GHMC notices Property Tax Defaulters in Hyderabad : హైదరాబాద్ నగరంలో ప్రాపర్టీ ట్యాక్స్ కట్టని నిర్మాణాలు, తక్కువ కడుతున్న భవనాల వివరాలు జీఐఎస్‌(జియోగ్రాఫిక్ ఇన్ఫర్మేషన్ సిస్టం) సర్వేలో లెక్క తేలుతున్నాయి. ఇప్పటి వరకు 20 శాతం మేరకు సర్వే పూర్తవగా అందులో ఏకంగా 80 వేల నిర్మాణాల కొలతలు, వాటి ఆస్తిపన్నులో తేడాలు ఉన్నట్లు సంబంధిత సర్వేయర్లు గుర్తించారు.
సెక్షన్‌ 213 ప్రకారం నోటీసులు : అందులో పూర్తిగా పన్ను కట్టని నిర్మాణాలే 20 వేల వరకు ఉన్నాయి. బల్దియా ఐటీ(ఇన్ఫర్మేషన్ టెక్నాలజీ) విభాగం ఆయా నిర్మాణాల జాబితాను ఇటీవల జీహెచ్ఎంసీ కమిషనర్ ఇలంబర్తికి అందజేశారు. ఆ భవనాలన్నింటికీ చట్టప్రకారం నోటీసులు ఇవ్వాలని, యజమానుల నుంచి వివరణ తీసుకుని తదుపరి చర్యలు చేపట్టాలని ఆయన అధికార యంత్రాంగాన్ని ఆదేశించారు. ఈ మేరకు జీహెచ్ఎంసీ జోనల్‌ కమిషనర్లు చర్యలు ప్రారంభించారు. ప్రాపర్టీ ట్యాక్స్ కట్టని వారికి జీహెచ్ఎంసీ చట్టంలోని సెక్షన్‌ 213 ప్రకారం నోటీసులు ఇవ్వనున్నట్లు తెలుస్తోంది.
అయిదు లక్షలకు పైగా భవనాలకు: జీఐఎస్‌ సర్వే ఏడాది కిందట అప్పటి జీహెచ్ఎంసీ కమిషనర్ ఆమ్రపాలి ఆధ్వర్యంలో మొదలైంది. డ్రోన్‌తో హైదరాబాద్ నగరాన్ని చిత్రీకరించారు. జీయోగ్రాఫికల్ మ్యాప్ను రూపొందించారు. ప్రస్తుతం ఇంటింటి సర్వే జరుగుతోంది. పూర్తయిన 20 శాతం ఇంటింటి సర్వేలో దాదాపు 80 వేల భవనాలు లెక్క తేలాయి. నగరం మొత్తాన్ని సర్వే చేస్తే 5 లక్షలకు పైగా భవనాలకు నోటీసులు ఇచ్చే పరిస్థితి ఉత్పన్నమవుతుందని అధికారులు అంచనా వేస్తున్నారు.
నోటీసులిస్తూనే : సర్వేయర్లు గుర్తిస్తున్న సమాచారంలో కూడా లోపాలు ఉండొచ్చనే కారణంతో గుర్తించిన ప్రతి ఇంటి యజమానికి నోటీసు ఇవ్వాలని, ఆ వివరాలను సంబంధిత సహాయ మున్సిపల్‌ కమిషనర్(ఏఎంసీ) ఆన్‌లైన్‌లోనూ అప్లోడ్ చేయాలని కమిషనర్ ఇలంబర్తి అధికారులను ఆదేశించారు. నోటీసుకు 15 రోజుల్లోపు యజమాని వివరణ ఇవ్వాలని చెబుతున్నారు.
పౌరుల అభ్యంతరాలకు : యజమాని ఇచ్చే వివరణ ఆధారంగా సంబంధిత బిల్‌ కలెక్టర్‌ లేదా ట్యాక్స్ ఇన్‌స్పెక్టర్‌ క్షేత్రస్థాయిలో తనిఖీ చేసి డిప్యూటీ కమిషనర్కు నివేదికను సమర్పిస్తారు. స్పందించకపోతే మాత్రం విచారణ లేకుండానే పన్ను మదింపు జరిగిపోతుంది. నోటీసులపై పౌరులు అభ్యంతరం వ్యక్తం చేస్తే వారి కోసం సంబంధిత డిప్యూటీ కమిషనర్ ఆ యజమాని అభ్యంతరాలపై విచారణ జరపాలని సూచించారు. నోటీసు జారీ, దాని వివరాలను యజమాని ఫోన్‌ నంబరుకు మెసేజ్ ద్వారా తెలియజేయాలని అధికారులను ఆదేశించారు.
జీహెచ్ఎంసీ కీలక నిర్ణయం - ఆస్తి పన్ను కడితేనే వాటి క్రయవిక్రయాల రిజిస్ట్రేషన్లు!
గ్రేటర్‌ హైదరాబాద్‌లో ఆస్తిపన్ను చెల్లింపు - అలా చెల్లిస్తే 90 శాతం వడ్డీ మాఫీ
