటికి సుమారుగా నమోదైన పోలింగ్ శాతం ఇలా!

అసోం- 17.87%

కేరళ - 16.23%

పుదుచ్చేరి - 17.41%

ఇస్రో మాజీ శాస్త్రవేత్త నంబి నారాయణన్ తిరువనంతపురంలోని ఎంచక్కల్ ఎల్‌పీ స్కూల్‌లో ఓటు వేశారు.

ఓటర్ల తమ రాజ్యాంగబద్ధమైన ఓటు హక్కును వినియోగించుకోవాలని కాంగ్రెస్ జాతీయ అధ్యక్షుడు మల్లికార్జున ఖర్గే కోరారు. ప్రజల మాట వినే, హామీలను నెరవేర్చే ప్రభుత్వాన్నికి పెద్ద సంఖ్యలో వచ్చి ఓటు వేయాలని విజ్ఞప్తి చేశారు. ముఖ్యంగా మొదటిసారిగా ఓటు వేస్తున్న ఓటర్లు ప్రగతి కోసం ఓటు వేయాలని చెప్పారు. ఈ మేరకు మూడు వేర్వేరు ట్వీట్లు పెట్టారు.

కేరళ ప్రతిపక్ష నాయకుడు (LoP) వీడీ సతీశన్ అసెంబ్లీ ఎన్నికల్లో తన ఓటు హక్కు వినియోగించుకున్నారు. రాష్ట్రవ్యాప్తంగా ప్రజలు ప్రజాస్వామ్య ప్రక్రియలో చురుకుగా పాల్గొనాలని పిలుపునిచ్చారు. కాంగ్రెస్ నేతృత్వంలోని యునైటెడ్ డెమోక్రటిక్ ఫ్రంట్ ( యూడీఎఫ్ ) నిర్ణయాత్మక మెజారిటీతో తిరిగి అధికారంలోకి వస్తుందని ఆయన విశ్వాసం వ్యక్తం చేశారు.

కన్నూరులోని కేరళ ముఖ్యమంత్రి పినరయి విజయన్ తన ఓటు హక్కును వినియోగించుకున్నారు

పుదుచ్చేరిలో పోలింగ్ కొనసాగుతోంది. ఓటర్లు తమ ఓటు హక్కును వినియోగించుకునేందుకు పోలింగ్ కేంద్రాలను వస్తున్నారు. అయితే ఓ పోలింగ్ కేంద్రం వద్ద ఓటర్లకు రోబో స్వాగతం పలుకుతుంది.

కేరళ, అసోం, పుదుచ్చేరి అసెంబ్లీల ఎన్నికల్లో ప్రజలు పెద్ద సంఖ్యలో ఓటు హక్కును వినియోగించుకోవాలని ప్రధానమంత్రి నరేంద్ర మోదీ కోరారు. ప్రతి ఒక్కరు బయటకు వచ్చి ఓటింగ్​లో కొత్త రికార్డును నెలకొల్పాలని తెలిపారు. ప్రజస్వామ్య పండుగను బలోపేతం చేయాలని ప్రత్యేకంగా యువతకు, మహిళా ఓటర్లకు విజ్ఞప్తి చేశారు. ఈ మేరకు మూడు వేర్వేరు ట్వీట్​లు చేశారు.

అసోం, కేరళ, పుదుచ్చేరి శాసనసభ ఎన్నికల పోలింగ్ మొదలైంది. ఇప్పుడిప్పుడే ఓటర్లు పోలింగ్ కేంద్రాలకు చేరుకుంటున్నారు. కొన్ని పోలింగ్ కేంద్రాల వద్ద ఓటర్లు బారులు తీరారు.

కేరళ, పుదుచ్చేరి, అసోం అసెంబ్లీ ఎన్నికల్లో అన్ని పోలింగ్​ కేంద్రాల్లో అధికారులు మాక్​ పోలింగ్​ను నిర్వహించారు.

కేంద్రపాలిత ప్రాంతమైన పుదుచ్చేరిలో 30 స్థానాలకు పోలింగ్ జరగుతోంది. 294మంది అభ్యర్థులు బరిలో ఉన్నారు. అక్కడ 9.50 లక్షల మంది ఓటర్లు ఉన్నారు. ఇక్కడ మొత్తం 9,48,977 మంది ఓటర్లు ఉండగా, అందులో 4,45,761 మంది పురుషులు, 5,03,076 మంది మహిళలు, 140 మంది ట్రాన్స్​జెండర్లు ఉన్నారు. అయితే, ప్రధానంగా ఎన్​డీఏ- ఇండియా కూటమికి మధ్య పోటీ నెలకొంది.

కేరళలో అసెంబ్లీ ఎన్నికల పోలింగ్ ప్రారంభమైంది. మొత్తం 140అసెంబ్లీ స్థానాలు ఉండగా 883 మంది అభ్యర్థులు పోటీలో ఉన్నారు. మొత్తం 2.71కోట్ల మంది ఓటర్లు ఉండగా 30, 495 పోలింగ్ కేంద్రాలను ఏర్పాటు చేశారు. ఇందులో 1.32 కోట్ల మంది పురుషులు, 1.39 కోట్ల మంది మహిళలు, 273 మంది ట్రాన్స్‌జెండర్లు ఉన్నారు. అటు దాదాపు 2.42 లక్షల మందికి పైగా విదేశీ ఓటర్లు ఉన్నారు. కాగా, ఈ ఎన్నికల్లో ప్రధానంగా ఎల్​డీఎఫ్, యూడీఎఫ్, ఎన్​డీఏ కూటముల మధ్య పోటీ నెలకొంది.

అసోంలోని 126అసెంబ్లీ స్థానాలు ఉండగా, 31,490 పోలింగ్ కేంద్రాల్లో ఓటింగ్ జరుగుతోంది. 722మంది అభ్యర్థుల భవితవ్యాన్ని 2.9కోట్ల మంది ఓటర్లు తేల్చనున్నారు. మొత్తం అభ్యర్థుల్లో కేవలం 59 మంది మాత్రమే మహిళలు ఉండటం గమనార్హం. కాంగ్రెస్ పార్టీ అత్యధికంగా 99 స్థానాల్లో, బీజేపీ 90 స్థానాల్లో అభ్యర్థులను నిలబెట్టాయి. ఈ ఎన్నికల్లో మొత్తం 2.5 కోట్ల మంది ఓటర్లు తమ ఓటు హక్కును వినియోగించుకోనున్నారు. వారిలో 1.25 కోట్ల మంది మహిళలు ఉన్నారు. 6.42 లక్షల మంది తొలిసారి ఓటు వేయనున్నారు.