విశాఖలో ఘనంగా మార్వాడీల 'కావడి యాత్ర' - Marwadis Organized Kavadi Yatra

Marwadis Organized Kavadi Yatra in Vishaka : ఏటా పవిత్ర శ్రావణమాసంలో వచ్చే మొదటి ఆదివారం మార్వాడీలకు ఎంతో ప్రత్యేకత. ఆ రోజు కావడి శోభాయాత్ర చేయడం అనవాయితీ. ఉత్తర భారతదేశం తరహాలోనే విశాఖలో ఘనంగా ఈ కావడి యాత్రను ఏటా నిర్వహిస్తారు. తెల్ల తెల్లవారుతుండగానే కాషాయ వస్త్రాలు ధరించి.. హర హర శంభో శంకర అంటూ యాత్ర చేపడతారు. కొండల నుంచి జాలువాడిన జల ధార నుంచి నీటిని పట్టుకొని వాటిని కావడి మోస్తారు. కిలోమీటర్ల మేర నడిచి ఆ గంగాజలంతో పరమశివుడికి అభిషేకం చేస్తారు. 

విశాఖలో ఈరోజు మార్వాడి మంచ్ ఆధ్వర్యంలో కావడి యాత్రని ఘనంగా నిర్వహించారు. ఈ కావడి యాత్రలో దాదాపు 3 వేల మంది భక్తులు పాల్గొన్నారు. ఏటా శ్రావణమాసంలో మాధవధారలోని శివాలయం నుంచి సహజ సిద్ధ నీటిని కుండల్లో నింపి తీసుకెళ్తారు. కావడితో మురళినగర్, తాడిచెట్లపాలెం, సిరిపురం మీదుగా వెళ్లి బీచ్​లో ఉన్న శివాలయంలో అభిషేకం చేస్తారు. దీంతో కావడి యాత్ర పూర్తి అవుతుంది. ఈ యాత్రలో మహిళలు, పిల్లలు, వృద్ధులు అన్న తేడా లేకుండా అందరూ పాల్కొంటారు. కావడి చేతబట్టిన దగ్గర నుంచి కింద పెట్టకుండా ఈ యాత్ర మొత్తం పూర్తి చేస్తారు. ప్రతి ఒక్కరూ పాదరక్షలు లేకుండా కాషాయ వస్తాలు ధరించి కావడి యాత్రలో పాల్గొంటారు. శ్రావణమాసంలో ఈ కావడి యాత్ర చేస్తే పరమశివుని అనుగ్రహం కలుగుతుందని భక్తులు నమ్ముతారు.