స్మృతి మంధాన, శ్రీ చరణి అదుర్స్- తొలి టీ20లో ఇంగ్లాండ్‌పై భారత్ సూపర్ విక్టరీ

Ind Vs Eng Women T20 2025 : ఇంగ్లాండ్‌ మహిళల జట్టుతో ఐదు టీ20ల సిరీస్‌ను టీమ్​ఇండియా మహిళల జట్టు గ్రాండ్​గా స్టార్ట్ చేసింది. తొలి టీ20 మ్యాచ్​లో విజయం సాధించింది. శనివారం జరిగిన మ్యాచ్​లో 97 పరుగుల తేడాతో గెలుపొందింది. స్మృతి మంధాన సెంచరీతో అదరగొట్టగా, శ్రీ చరణి నాలుగు వికెట్లు తీసి జట్టు విజయంలో కీలక పాత్ర పోషించింది.

తొలుత బ్యాటింగ్ చేసిన భారత్, నిర్ణీత 20 ఓవర్లలో 5 వికెట్ల నష్టానికి 210 పరుగులు చేసింది. స్మృతి మంధాన (112 ; 62 బంతుల్లో 15 ఫోర్లు, 3 సిక్స్‌లు) శతకంతో అదరగొట్టింది. స్టార్టింగ్​ నుంచి బౌండరీలు బాదుతూ స్కోర్ బోర్డు పరిగెత్తించింది. 51 బంతుల్లో టీ20ల్లో తొలి సెంచరీ అందుకుంది. హర్లీన్ డియోల్ (43; 23 బంతుల్లో 7 ఫోర్లు) దూకుడుగా ఆడింది. షెఫాలీ వర్మ (20), రిచా ఘోష్ (12) పరుగులు రాబట్టారు. ఇంగ్లాండ్ బౌలర్లలో లారెన్ బెల్ 3, ఆర్లోట్, ఎకిల్‌స్టోన్ చెరో వికెట్ తీశారు.

ఆ తర్వాత లక్ష్యఛేదనలో ఇంగ్లాండ్ 14.5 ఓవర్లలోనే 113 పరుగులకు ఆలౌటైంది. నాట్ సీవర్ (66; 42 బంతుల్లో 10 ఫోర్లు) టాప్ స్కోరర్​గా నిలిచింది. బ్యూమాంట్ (10), ఆర్లోట్ (12) పరుగులు చేశారు. మిగతా బ్యాటర్లు సింగిల్ డిజిట్ స్కోరుకే పెవిలియన్​కు చేరారు. భారత బౌలర్లలో శ్రీ చరణి (4/12) అదరగొట్టింది. దీప్తి శర్మ 2, రాధా యాదవ్ 2, అమన్‌జ్యోత్, అరుంధతి రెడ్డి చెరో వికెట్ పడగొట్టారు.