Special Story on Women Safety Tips in Telugu : తెలిసిన రోడ్డే, ఏళ్లుగా తిరిగిన ప్రదేశమే అయినా చీకటి వేళ భయపెట్టగలదు. అప్పుడు అనిపిస్తుంది ఒక్కరు కనిపించినా ఆధారపడొచ్చు అని. కానీ వచ్చింది మంచి వ్యక్తి అయితే పర్లేదు. అదే మాటు వేసిన వేటగాడు అయితే? స్నేహితుడని నమ్మి అత్యాచారానికి గురైన జర్మనీ అమ్మాయి పరిస్థితే ఎదురవొచ్చు. క్యాబ్‌ డ్రైవర్ అనుకుని వెళ్లి ఏకంగా ప్రాణాలే కోల్పోయిన పుణె టీనేజర్ స్థితే పట్టొచ్చు. అలాంటి ఆపద బారిన పడొద్దంటే జాగ్రత్త పడాల్సిందే!
ఐదు నిమిషాల నడక, ఆటో కోసం వేచిచూసే బదులు నాలుగు అడుగులు వేస్తే ఆరోగ్యం కూడా. ఈ మాత్రానికి డబ్బులు ఎందుకు దండగా. నడుచుకుంటూ వెళ్తే సరిపోతుందని ఇలా వేళ కాని వేళలో నడుస్తూ వెళ్తున్నారా? అయితే ఈ సమయంలో అప్రమత్తంగా ఉండాలి. చీకటి దార్లయితే ఎంత షార్ట్‌కట్‌ అయినా వెళ్లకూడదు. వెలుతురుండే మార్గాల్లోనే వెళ్లాలి. భద్రత ఎక్కువగా ఉండే, జనాలు తిరిగే, సీసీటీవీలు, ఇళ్లు ఎక్కువగా ఉండే ప్రాంతాలైతే ఇంకా సురక్షితం. పొద్దుగూకగానే ముసుగు తన్నే రోజులా ఇవి? పననో, కాలక్షేపమనో ఏ అర్ధరాత్రో దాటితే గానీ జనం నిద్రపోరు. అలాంటి స్నేహితులను గుర్తించండి.
ఎమర్జెన్సీ కాల్ అలర్ట్ : ‘ఇలా నడుచుకుంటూ వెళ్తున్నాను. నేను వెళ్లేవరకూ గమనించు’ అంటూ లైవ్‌ లొకేషన్ షేర్ చేయండి. కాల్ చేసి ఇంటికి చేరానని చెబితేనే సురక్షితమని అనుకోవాలని చెప్పండి. వీలుంటే ఒక కోడ్‌నీ పెట్టుకుంటే మంచిది. చేతిలో పట్టేలా, సులువుగా తీసుకునేలా పెప్పర్‌ స్ప్రే, పక్కన బటన్‌ని నొక్కి వదిలితే అత్యవసర పోలీసు విభాగానికి కాల్ వెళ్లేలా ఫోన్‌ సెట్టింగుల్లో పెట్టుకోవడం వంటివీ సహాయపడతాయి. నైట్‌ షిఫ్ట్‌ చేసేవాళ్లూ మరింత జాగ్రత్తగా ఉండాలి. రోజూ ఒకే రూట్‌లో కాకుండా తరచూ దారి మారుస్తూ వెళ్లాలి.
వచ్చిన డ్రైవర్, వాహనం వివరాలు యాప్‌లో చూపినట్టుగానే ఉన్నాయా అని చెక్‌ చేయాలి. ఒక్కోసారి అక్కడ చూపించే వివరాలకీ వచ్చిన వారికీ సంబంధం ఉండదు. పగలైతే పర్లేదు. కానీ రాత్రుళ్లు రిస్క్ తీసుకోకుండా ఉండటం బెటర్. ‘యాప్‌ వాళ్లే ఎక్కువ డబ్బులు తీసుకుంటారు. మాకు నష్టం, క్యాన్సిల్‌ చేసి అదే ధరకు తీసుకెళతామన్నా' వద్దనే చెప్పండి. క్యాన్సిల్‌ చేస్తే లైవ్‌ ట్రాకింగ్‌తో పాటు ఏదైనా తేడా వస్తే ఫిర్యాదు చేయడానికీ వీలూ ఉండదు. అదీ మంచిది కాదు. ఇవన్నీ సరిగ్గానే ఉన్నా మన జాగ్రత్తలో మనం ఉండాలి.
