సనత్​నగర్​లో విషాదం - ముగ్గురు అనుమానాస్పద మృతి - electric shock Three people died

Three People Died due to Electric Shock : ముగ్గురు వ్యక్తులు అనుమానాస్పద స్థితిలో మృతి చెందారు. ఈ మిస్టరీ ఘటన హైదరాబాద్​లోని సనత్​నగర్​లోని ఓ అపార్ట్​మెంట్​లో జరిగింది. పోలీసులు కేసు నమోదు చేసుకొని దర్యాప్తు చేస్తున్నారు. ఇంకా పూర్తి వివరాలు తెలియాల్సి ఉంది.

Three People Died in Hyderabad : హైదరాబాద్​లోని సనత్​నగర్​ ఏరియాలోని ఓ అపార్టుమెంట్​ బాత్​రూంలో ముగ్గురు అనుమానాస్పద స్థితిలో మృతి చెందిన ఘటన కలకలం రేపింది. సనత్​నగర్​ జెక్​ కాలనీలోని ఆకృతి ప్రెసిడెన్సీ అపార్టుమెంట్​ రెండో అంతస్తులోని ఫ్లాట్​లో ఈ ముగ్గురి మృతదేహాలు ఉన్నాయి. ఈ మిస్టరీ మృతిపై సమాచారం అందుకున్న పోలీసులు ఘటనాస్థలానికి చేరుకుని పరిశీలించారు. అనంతరం అనుమానాస్పద మృతిగా కేసు నమోదు చేసుకున్నారు.

పోలీసులు తెలిపిన వివరాల ప్రకారం, సనత్​నగర్​లో జెక్​ కాలనీలోని అపార్టుమెంట్​లో ఆర్.వెంకటేశ్​(55), మాధవి(50), హరి(30) నివాసం ఉంటున్నారు. ఆదివారం ఉదయం పనిమనిషి ఇంటికి వచ్చినప్పుడు ఎవరూ కనిపించలేదు. దీంతో బాత్​రూమ్​లో ఉన్నారేమోననుకుని ఇంట్లో పనిచేసి వెళ్లిపోయింది. తిరిగి సాయంత్రం 3 గంటల సమయంలో వచ్చినప్పుడు కూడా ఇంట్లో ఎవరూ కనిపించలేదు. అనుమానం వచ్చి బాత్​రూమ్​ వైపు చూడగా డోర్​ లాక్​ చేసి ఉంది. అనుమానంతో స్థానికులకు సమాచారం అందించగా అపార్ట్​మెంట్​ వాచ్​మెన్​ డోర్​ పగులుగొట్టి చూశాడు. అప్పటికే ముగ్గురు విగతజీవులుగా పడి ఉన్నారు.

అనుమానాస్పద కేసు నమోదు : వెంటనే అపార్ట్​మెంట్​ నిర్వాహకులు పోలీసులకు సమాచారం అందించారు. ఘటనాస్థలికి చేరుకున్న పోలీసులు మృతదేహాలను పరిశీలించారు. తొలుత విద్యుదాఘాతంతో మృతి చెందినట్లు పోలీసులు భావించారు. కానీ అలాంటి ఆనవాళ్లు ఏవీ లేకపోవడంతో అనుమానాస్పద మృతిగా కేసు నమోదు చేశారు. అనంతరం క్లూస్​ టీమ్​ సాయంతో ఆధారాలు సేకరించారు. పోస్టుమార్టం నిమిత్తం మృతదేహాలను ఉస్మానియా ఆసుపత్రికి తరలించినట్లు పోలీసులు వివరించారు. ఒకే కుటుంబంలో ముగ్గురు అనుమానాస్పదంగా మృతి చెందడంతో అపార్ట్​మెంట్​ వాసులు, స్థానికంగా విషాదఛాయలు అలముకున్నాయి.