Ind Vs Eng First Test : ఇంగ్లాండ్ - భారత్ జట్ల మధ్య తొలి టెస్టు మూడో రోజు ఆట కాస్త ముందుగానే ముగిసింది. వర్షం కారణంగా అంపైర్లు ఆటను కొన్ని ఓవర్లు మిగిలి ఉండగానే నిలివేశారు. ప్రస్తుతం రెండో ఇన్నింగ్స్‌లో టీమ్ఇండియా రెండు వికెట్ల నష్టానికి 90 పరుగులు చేసింది. క్రీజులో కేఎల్ రాహుల్ (47 బ్యాటింగ్; 75 బంతుల్లో 7 ఫోర్లు), శుభ్‌మన్‌ గిల్ (6 బ్యాటింగ్; 10 బంతుల్లో 1ఫోర్) ఉన్నారు.
తొలి ఇన్నింగ్స్‌లో సెంచరీ చేసిన ఓపెనర్ యశస్వి జైస్వాల్ (4) తొందరగానే పెవిలియన్కు చేరాడు. ఫస్ట్ ఇన్నింగ్స్‌లో డకౌట్ అయిన అరంగేట్ర ఆటగాడు సాయి సుదర్శన్‌ (30; 48 బంతుల్లో 4ఫోర్లు) మాత్రం ఈ సారి ఫర్వాలేదనిపించాడు. ప్రస్తుతం భారత్ 96 పరుగుల ఆధిక్యంలో కొనసాగుతోంది. టీమ్ఇండియా తొలి ఇన్నింగ్స్‌లో 471 పరుగులు చేయగా, ఇంగ్లాండ్ 465 పరుగులు చేసింది.
అయితే తొలి ఇన్నింగ్స్‌లో 209/3 ఓవర్‌నైట్‌ స్కోర్‌తో మూడో రోజు ఆటను ప్రారంభించిన ఇంగ్లాండ్, భారత్ స్కోరుకు కేవలం ఆరు పరుగుల దూరంలో నిలిచింది. రెండో రోజు సెంచరీ హీరో ఓలీ పోప్ (106; 137 బంతుల్లో 14 ఫోర్లు) ఆట మొదలైన కాసేపటికే పెవిలియన్కు చేరాడు. ఆ తర్వాత హ్యారీ బ్రూక్ (99; 112 బంతుల్లో 11 ఫోర్లు, 2 సిక్స్‌లు) ఒక్క పరుగుతో సెంచరీ మిస్ చేసుకున్నాడు.
సెంచరీ ముందు ప్రసిద్ధ్‌ కృష్ణ బౌలింగ్‌లో భారీ షాట్ ఆడి డీప్ బ్యాక్‌వర్డ్ స్క్వేర్‌ లెగ్‌లో శార్దూల్ ఠాకూర్‌కు చిక్కాడు. జేమీ స్మిత్ (40; 52 బంతుల్లో 3 ఫోర్లు), క్రిస్‌ వోక్స్ (38; 55 బంతుల్లో 3 ఫోర్లు, 2 సిక్స్‌లు) కీలక ఇన్నింగ్స్‌లు ఆడారు. బెన్‌ స్టోక్స్ (20), బ్రైడన్ కార్స్ (22), జోష్ టంగ్ (11) పరుగులు సాధించారు. భారత బౌలర్లలో బుమ్రా (5/83), ప్రసిద్ధ్‌ కృష్ణ 3, సిరాజ్ 2 వికెట్లు పడగొట్టారు.
