తెలంగాణలో టూరిస్ట్​ పోలీసులు - పర్యాటక ప్రాంతాల్లో ఇక ఫుల్​ సేఫ్టీ

Tourism Police Protect to Tourists : మనకు కేవలం సివిల్​, ఏఆర్​, ఎస్ఏఆర్, టీఎస్ఎస్పీ, అగ్నిమాపక శాఖ, ఎస్​పీఎఫ్​ పోలీసులు మాత్రమే తెలుసు. కానీ టూరిస్టు పోలీసింగ్​ గురించి మీకు తెలుసా? పుణ్యక్షేత్రాలు, పర్యాటక స్థలాల్లో ప్రజలకు సహకరించేందుకు, రక్షణ కల్పించేందుకు వీళ్లు ఉన్నారని మీకు తెలుసా? అయితే ఆ ప్రాంతాల్లో ఎక్కడా కనిపించడం లేదని అనుకుంటున్నారా? రాష్ట్ర ప్రభుత్వం కొత్తగా ఈ టూరిస్టు పోలీసింగ్​ విధానాన్ని తీసుకువచ్చింది.

పోలీసు శాఖలో శిక్షణ పొంది ఉద్యోగం చేస్తున్న కొందరికి పర్యాటక ప్రాంతాలపై ప్రత్యేక శిక్షణ ఇచ్చి సందర్శన ప్రదేశాల్లో గైడ్స్​గా నియమిస్తున్నారు. ఈ ప్రక్రియ ఇప్పటికే హైదరాబాద్​లో ప్రారంభమైంది. అక్కడ కొంతమంది సిబ్బందికి శిక్షణ ఇవ్వగా, సోమవారం వారంతా విధులకు హాజరయ్యారు. ఈ పోలీసింగ్​ వల్ల పర్యాటకులు, భక్తులకు ఎంతో మేలు జరగనుంది. ఆ ప్రాంతాల నుంచి ముందుగానే తెలుసుకోవడానికి వీలుంటుంది. అలాగే వాటి చరిత్రను కూలంకుశంగా తెలుసుకొని, పర్యాటకులకు ఎలాంటి ఇబ్బందులు లేకుండా ఈ టూరిస్టు పోలీసులు చూసుకుంటారు.

ముఖ్యంగా ఉమ్మడి వరంగల్​ జిల్లాలో పర్యాటక స్థలాలు, ఆధ్యాత్మిక కేంద్రాలు ఎక్కువగా ఉన్నాయి. ఇందులో భాగంగా ఉమ్మడి జిల్లాలో పోలీసు శాఖలో పని చేస్తున్న సుమారు 20-30 మంది కానిస్టేబుల్స్​కు టూరిస్టు గైడ్​ కోసం శిక్షణ ఇచ్చేందుకు ప్రణాళికలను తయారు చేస్తున్నారు. ఇక్కడ ఎంపికైన వారికి హైదరాబాద్​లో శిక్షణ ఇవ్వనున్నారు.

ఎంపిక విధానం ఇలా : ప్రస్తుతం పోలీసుశాఖలో ఇంజినీరింగ్​, డిగ్రీ పూర్తి చేసిన వారు, మేనేజ్​మెంట్​ చేసిన వారు ఉద్యోగాల్లోకి వస్తున్నారు. వీరిలో తెలుగు, ఇంగ్లీష్​, హిందీ భాషలపై పట్టున్న వారిని గుర్తించి వారిని ఎంపిక చేస్తున్నారు. అనంతరం టూరిజం విభాగం ఆధ్వర్యంలో పలు పుణ్యక్షేత్రాలు, పర్యాటక ప్రదేశాల గురించి వారికి వివరిస్తారు. ఇలా ఉమ్మడి వరంగల్​లో రామప్ప, లక్నవరం, వేయిస్తంభాల గుడి, ఖిలా వరంగల్​, బొగత జలపాతం, ఇలా మరెన్నో ప్రదేశాలు ఉన్నాయి. ఇక్కడ గైడ్స్​ కూడా లేరు. అతి త్వరలో ఎంపిక చేసిన కానిస్టేబుల్స్​కు శిక్షణ ఇచ్చి నియమించుకోనున్నారు. ఈ విధానం ప్రస్తుతం హైదరాబాద్​లో మాత్రమే ఉన్నా, అంచెలంచెలుగా రాష్ట్రవ్యాప్తంగా విస్తరించనున్నారు.

80 మందికి శిక్షణ : సందర్శకుల భద్రత కోసం రాష్ట్ర ప్రభుత్వం 80 మందికి శిక్షణ ఇచ్చింది. ప్రపంచ పర్యాటక దినోత్సవం సందర్భంగా సెప్టెంబరు 27న హైదరాబాద్​లోని శిల్పారామంలో జరిగిన కార్యక్రమంలో టూరిస్టు పోలీసుల నియామకంపై రాష్ట్ర ప్రభుత్వం ప్రకటన చేసింది. ఎంపిక చేసిన 80 మంది పోలీసులకు హైదరాబాద్​ నిథమ్​లో అక్టోబరు 6-9 వరకు టూరిస్టు పోలీసుల ప్రత్యేక శిక్షణ ఇచ్చారు.

10, 11 తేదీల్లో యాదగిరిగుట్ట, గోల్కొండ కోట, భువనగిరి, లుంబినీ పార్కు, కుతుబ్​షాహి సమాధులకు ఫీల్డ్​ విజిట్​ నిర్వహించారు. శిక్షణ పూర్తి చేసుకున్న టూరిస్టు పోలీసులను రాష్ట్రంలోని ప్రముఖ పర్యాటక ప్రదేశాల్లో నియమించారు. హైదరాబాద్​లో నిత్యం వేల సంఖ్యలో దేశీయ, విదేశీ పర్యాటకుల తాకిడి ఎక్కువగా ఉంటుంది. హైదరాబాద్​లోని కొన్ని ప్రాంతాలకు పర్యాటకులు వెళ్లలేని పరిస్థితి ఉంది. అక్కడ ఆకతాయిలు వారిని వేధింపులకు గురి చేస్తున్న ఉదంతాలు చూశాం. అలాంటి ప్రాంతాల్లో ఈ టూరిస్టు పోలీసింగ్​ వ్యవస్థ ఎంతో ఉపయోగపడనుంది.

రామోజీ ఫిల్మ్​సిటీలో గ్లోబల్ టూరిజం విలేజ్‌, నైట్ సఫారీ! - రాష్ట్ర ప్రభుత్వంతో ఒప్పందం

టూరిస్ట్​ డెస్టినేషన్లుగా పల్లెటూళ్లు - అగ్రి టూరిజంతో కాలుష్యానికి దూరంగా ప్రశాంత జీవనం