Perplexity AI iOS Voice Assistant: పర్‌ప్లెక్సిటీ AI ఐఫోన్ల కోసం సరికొత్త వాయిస్ అసిస్టెంట్ను ప్రారంభించింది. ఇది వినియోగదారులకు రిజర్వేషన్‌లు, ఇమెయిల్‌లు, మీడియా ప్లేతో పాటు రైడ్ బుకింగ్ వంటి పనుల్లో సహాయపడుతుంది. ఈ సందర్భంగా దీనిపై మరిన్ని వివరాలు తెలుసుకుందాం రండి.
పర్‌ప్లెక్సిటీ iOS వాయిస్ అసిస్టెంట్: పర్‌ప్లెక్సిటీ AI ఐఫోన్ల కోసం 'పర్‌ప్లెక్సిటీ iOS వాయిస్ అసిస్టెంట్' అనే AI-ఆధారిత వాయిస్ అసిస్టెంట్ను విడుదల చేసింది. ఇది పర్‌ప్లెక్సిటీ యాప్ లోపల వచ్చే కొత్త వాయిస్ అసిస్టెంట్. పర్‌ప్లెక్సిటీ యాప్ ఇప్పటికే యాపిల్ యాప్ స్టోర్‌లో అందుబాటులో ఉంది. ఈ వాయిస్ అసిస్టెంట్ను జనవరి 2025లో ఆండ్రాయిడ్ డివైజ్ల కోసం ప్రవేశపెట్టారు. ఇప్పుడు దాదాపు మూడు నెలల తర్వాత దీన్ని iOS పరికరాల కోసం కూడా ప్రారంభించారు.
దీనిపై పర్‌ప్లెక్సిటీ AI తన సోషల్ మీడియా ప్లాట్ఫారమ్ 'X'లో ఒక వీడియోను షేర్ చేసింది. దీని ప్రకారం.. ఇది ఐఫోన్‌లకు కొత్త వాయిస్ అసిస్టెంట్‌గా పనిచేస్తుంది. ఇది వెబ్ బ్రౌజింగ్, మల్టి-యాప్ యాక్షన్ల ద్వారా వివిధ రకాల పనులను నిర్వహిస్తుంది. అంటే రిజర్వేషన్లను బుకింగ్ చేయడం, ఇమెయిల్‌లను పంపడం, క్యాలెండర్ ఇన్వైట్స్ పంపడం, పర్‌ప్లెక్సిటీ iOS యాప్ నుంచి మీడియా ఫైల్‌లను ప్లే చేయడం వంటి పనుల్లో ఇది సహాయపడుతుంది.
కొత్త వాయిస్ అసిస్టెంట్ ప్రయోజనాలు: పైన పేర్కొన్నవాటితో పాటు ఈ యాప్ ఐఫోన్‌లో పాడ్‌కాస్ట్‌లు, యూట్యూబ్ వీడియోలు, ఇతర మీడియా కంటెంట్‌ను సెర్చ్ చేసి ప్లే చేయగలదని ఈ AI కంపెనీ మరొక పోస్ట్‌లో తెలిపింది. ఇది కాకుండా పర్‌ప్లెక్సిటీ iOS వాయిస్ అసిస్టెంట్ ద్వారా ఐఫోన్‌లో వివరాలను సెర్చ్ చేయడం, ఇమెయిల్‌లను డ్రాఫ్ట్ చేయడం, ఉబర్ వంటి క్యాబ్ సర్వీసులో రైడ్‌ను బుక్ చేయడం వంటివి సులభంగా చేసుకోవచ్చు. అయితే యాపిల్ ఇంటెలిజెన్స్ ఆధారిత వాయిస్ అసిస్టెంట్ అయిన సిరిలో ఈ ఫీచర్లు అందుబాటులో ఉన్నప్పటికీ రెస్టారెంట్లలో రిజర్వేషన్లను బుక్ చేసుకోవడం వంటి కొన్ని ఫీచర్లు ఇంకా సిరిలో అందుబాటులో లేవు.
iOS యాప్‌లలో పర్‌ప్లెక్సిటీని ఎలా ఉపయోగించాలి?:
- ఇందుకోసం ముందుగా మీ iPhoneలో Perplexity యాప్ను ఓపెన్ చేయండి.
- ఇన్‌పుట్ బాక్స్‌లోని వాయిస్ ఐకాన్‌పై ట్యాప్ చేయండి.
- ఇప్పుడు మీకు కావాల్సిన వాటి గురించి వివరాలను ఈ వాయిస్ అసిస్టెంట్ను అడగొచ్చు.
యాక్షన్ బటన్‌ను ఉపయోగించాలా?:
- దీని కోసం మీ ఫోన్‌లో 'సెట్టింగ్స్' యాప్ను ఓపెన్ చేయండి.
- కిందికి స్క్రోల్ చేసి 'యాక్షన్ బటన్'పై ట్యాప్ చేయండి.
- తర్వాత అక్కడ అందుబాటులో ఉన్న ఆప్షన్ల నుంచి షార్ట్కట్ ఆప్షన్లను ఎంచుకోండి.
- ఇప్పుడు అందుబాటులో ఉన్న యాప్స్ లిస్ట్ నుంచి పర్‌ప్లెక్సిటీ యాప్ను సెలెక్ట్ చేసుకోండి.
- అనంతరం స్టార్ట్ వాయిస్ కాన్వర్జేషన్ ఆప్షన్ను ఎంచుకోండి.
అంతే ఇలా సింపుల్గా పర్‌ప్లెక్సిటీ AI సెట్టింగ్‌లను యాక్షన్ బటన్‌కు సెట్ చేసుకోవచ్చు. తర్వాత ఐఫోన్ యూజర్లు తమ ఫోన్‌లోని యాక్షన్ బటన్పై క్లిక్ చేయడం ద్వారా పర్‌ప్లెక్సిటీ iOS వాయిస్ అసిస్టెంట్ను సులభంగా ఉపయోగించవచ్చు.
ఇక అమెరికాలో అన్నీ మన ఐఫోన్లే!- భారత్లోనే మొత్తం తయారీ.. యాపిల్ స్కెచ్ మామూలుగా లేదుగా!
BMW నుంచి హై-టెక్ టూరింగ్ బైక్- దీని పవర్‌ ముందు కారు కూడా బలాదూర్‌!
