ఎయిర్​టెల్ యూజర్లకు గుడ్​న్యూస్- స్పామ్ డిటెక్షన్ టూల్​లో మరో రెండు ఫీచర్లు- ఇవి ఎలా ఉపయోగపడతాయంటే?

స్పామ్ కాల్స్, మెసెజ్​లతో విసుగెత్తిపోయారా?- ఎయిర్​టెల్ కొత్త టెక్నాలిజీతో ఇక నో వర్రీ!- స్పామ్ డిటెక్షన్ టూల్​లో మరో రెండు ఫీచర్లు వచ్చాయిగా!

Airtel Spam Alert: భారతదేశపు అతిపెద్ద, ప్రసిద్ధ టెలికాం కంపెనీలలో ఒకటైన భారతీ ఎయిర్‌టెల్ కొన్ని రోజుల క్రితం AI ఆధారిత స్పామ్ డిటెక్షన్ టూల్‌ను ప్రారంభించింది. ఎయిర్‌టెల్ తీసుకొచ్చిన ఈ సిస్టమ్ ఇప్పటివరకు 27.5 బిలియన్లకు పైగా కాల్స్​ను స్పామ్‌గా గుర్తించి వినియోగదారులను అప్రమత్తం చేసింది. ఈ క్రమంలో ఎయిర్‌టెల్ ఇప్పుడు తన స్పామ్ డిటెక్షన్ అండ్​ అలర్ట్ సిస్టమ్​లో మరో రెండు ప్రత్యేక ఫీచర్లను జోడించినట్లు ప్రకటించింది. ఇవి యూజర్లు స్పామ్ కాల్స్​కు దూరంగా ఉంచడంలో సహాయపడతాయి.

ఎయిర్‌టెల్ కొత్తగా తీసుకొచ్చిన ఈ రెండింటిలో ఒక ఫీచర్ సహాయంతో యూజర్లకు ఇకపై విదేశీ నెట్​వర్క్​ల స్పామ్ కాల్స్, మెసెజ్​ల నుంచి దూరంగా ఉంచేందుకు అలర్ట్స్​ వస్తాయని సోమవారం ప్రకటించింది. మరో ఫీచర్​ ద్వారా ఈ అలెర్ట్స్ భారతదేశంలోని 10 ప్రాంతీయ భాషల్లో యూజర్​కు రియల్​టైమ్​లో డివైజ్ డిస్​ప్లే పై కన్పించనున్నాయి. వీటిలో హిందీ, మరాఠీ, బెంగాలీ, గుజరాతీ, తమిళం, కన్నడ, మలయాళం, తెలుగు, పంజాబీ, ఉర్దూ వంటి పది భారతీయ భాషలు ఉన్నాయి. రాబోయే కాలంలో మరిన్ని భారతీయ భాషలను దీనికి జోడించనున్నట్లు కంపెనీ తెలిపింది.

కాగా ఇంతకుముందు కూడా ఎయిర్​టెల్ AI ఆధారిత స్పామ్ కాల్ డిటెక్షన్ టూల్ సహాయంతో యూజర్లకు స్పామ్ కాల్స్ అలెర్ట్స్ వచ్చేవి. అయితే అది కేవలం డొమెస్టిక్ స్పామ్ కాల్స్ నుంచి మాత్రమే అప్రమత్తం చేసేంది. అది కూడా కేవలం ఒక భారతీయ భాష హిందీతో పాటు ఇంగ్లీషులో అలెర్ట్స్​ను ఈ టూల్ పంపించేది.

