IPL 2025 DC VS PBKS : ఐపీఎల్ 2025 సీజన్ను దిల్లీ క్యాపిటల్స్ జట్టు విజయంతో ముగించింది. పాయింట్స్ టేబుల్లో టాప్ ప్లేస్పై కన్నేసిన పంజాబ్ కింగ్స్ టీమ్కు షాకిచ్చింది. శనివారం రాత్రి ఆ టీమ్తో జరిగిన మ్యాచ్లో ఆరు వికెట్ల తేడాతో విజయం సాధించింది. ఇప్పటికే ప్లేఆఫ్స్కు దిల్లీ దూరమైన విషయం తెలిసిందే.
తొలుత టాస్ ఓడి బ్యాటింగ్‌కు దిగిన పంజాబ్ భారీ స్కోరు రాబట్టింది. నిర్ణీత 20 ఓవర్లలో 8 వికెట్ల నష్టానికి 206 పరుగులు చేసింది. జోష్‌ ఇంగ్లిస్ (32; 12 బంతుల్లో 3 ఫోర్లు, 2 సిక్స్‌లు), ప్రభ్‌సిమ్రన్ సింగ్ (28; 18 బంతుల్లో 4 ఫోర్లు, 1 సిక్స్‌) దూకుడు ప్రదర్శించారు. కెప్టెన్ శ్రేయస్ అయ్యర్ (53; 34 బంతుల్లో 5 ఫోర్లు, 2 సిక్స్‌లు) అర్ధ శతకంతో అదరగొట్టారు. చివర్లో స్టాయినిస్ (44*; 16 బంతుల్లో3 ఫోర్లు, 4 సిక్స్‌లు) మెరుపులు మెరిపించాడు. ప్రియాంశ్ ఆర్య (6) నిరాశపర్చాడు. నేహల్ వధేరా (16), శశాంక్ సింగ్ (11) పరుగులు చేశారు. దిల్లీ బౌలర్లలో ముస్తాఫిజుర్ 3, కుల్‌దీప్ యాదవ్ 2, విప్రాజ్ నిగమ్ 2, ముకేశ్‌ కుమార్ ఒక వికెట్ పడగొట్టారు.
పంజాబ్ నిర్దేశించిన భారీ లక్ష్యాన్ని దిల్లీ 4 వికెట్లు కోల్పోయి 3 బంతులు మిగిలుండగా ఛేదించింది. సమీర్ రిజ్వీ (58*; 25 బంతుల్లో 3 ఫోర్లు, 5 సిక్స్‌లు) మెరుపు అర్ధ శతకంతో దుమ్మురేపాడు. కరుణ్‌ నాయర్ (44; 27 బంతుల్లో 5 ఫోర్లు, 2 సిక్స్‌లు) దూకుడుగా ఆడి స్కోరు బోర్డు పరిగెత్తించాడు. ఓపెనర్లు కేఎల్ రాహుల్ (35; 21 బంతుల్లో 6 ఫోర్లు, 1 సిక్స్‌), ఫాప్ డుప్లెసిస్ (23; 15 బంతుల్లో 2 ఫోర్లు, 1 సిక్స్‌) శుభారంభం అందించారు. సెథిఖుల్లా అటల్ (22; 16 బంతుల్లో 2 సిక్స్‌లు) ఫర్వాలేదనిపించాడు. పంజాబ్ బౌలర్లలో హర్‌ప్రీత్ బ్రార్ 2, మార్కో యాన్సెన్, ప్రవీణ్ దూబె ఒక్కో వికెట్ తీశారు.
