భార్యను చంపాలనుకుని మద్యం మత్తులో పక్కింటికి - ఎంత దారుణం జరిగిపోయింది!

భార్యను చంపాలనుకొని మరో మహిళపై వ్యక్తి కత్తితో దాడి - తాగిన మైకంలో పక్కింట్లోకి వెళ్లి నిద్రిస్తున్న మహిళను కత్తితో పొడిచిన వ్యక్తి - రంగారెడ్డి జిల్లా మైలార్​దేవ్​పల్లి పరిధి కాటేదాన్​లో ఘటన

Drunken Man Stabbed Woman : మద్యం మత్తులో ఓ వ్యక్తి దారుణానికి ఒడిగట్టాడు. భార్యను చంపాలనుకుని పక్కింట్లో ఉండే మరో మహిళపై కత్తితో దాడి చేశాడు. ఆమె పరిస్థితి విషమంగా ఉండటంతో ఆసుపత్రిలో చికిత్స అందిస్తున్నారు. ఈ ఘటన రంగారెడ్డి జిల్లా మైలార్​దేవ్​పల్లి పరిధి కాటేదాన్​లో శుక్రవారం జరిగింది. కేసు నమోదు చేసుకొని పోలీసులు దర్యాప్తు చేస్తున్నారు.

పోలీసులు తెలిపిన వివరాల ప్రకారం, మహారాష్ట్ర నాందేడ్​కు చెందిన సలీమ్​ దంపతులు మూడేళ్ల క్రితం నగరానికి వలస వచ్చారు. సలీమ్​ అతని భార్య మున్నీ మధ్య కొన్ని రోజులుగా గొడవలు జరుగుతున్నాయి. వీరి పక్కింట్లో అబేదా (25) ఉంటున్నారు. శుక్రవారం అర్ధరాత్రి మద్యం మత్తులో పక్కింట్లోకి వెళ్లిన సలీమ్​, తన భార్య అనుకొని అబేదాపై కత్తితో దాడి చేశాడు. అప్రమత్తమైన స్థానికులు చికిత్స నిమిత్తం ఆమెను ఆసుపత్రికి తరలించారు. ప్రస్తుతం ఆమె పరిస్థితి విషమంగా ఉంది. ఈ ఘటనపై కేసు నమోదు చేసుకున్న పోలీసులు దర్యాప్తు చేస్తున్నారు. దాడి చేసి పరారైన నిందితుడిని పోలీసులు అదుపులోకి తీసుకున్నారు.