విదేశీ నెట్‌వర్క్‌ల నుంచి వచ్చే ఫేక్ కాల్స్​ గుర్తింపు: ఎయిర్‌టెల్ ఈ AI ఆధారిత స్పామ్ కాల్ డిటెక్షన్ టూల్ ఇప్పుడు విదేశీ నెట్‌వర్క్‌ల నుంచి వచ్చే నకిలీ కాల్స్, మెసెజ్​లను గుర్తించి రియల్​ టైమ్​లో మిమ్మల్ని అప్రమత్తం చేస్తుంది. భారతదేశంలో ఎయిర్‌టెల్ స్పామ్ కాల్స్​ను బ్లాక్ చేయడం ప్రారంభించినప్పటి నుంచి స్పామర్లు విదేశీ నెట్‌వర్క్‌లను ఆశ్రయించారని కంపెనీ తన పత్రికా ప్రకటన ద్వారా తెలియజేసింది. గత 6 నెలల్లో ఇటువంటి స్పామ్ కాల్స్‌లో 12% పెరుగుదల ఉంది. ఈ కారణంగా కంపెనీ ఇప్పుడు తన AI సిస్టమ్​ ద్వారా విదేశీ నెట్‌వర్క్‌ల నుంచి వచ్చే నకిలీ కాల్స్​ను గుర్తించేందుకు కొత్త ఫీచర్‌ను ప్రారంభించింది.

Airtel has expanded its spam protection tool with two new features (Photo Credit- Airtel)

ఇది ఎలా పనిచేస్తుంది?: ఎయిర్‌టెల్ తీసుకొచ్చిన ఈ AI టూల్ కాల్స్, మెసెజ్​లను స్కాన్ చేస్తుంది. అవి గనక స్పామ్‌గా అనిపిస్తే ఈ టూల్​ వెంటనే వినియోగదారులకు అలెర్ట్​లను పంపిస్తుంది. అది కూడా రియల్​ టైమ్​లోనే అప్రమత్తం చేస్తుంది. అంటే ఒకవేళ మీకు నకిలీ కాల్ వస్తున్నట్లయితే అది లిఫ్ట్ చేయొద్దు అంటూ స్పామ్ అలెర్ట్​ను రియల్​ టైమ్​లోనే మీకు డిస్​ప్లేలో ప్రదర్శిస్తుంది. ఈ ప్రత్యేక ఫీచర్ ఎయిర్‌టెల్ వినియోగదారులందరికీ ఆటోమేటిక్​గా యాక్టివేట్ అవుతుంది. ఇందుకోసం యూజర్లు ఎలాంటి యాక్టివేషన్ ప్రాసెస్​ చేయాల్సిన అవసరం లేదు.

కంపెనీ ప్రస్తుతం ఈ ప్రత్యేక ఫీచర్‌ను ఆండ్రాయిడ్ స్మార్ట్‌ఫోన్‌ల యూజర్ల కోసం మాత్రమే ప్రారంభించింది. అయితే రాబోయే రోజుల్లో కంపెనీ ఈ ఫీచర్‌ను ఐఫోన్ ఉన్న ఎయిర్‌టెల్ వినియోగదారులకు కూడా ప్రారంభించే అవకాశం ఉంది. ఇందులో మరో ముఖ్యవిషయం ఏంటంటే.. ఎయిర్‌టెల్ ఈ AI- ఆధారిత స్పామ్ డిటెక్షన్ టూల్ సౌకర్యాన్ని తన యూజర్లకు పూర్తిగా ఉచితంగా అందిస్తోంది.

SMSలకు కూడా: ఎయిర్​టెల్ ఈ AI ఆధారిత స్పామ్ డిటెక్షన్ టూల్​లో తీసుకొచ్చిన కొత్త ఫీచర్​.. విదేశీ నెట్​వర్క్​ల SMS ద్వారా వచ్చిన హానికరమైన లింక్​ల విషయంలో కూడా వినియోగదారులను అప్రమత్తం చేస్తుంది. ఇందుకోసం బ్లాక్​ లిస్ట్​లో చేర్చిన URLలు, ప్రతి SMSను సెంట్రలైజ్డ్ డేటాబేస్ రియల్ టైమ్ ప్రాతిపదికన స్కాన్ చేస్తుంది. తద్వారా అనుమానాస్పద లింక్​లను క్లిక్ చేయకుండా ఉండేలా వినియోగదారులను ఇది అప్రమత్తం చేస్తుంది.