గంజాయితో ఐస్​క్రీమ్, చాక్లెట్ బాల్స్ - హోలీ వేడుకల్లో గుట్టురట్టు

హోలీ వేడుకల్లో గంజాయి వినియోగంపై సమాచారంతో తనిఖీలు - గంజాయితో తయారుచేసిన ఐస్ క్రీమ్, గంజాయి బాల్స్ స్వాధీనం - ధూల్‌పేట మల్చిపురాలో ఐస్​క్రీమ్, బర్ఫీలో గంజాయి వాడినట్లు గుర్తింపు

Ice Cream and Barfi Making with Ganja in Dhoolpet : హోలీ వేడుకల్లో గంజాయితో తయారు చేసిన కుల్ఫీ, ఐస్‌క్రీమ్‌తో పాటు గంజాయి బాల్స్‌ విక్రయిస్తున్న ముఠాను హైదరాబాద్ స్పెషల్‌ టాస్క్‌ ఫోర్స్‌ పోలీసులు అదుపులోకి తీసుకున్నారు. హైదరాబాద్‌ నగరంలో వివిధ రాష్ట్రాలకు చెందిన ప్రజలు విభిన్న రీతుల్లో హోలీ సంబరాలు చేసుకుంటారు. లోయర్‌ ధూల్‌పేట్‌లోని మల్చిపురాలో కుల్ఫీ, ఐస్‌క్రీమ్‌, బర్ఫీ స్వీటులో, సిల్వర్‌ కోటెడ్‌ బాల్స్‌లో గంజాయి వినియోగిస్తూ సంబరాలు చేశారు.

గంజాయితో స్వీట్లు, ఐస్​క్రీమ్ : పక్కా సమాచారం తెలుసుకున్న ఎక్సైజ్‌ ఎన్‌ఫోర్స్‌మెంట్‌, ఎస్టీఎఫ్‌ పోలీసులు మెరుపు దాడులు నిర్వహించి నిందితులను అరెస్ట్‌ చేశారు. 100 కుల్ఫీలు, 72 బర్ఫీ స్వీట్లు, సిల్వర్‌ కోటెడ్‌ బాల్స్‌ను పోలీసులు స్వాధీనం చేసుకున్నారు. కుల్ఫీ, ఐస్​క్రీమ్‌ విక్రయించే సత్యనారాయణ సింగ్‌ అనే వ్యక్తి గంజాయితో వీటిని తయారీ చేసినట్టు గుర్తించారు. నిందితుడితో పాటు అతని సహచరులను అదుపులోకి తీసుకుని పోలీసులు విచారణ చేస్తున్నారు. ఎక్కడి నుంచి ఈ గంజాయి వస్తోంది? వీరి వెనుక ఇంకా ఎవరెవరు ఉన్నారు? అనే కోణాలలో దర్యాప్తు కొనసాగిస్తున్నారు.

"కుల్ఫీలో గంజాయి కలిపాడు. 200 నుంచి 250 గ్రాములు ఉండే కంటైనర్​ను ఫ్రీజర్​లో పెట్టి గడ్డ కట్టిన తర్వాత కుల్ఫీలాగా విక్రయిస్తున్నారు. వీటన్నింటిని స్వాధీనం చేసుకున్నాం. బంగ్ పేరు చెప్పి దానిలో గంజాయి మిక్స్ చేసి సిల్వర్ ఫైల్ రోల్ చేసి దానిని బర్ఫీ స్వీట్​లాగా సేల్ చేస్తున్నారు" -అంజి రెడ్డి, ఎక్సైజ్ అధికారి

అందరు హోలీ ఆడుతుంటే, దూల్​పేటలో గంజాయి ఆట : హోలీ అంటేనే ప్రజలు ఎంతో సంతోషంగా జరుపుకునే రంగుల పండుగ. ఒళ్లంతా రంగులు చల్లుకొని సరదాగా కుటుంబ సభ్యులు, స్నేహితులతో గడుపుతారు. ఈ నేపథ్యంలో హైదరాబాద్ నగరంలో హోలీ సంబరాలు అంబరాన్నంటాయి. ఇలా హోలీ ఆడుతూ నగర ప్రజలు ఎంజాయ్ చేస్తుంటే, లోయర్ ధూల్పేట్లోని మల్చిపురాలో గంజాయి వినియోగిస్తూ సంబరాలు జరుపుకుంటున్నట్లు సమాచారం రావడంతో ఎక్సైజ్ ఎన్ ఫోర్స్ మెంట్ పోలీసులు దాడులు నిర్వహించారు.

కేసు నమోదు చేసిన పోలీసులు : వెంటనే నిందితుడి సత్యనారాయణ సింగ్​పై కేసు నమోదు చేశారు. గంజాయి బర్ఫీ, చాక్లెట్లను స్వాధీనం చేసుకున్న సిబ్బందిని ఎక్సైజ్ శాఖ ఎన్‌ఫోర్స్‌మెంట్‌ డైరెక్టర్‌ వి.వి. కమలాసన్ రెడ్డి అభినందించారు. నిత్యం కుల్ఫీ ఐస్​క్రీమ్ అమ్మే సత్యనారాయణ సింగ్ గంజాయితో తయారు చేసిన కుల్ఫీ ఐస్​క్రీమ్, స్వీట్ల అమ్మకాలు జరుపుతున్నట్లు ఎక్సైజ్ ఎన్‌ఫోర్స్‌మెంట్‌ అధికారులు తెలిపారు.