Billions Of Login Credentials Leaked : ప్రస్తుతం డిజిటల్ యుగంలో టెక్నాలజీ వల్ల లాభాలే కాకుండా నష్టాలు కూడా ఉన్నాయి. టెక్నాలజీను ఉపయోగించుకొని సైబర్ నేరగాళ్లు కొత్త కొత్త పంథాల్లో ప్రజలను దోచుకుంటున్నారు. దీంతో ఆన్లైన్‌ మోసాలు ప్రపంచవ్యాప్తంగా ఒక తీవ్రమైన సమస్యగా మారిపోయాయి. పలు ప్రముఖ సంస్థల డేటాలను కూడా సైబర్ నేరగాళ్లు కొల్లగొట్టేస్తున్నారు. తాజాగా గూగుల్, ఫేస్బుక్, యాపిల్ యూజర్లకు చెందిన బిలియన్ల కొద్దీ లాగిన్ పాస్వర్డ్లు లీక్ అయ్యాయని సైబర్ న్యూస్ పరిశోధకులు తేల్చారు. అందువల్ల సైబర్ నేరగాళ్లు ప్రతిరోజూ యూజర్స్ ఉపయోగించే ఖాతాలను యాక్సెస్ చేయగలరని వాళ్లు చెబుతున్నారు.
సైబర్ న్యూస్ నివేదిక ప్రకారం
సైబర్ న్యూస్ పరిశోధకులు మొత్తం 30 డేటా సెట్లను కనుగొన్నారు. వీటిలో ప్రతి ఒక్కటి అపారమైన లాగిన్ సమాచారాన్ని కలిగి ఉంది. ఇందులో గూగుల్, ఫేస్బుక్, యాపిల్ సహా అనేక ప్రసిద్ధ ప్లాట్‌ ఫారమ్లు ఉపయోగిస్తున్న 16 బిలియన్ల (1600 కోట్లు) యూజర్స్ పాస్వర్డ్లు ఉన్నాయని పరిశోధకులు చెప్పారు. సోషల్ మీడియా, వీపీఎన్‌ లాగిన్లతో పాటు వివిధ కార్పొరేట్‌ డెవలపర్‌ ప్లాట్‌ ఫారమ్లను కలిగి ఉన్న సంస్థలకు చెందిన ఖాతాలలో లాగిన్ అయిన అన్ని ఖాతాల వివరాలు వీటిలో రికార్డ్‌ అవుతున్నట్లు పేర్కొన్నారు.
జనాభా కంటే డబుల్ పాస్వర్డ్స్ లీక్
16 బిలియన్ ఖాతాల పాస్వర్డ్లు లీక్ - అంటే నేడు భూమిపై ఉన్న ప్రజల సంఖ్యకు ఇది రెట్టింపు. వినియోగదారులకు చెందిన ఒకటి కంటే ఎక్కువ ఖాతాల పాస్వర్డ్లు లీక్ అయి ఉండవచ్చని భావిస్తున్నారు. ఇందులో కొన్ని నకిలీ ఖాతాలు కూడా ఉండొచ్చని, అందుకే ఎంత మంది వ్యక్తుల ఖాతాల పాస్వర్డ్లు బహిర్గతమయ్యాయో చెప్పడం సాధ్యం కాదని సైబర్ న్యూస్ పరిశోధకులు పేర్కొన్నారు.
ఇన్ఫోస్టీలర్ల సాయంతో
ఇన్ఫోస్టీలర్లు ద్వారా యూజర్స్ పాస్వర్డ్లను సైబర్ మోసగాళ్లు కొల్లగొట్టారని సైబర్ న్యూస్ పేర్కొంది. ఇన్ఫోస్టీలర్ అనేది ఒక రకమైన హానికరమైన సాఫ్ట్వేర్. ఇది సున్నితమైన సమాచారాన్ని కొల్లగొట్టేందుకు బాధితుడి డివైజ్ లేదా సిస్టమ్లోకి ప్రవేశిస్తుంది. అయితే ఈ లీకైన పాస్వర్డ్స్ గురించి చాలా ప్రశ్నలు ఉత్పన్నమవుతున్నాయి. ఈ లాగిన్ డీటైల్స్ ఎవరి చేతుల్లో ఉన్నాయో అని యూజర్స్ ఆందోళన చెందుతున్నారు.
మీ అకౌంట్ సేఫ్గా ఉండాలా?
ఇటీవలి డేటా ఉల్లంఘనలో మీ ఖాతా డేటా బహిర్గతమయ్యే అవకాశం ఉందని మీరు ఆందోళన చెందుతున్నారా? అయితే జర జాగ్రత్త. తొలుత మీ సోషల్ మీడియా అకౌంట్ల పాస్వర్డ్లను మార్చేయండి. మీ ఖాతాలు అన్నింటికి ఒకే పాస్వర్డ్ను పెట్టొద్దు. ఎక్కువ పాస్వర్డ్లను గుర్తుంచుకోవడం మీకు చాలా కష్టంగా అనిపిస్తే పాస్వర్డ్ మేనేజర్ని ఉపయోగించండి. మల్టీఫ్యాక్టర్ అథంటికేషన్ను ఎనేబుల్ చేసుకోండి. ఇది మీ ఫోన్, ఈ-మెయిల్, యూఎస్బీ ప్రామాణీకరణకు రెండో పొరగా ఉపయోగపడుతుంది. మీ ఖాతా సురక్షితంగా ఉంటుంది!
సైబర్ నేరాల ఫిర్యాదుకు కొత్త పోర్టల్ - ఇకనుంచి ఏ నిమిషంలోనైనా కంప్లైంట్ చేయొచ్చు
సైబర్ సెక్యూరిటీ నిపుణులకు ఫుల్ గిరాకీ- ఈ స్కిల్స్ నేర్చుకుంటే జాబ్ పక్కా..!
