మీరు ఉదయం, సాయంత్రం ఎండలో నిల్చోవడం లేదా? - అయితే మీరు చాలా కోల్పోతారు!

రాష్ట్రంలో పెరుగుతున్న విటమిన్ డి లోపం - అపోలో ఆసుపత్రి సర్వేలో వెల్లడి - ఈ విటమిన్ లోపంతో కండరాలు, ఎముకల ఆరోగ్యం దెబ్బతింటుందని హెచ్చరిక

Vitamin D Deficiency : ప్రస్తుతం చిన్నాపెద్దా అంతా ఆధునిక జీవితానికి అలవాటు పడిపోయారు. ఉదయం పొద్దుపోయాక లేవడం ఆ తర్వాత ఇంట్లోనే ఉంటూ మళ్లీ రాత్రికి తినేసి పడుకోవడం ఇలా ఇదే మానవుడి జీవితంలో అలవాటుగా మారిపోయింది. ఎక్కడికి వెళ్లిన బైకులు, కార్లు.. రూంలో ఉంటే ఏసీలు, అసలు వెలుతురు లేమి రూమ్​లలో ఉండటం అంటే ఎంతో ఇష్టంగా ఫీల్​ అవుతారు. అందుకే నగరవాసులను విటమిన్​ డి లోపం భయపెట్టేలా చేస్తోంది. ఈ విటమిన్​-డి లోపం ఏకంగా 82 శాతం మందిలో ఉన్నట్లు పరీక్షలో తేలింది.

సికింద్రాబాద్​, డీఆర్​డీఓ, హైదర్​గూడ, జూబ్లీహిల్స్​తో పాటు ఇతర జిల్లాల్లో కొన్ని ప్రాంతాల్లోని అపోలో ఆసుపత్రి క్లినిక్​లకు వచ్చే రోగులను పరీక్షించగా ఈ విటమిన్​ లోపంతో ఎంతో మంది బాధపడుతున్నట్లు తేలింది. ఆ వివరాలను అపోలో ఆసుపత్రి వెల్లడించింది. మొత్తం 17,321 మందికి పరీక్షలు చేయగా ఏకంగా 14,238 మందిలో విటమిన్​ డి లోపం ఉన్నట్లు గుర్తించారు. కండరాలు, ఎముకల ఆరోగ్యానికి ఇది కీలకమని నిపుణులు అంటున్నారు.

విటమిన్​-డి ఉపయోగాలు, నష్టాలు :

• సూర్యరశ్మి ద్వారా ఈ విటమిన్​ శరీరంలోకి చేరుతుంది.
• ఇళ్లు, కార్యాలయాల్లో ఏసీలకు పరిమితం కావడంతో శరీరానికి విటమిన్​ లోపిస్తోంది.
• జంక్​ఫుడ్స్​, సరైన ఆహారపు అలవాట్లు లేక విటమిన్​ శరీరానికి చేరడం లేదు.
• పిల్లల్లో రికెట్స్​ అనే వ్యాధికి, పెద్దల్లో బోలు ఎముకల వ్యాధికి, మానసిక స్థితిలో మార్పులు, కుంగుబాటు, ఇతర మానసిక రుగ్మతలకూ విటమిన్​ డి కారణం.
• ఊబకాయం, మూత్రపిండాలు, కాలేయ వ్యాధులు ఉన్నవారిలో విటమిన్​ స్థాయిలు తక్కువగా ఉంటాయి.
• బరువు తగ్గేందుకు శస్త్రచికిత్సలు చేయించుకున్న వారిలో కూడా విటమిన్​-డf లోపిస్తుంది.
• విటమిన్​ సరిపడా ఉంటే గుండె జబ్బులు, కొన్ని రకాల క్యాన్సర్లు నుంచి రక్షించడమే కాకుండా ఎముకలు, కండరాల ఆరోగ్యానికి మేలు చేస్తుంది.
• కాల్షియం, ఫాస్పేట్​ నియంత్రణలో సహాయపడుతుంది.

విటమిన్​ - డీ లోపం రాకుండా ఈ జాగ్రత్తలు తీసుకోవాలి :

• వయసు పెరిగేకొద్దీ శరీరానికి ఈ విటమిన్​ను తయారు చేసుకునే సామర్థ్యం తగ్గుతుంది. ఎక్కువగా 65 ఏళ్లు పైబడిన వారికి ఈ విటమిన్​ - డి లోపం ఉండొచ్చు. అందుకే అందరూ రోజూ కాసేపు ఎండలో గడిపితే విటమిన్​ లోపం ఉండదు.
• కాళ్లు, చేతులు పూర్తిగా వస్త్రాలతో కప్పుకోకుండా సూర్యకిరణాలు పడేలా చూసుకోవాలి. ఇలా చేస్తే విటమిన్​-డీని వేగంగా గ్రహించవచ్చు.
• విటమిన్​ లోపం ఉన్నట్లు తేలితే వైద్యుల సూచనల మేరకు ఆహారపు అలవాట్లను మార్చుకోవాలి.
• రోజుల తరబడి ఇంటికే పరిమితం కాకుండా బయటకు వెళితే మంచిది.
• పిల్లలను కూడా నిత్యం ఉదయం ఎండలో కాసేపు ఆడుకునేలా ప్రోత్సహిస్తే విటమిన్​ లోపం నుంచి బయటపడేయొచ్చు. దీంతో రోగ నిరోధక శక్తి పెరుగుతుంది.
• ఒమేగా-3 ఫ్యాట్స్​ ఉండే చేపలు, సోయాపాలు, గుడ్డు సొన, పుట్టగొడుగులు వంటి వాటిల్లో విటమిన్​ - డి కొంత వరకు ఉంటుంది. వీటిని ఆహారంతో పాటు తరచుగా తీసుకుంటే విటమిన్​ లోపం తగ్గుతుంది.