డబ్బుల కంటే భద్రతే ముఖ్యం : ఇంట్లో వాళ్లు, స్నేహితులకు లైవ్‌ లింక్‌ పంపండి. లొకేషన్ షేర్ చేయండి. లైవ్‌ ఆగితే వెంటనే ఫోన్‌ చేయమనండి. మీరూ కాలక్షేపంగా ఉంటుందని సినిమా, సోషల్‌ మీడియాలతో గడపొద్దు. చుట్టూ గమనించుకోండి. వేరే మార్గంలో తీసుకెళితే వెంటనే ప్రశ్నించండి. భయపడకుండా మీ వాళ్లకు ఫోన్‌ చేసి, ఏ దారిలో తీసుకెళుతున్నారో చెబుతూ ఉండండి. ఇవన్నీ స్వీయ రక్షణ చర్యలే. ‘మా ఫ్రెండ్సే మధ్యలో దిగేస్తారు’ అని ఎవరినైనా ఎక్కించుకుంటే ఒప్పుకోవద్దు. ప్రవర్తన, మాట తీరుల్లో తేడా కనిపిస్తే మధ్య దారి అయినా సరే కాస్త జనాలు ఉన్నచోట చూసుకుని దిగిపోండి. డబ్బుల కంటే భద్రతే ముఖ్యం.
బస్సు, రైళ్లు వీలైనంత వరకూ వెలుగొచ్చాకే దిగేలా చూసుకోవడం ఉత్తమం. అన్నిసార్లూ అది వీలవ్వదు. తెల్లారక ముందే దిగాల్సి వస్తే ఇంట్లో వాళ్లని ఎవరో ఒకరిని తీసుకెళ్లడానికి రమ్మని చెప్పాలి. ఆ అవకాశమూ లేకపోతే రైల్వేస్టేషన్‌ల్లో అయితే సేదతీరే గదులు ఉంటాయి. వాటిని బుక్‌ చేసుకోవచ్చేమో చూడండి. లేదా వేచి చూడటానికే ప్రాధాన్యమివ్వండి. వెయిటింగ్‌ హాల్స్ ఉంటాయి. అందులో జనం ఉంటారు అక్కడ ఉండండి. హెల్ప్‌ డెస్క్‌లు ఉంటాయి. ఎంత ధైర్యవంతులైనా కొత్త ప్రదేశానికి వెళ్తున్నా, చాలా సంవత్సరాల తర్వాత వస్తే కాస్త కంగారు పడుతుంటారు. దాన్ని ఆపద తలపెట్టాలనుకునేవాళ్లు ఇట్టే గమనిస్తారు.
వాటిని నమ్మకండి : నమ్మకం కలిగించడానికి ‘అక్క, చెల్లి’ అని మాట కలుపుతారు. ఇలా అన్నవాళ్లంతా చెడ్డవాళ్లే అనుకోనక్కర్లేదు. అలాగని ముఖమ్మీద చెడ్డవాళ్లు అనీ రాసుండదు కదా! మన జాగ్రత్తలో మనం ఉండాలి. తప్పనిసరిగా వెళ్లాల్సిన పరిస్థితే అయితే ఏయే దారుల్లో వెళ్లొచ్చో మ్యాప్‌ల్లో పిన్‌ చేసి పెట్టుకోండి. పేరున్న క్యాబ్‌ సర్వీసుల నుంచి బుక్‌ చేసుకోవడానికే మొగ్గు చూపండి. వీలుంటే బస్సు, షేరింగ్‌ ఆటోలను ఆశ్రయించినా మేలే. వేరే చోట్ల ఇవన్నీ జరిగాయి, మన దగ్గర అలాంటి వాటికి ఆస్కారం లేదన్న ధీమా వద్దు. ముప్పు ఎక్కడైనా, ఎప్పుడైనా పొంచి ఉండొచ్చు. కాబట్టి, అలసత్వం వదిలి జాగ్రత్త పడటమే దారి!
