సీఎం రేవంత్​ను ఎవరైనా ఏమైనా అంటే నాలుక కోస్తాం : జగ్గారెడ్డి స్ట్రాంగ్​ కౌంటర్​​ - Jaggareddy Fires On BRS

Congress Jagga Reddy Fires On BRS : కాంగ్రెస్​ ప్రభుత్వం, సీఎం రేవంత్​ రెడ్డిపై ప్రతిపక్షాలు చేస్తున్న విమర్శలను కాంగ్రెస్​ వర్కింగ్ ప్రెసిడెంట్​ జగ్గారెడ్డి తిప్పికొట్టారు. సీఎం రేవంత్​ రెడ్డిని ఎవరైనా ఏమైనా అంటే నాలుక కోస్తామని తీవ్రంగా హెచ్చరించారు. గాంధీభవన్​లో ఏర్పాటు చేసిన మీడియా సమావేశంలో మాట్లాడిన ఆయన బీఆర్ఎస్​పై నిప్పులు చెరిగారు. 

రాజకీయంగా ప్రత్యర్థిని కత్తితో పొడవటానికి వస్తే ఎవరూ ఊరుకోరని తిరిగి ఎదురు దాడి చేస్తారని అదే రాజనీతి అని కాంగ్రెస్ వర్కింగ్ ప్రెసిడెంట్ జగ్గారెడ్డి అన్నారు. కేసీఆర్, రేవంత్​ను పొడవడానికి వస్తే చూస్తూ ఊరుకుని ఉండాలా ప్రశ్నించారు. ప్రభుత్వాన్ని కాపాడుకోవాల్సిన బాధ్యత రేవంత్‌ రెడ్డికే ఉంటుందని పేర్కొన్నారు. ఆయనను ఎవరైనా ఏమైనా అంటే నాలుక కోస్తామని తీవ్రంగా హెచ్చరించారు. హరీశ్​రావుకు మతిభ్రమించిందని జగ్గారెడ్డి ఆరోపించారు. బీఆర్ఎస్​ నేతలకు అధికారం పోయేసరికి నిద్రపట్టడంలేదన్నారు. కల్లు తాగిన కోతి మాదిరిగా బీఆర్ఎస్​ నాయకుల పద్ధతి ఉందని విమర్శించారు. ఫిరాయింపులకు ఆజ్యం పోసిందే కేసీఆర్​ అని తెలిపారు. సీఎల్పీల విలీనం కూడా కేసీఆర్​నే తెచ్చారన్నారు.