'యాంటీబయాటిక్స్, యాంటీవైరల్ మందులతో సొంతంగా వైద్యం చేసుకోవద్దు'- స్వైన్ ఫ్లూ వ్యాప్తిపై IMA కీలక సూచన

IMA Issues H1N1 Advisory : వర్షాకాలంలో ఇన్ఫ్లుయెంజా ఎ (H1N1) లేదా స్వైన్ ఫ్లూ వ్యాప్తి చెందుతున్న నేపథ్యంలో ఇండియన్ మెడికల్ అసోసియేషన్ (IMA) బుధవారం కీలక అడ్వైజరీని జారీ చేసింది. యాంటీబయాటిక్స్, యాంటీవైరల్ మందులతో సొంతంగా వైద్యం చేసుకోవద్దని సూచించింది. తీవ్రమైన లక్షణాలు కనిపిస్తే వెంటనే వైద్య సహాయం తీసుకోవాలని ప్రజలను కోరింది. భారతదేశంలో H1N1 కేసులు క్రమంగా పెరుగుతున్నాయని, దిల్లీ వంటి మహానగరాల్లో 1,770కి పైగా కేసులు నమోదయ్యాయని చెప్పింది. మహారాష్ట్ర, కర్ణాటక, బంగాల్‌లో కూడా కేసులు నమోదయ్యాయని IMA తెలిపింది. వ్యాప్తిలో ఉన్న వైరస్ ఇన్ఫ్లుయెంజా ఎ (H1N1) గానే ఉందని, ఎటువంటి కొత్త జన్యు మార్పులు లేవని ఇండియన్ కౌన్సిల్ ఆఫ్ మెడికల్ రీసెర్చ్ (ICMR) పర్యవేక్షణలో నిర్ధరణ అయినట్లు అడ్వైజరీలో పేర్కొంది. చాలా వరకు H1N1 ఇన్ఫెక్షన్లు తేలికపాటివని, వాటంతట అవే తగ్గిపోతాయని వివరించింది.

"వర్షాకాలంలో భారతదేశంలో ఇన్ఫ్లుయెంజా ఎ (H1N1) / స్వైన్ ఫ్లూ కేసులు క్రమంగా పెరుగుతున్నాయి. మరింత అప్రమత్తత అవసరమైనప్పటికీ, భయపడాల్సిన అవసరం లేదు. H1N1 సాధారణంగా ఆకస్మికంగా అధిక జ్వరం, చలి, తగ్గని పొడి దగ్గు, గొంతు నొప్పి, తీవ్రమైన కండరాల నొప్పులు, అలసట, తలనొప్పి, ముక్కు కారడం లేదా ముక్కు దిబ్బడ, పిల్లల్లో ఎక్కువగా వికారం, వాంతులు లేదా నీళ్ల విరేచనాలతో కనిపిస్తుంది. ఇన్ఫ్లుయెంజా ఎ (H1N1) ఒక వైరల్ వ్యాధి. యాంటీబయాటిక్స్ వైరస్‌లను చంపలేవు. ఫ్లూ లక్షణాలు ఉంటే అజిత్రోమైసిన్, అమోక్సిసిలిన్-క్లావులనేట్, సెఫిక్సిమ్ లేదా ఇతర యాంటీబయాటిక్స్ తీసుకోవద్దు. వైరల్ వ్యాప్తి సమయంలో విచక్షణారహితంగా యాంటీబయాటిక్స్ వాడటం రక్షణ కవచాలను నాశనం చేస్తుంది. మైక్రోబయోమ్ ఫ్లోరా ప్రాణాంతక యాంటీమైక్రోబయల్ రెసిస్టెన్స్ (AMR)కు ఆజ్యం పోస్తుంది" అని IMA హెచ్చరించింది.

క్లినికల్, పరీక్షల ఫలితాల ఆధారంగా అర్హత కలిగిన వైద్యుడు సెకండరీ బాక్టీరియల్ ఇన్ఫెక్షన్‌ను నిర్ధరించినప్పుడు మాత్రమే యాంటీబయాటిక్స్ వాడాలని IMA స్పష్టం చేసింది. యాంటీవైరల్ మందుల విషయానికి వస్తే, ఓసెల్టామివిర్ అనేది ప్రిస్క్రిప్షన్‌తో మాత్రమే లభించే మందు అని, వైద్యులు సూచనలతో మాత్రమే దీనిని వాడాలని పేర్కొంది. టీవైరల్ మందులను సొంతంగా తీసుకోవద్దని అని IMA తెలిపింది. ఈ క్రమంలోనే తక్షణమే అత్యవసర వైద్య సహాయం తీసుకోవాల్సిన వైరస్ లక్షణాలను వివరించింది.

• శ్వాస తీసుకోవడంలో ఇబ్బంది
• ఆయాసం లేదా వేగంగా శ్వాస తీసుకోవడం
• ఛాతీ నొప్పి లేదా నిరంతర ఒత్తిడి
• పెదవులు లేదా వేళ్లు నీలి రంగులోకి మారడం
• రక్తంతో కూడిన దగ్గు
• మగత, గందరగోళం
• తీవ్రమైన నిద్రమత్తు లేదా మూర్ఛలు
• నిరంతర వాంతులు
• నోటి ద్వారా ద్రవాలను తీసుకోలేకపోవడం
• పిల్లలలో ఆహారం తీసుకోలేకపోవడం
• నీరసం, గురక లేదా తీవ్రమైన ఛాతీ కుచించుకుపోవడం

ఈ జాగ్రత్తలు పాటించాలి : ఐఎంఏ
కనీసం 20 సెకన్ల పాటు సబ్బు నీటితో తరచుగా చేతులు కడుక్కోవడం వంటి నివారణ చర్యలను పాటించాలని IMA ప్రజలకు సూచించింది. ఆల్కహాల్ ఆధారిత హ్యాండ్ శానిటైజర్‌ను ఉపయోగించాలని తెలిపింది. దగ్గినప్పుడు లేదా తుమ్మినప్పుడు నోరు, ముక్కును టిష్యూతో లేదా మోచేతితో కప్పుకోవాలని చెప్పింది. రద్దీగా, మూసి ఉన్న ప్రదేశాల్లో సరిగ్గా సరిపోయే మాస్క్ ధరించాలని కూడా సలహా ఇచ్చింది.

"జబ్బుపడినప్పుడు ఇంట్లోనే ఉండండి. జ్వరం వచ్చిన తర్వాత కనీసం 24 గంటల పాటు పాఠశాలలు, కార్యాలయాలు, సామాజిక సమావేశాలకు దూరంగా ఉండండి. జ్వరం తగ్గించే మందులు లేకుండానే నయమవుతుంది" అని ఆ సలహాలో పేర్కొన్నారు. ఆరోగ్య సంరక్షణ సిబ్బంది, గర్భిణీలు, వృద్ధులు, దీర్ఘకాలిక అనారోగ్య సమస్యలు ఉన్నవారు ప్రతి సంవత్సరం సీజనల్ ఇన్ఫ్లుయెంజా టీకా వేయించుకోవాలని ఐఎంఏ స్పష్టం చేసింది. సీజనల్ కేసుల పెరుగుదల నేపథ్యంలో అనవసరమైన మందులు, భయాందోళనలకు దూరంగా ఉంటూ అప్రమత్తంగా ఉండాలని ప్రజలను కోరింది.

రైల్వే ట్రాక్‌పై రీల్స్‌- రైలు ఢీకొట్టడంతో రెండు చేతులు కోల్పోయిన యువతి

17 నెలల చిన్నారి అవయవదానం- మరో ముగ్గురు పిల్లలకు పునర్జన్మ- పుట్టెడు దుఃఖంలోనూ తల్లిదండ్రుల గొప్ప నిర్ణయం!