స్మిత్, బ్రూక్ సెంచరీల మోత- 14ఏళ్లలో రేర్ రికార్డ్​- ఇంగ్లాండ్ స్ట్రాంగ్ రిప్లై

Ind vs Eng 2nd Test 2025 : ఎడ్జ్​బాస్టన్​ టెస్టు తొలి ఇన్నింగ్స్​లో భారత్​కు ఇంగ్లాండ్ ధీటుగా బదులిస్తోంది. మూడో రోజు టీ బ్రేక్ సమయానికి 355-5తో పటిష్ఠ స్థితిలో నిలిచింది. యంగ్ బ్యాటర్లు హ్యారీ బ్రూక్ (140), జేమీ స్మిత్ (157) క్రీజులో ఉన్నారు. ఈ ఇద్దరూ భారత బౌలర్లను సమర్థంగా ఎదుర్కొంటు స్కోర్ బోర్డును ముందుకు నడిపించారు. ఈ క్రమంలోనే సెంచరీల కూడా పూర్తి చేసుకున్నారు. దీంతో స్మిత్, బ్రూక్ అరుదైన రికార్డులు సాధించారు.

మూడో బ్యాటర్​గా రికార్డ్ : 24ఏళ్ల స్మిత్​ ఈ మ్యాచ్​లో అదిరే ఘనత సాధించాడు. స్టోక్స్ ఔట్​ అయ్యాక క్రీజులోకి వచ్చిన స్మిత్ దూకుడుగా ఆడాడు. ఎడాపెడా బౌండరీలతో టీమ్ఇండియా బౌలర్లపై విరుచుకుపడ్డాడు. కేవలం 80 బంతుల్లోనే శతకం పూర్తి చేశాడు. ఇందులో 17 ఫోర్లు ఉండడం విశేషం. ఈ క్రమంలోనే టెస్టు క్రికెట్ హిస్టరీలో ఇంగ్లాండ్​ తరఫున వేగవంతమైన శతకం బాదిన మూడో బ్యాటర్​గా రికార్డ్ కొట్టాడు. ఈ లిస్ట్​లో గిల్​బెర్ట్ జెసిప్ (76 బంతుల్లో), జానీ బెయిర్ స్టో (77 బంతుల్లో) సెంచరీలు నమోదు చేశారు.

అలాగే ఇంగ్లాండ్ వికెట్ కీపర్ భారత్​పై టెస్టుల్లో సెంచరీ చేయడం గత 14ఏళ్లలో ఇదే తొలిసారి కావడం విశేషం. 14ఏళ్ల తర్వాత టీమ్ఇండియాపై సెంచరీ బాదిన బ్యాటర్​గా కీపర్ స్మిత్ ఘనత సాధించాడు. చివరిసారిగా భారత్​పై 2011లో లార్డ్స్ వేదికగా జరిగిన మ్యాచ్‌లో వికెట్ కీపర్‌ మ్యాట్ ప్రియర్ (103 పరుగులు) సెంచరీ నమోదు చేశాడు.

జెమీ స్మిత్ సెంచరీ (Source : Associated Press)

బ్రూక్ ఈ రికార్డులు : స్మిత్​ మాత్రమే కాదు ఈ ఇన్నింగ్స్​లో బ్రూక్ సైతం సూపర్ ఇన్నింగ్స్​తో ఆకట్టుకున్నాడు. అతడు కూడా సెంచరీ బాదాడు. తన కెరీర్​లో ఇది అతడికి తొమ్మిదో శతకం నమోదు చేశాడు. ఈ క్రమంలోనే బ్రూక్ టెస్టుల్లో 2500 పరుగులు పూర్తి చేసుకన్నాడు. 44 ఇన్నింగ్స్​ల్లో బ్రూక్ 2832 బంతుల్లోనే ఈ మైలురాయి అందుకున్నాడు. దీంతో ఇంగ్లాండ్ తరపున అత్యంత వేగంగా (బంతుల పరంగా) 2500 టెస్టు పరుగులు పూర్తి చేసిన బ్యాటర్​గా రికార్డ్ కొట్టాడు.

అలాగే ఇంగ్లాండ్ తరఫున అత్యంత వేగంగా 9 సెంచరీలు బాదిన మూడో బ్యాటర్​గానూ నిలిచాడు. బ్రూక్ 44 ఇన్నింగ్స్​లో ఈ ఘనత సాధించాడు. ఈ లిస్ట్​లో బ్రూక్ కంటే ముందు డెనిస్ కామ్ప్​టన్ (37), సట్​క్లిఫ్ (43) ఉన్నారు.

సెంచరీ అనంతరం బ్రూక్ (Source : Associated Press)

84-5 నుంచి 355-5కు : ఓవర్​నైట్ స్కోర్ 77-3తో మూడో రోజు ఇన్నింగ్స్​ ప్రారంభించిన ఇంగ్లాండ్ తొలుత తడబడింది. తొలి సెషన్​లో ఒకే ఓవర్​లో వరుసగా రెండు వికెట్లు కోల్పోయింది. సిరాజ్ సంధించిన 22వ ఓవర్లో మూడో బంతికి సీనియర్ బ్యాటర్ జో రూట్ (22) క్యాచౌట్ కాగా, ఆ తర్వాత బంతికే కెప్టెన్ బెన్ స్టోక్స్ (0) పెవిలియన్ చేరాడు. దీంతో ఇంగ్లాండ్ 84-5తో పీకల్లోతు కష్టాల్లో పడింది.

ఈ దశలో స్మిత్​తో కలిసి బ్రూక్ అద్భుత భాగస్వామ్యం నమోదు చేశారు. ఈ ఇద్దరూ టీ బ్రేక్ సమయానికి 271* పార్ట్​నర్​షిప్ నమోదు చేశారు. ఈ క్రమంలో స్మిత్ 144 బంతుల్లోనే 150 పరుగులు పూర్తి చేశాడు. ఈ జోడీని విడగొట్టకుంటే ఇంగ్లాండ్ భారీ స్కోర్ చేయడం ఖాయం!

'మేం గ్రౌండ్​లో పెరిగిన గడ్డి చూసేందుకు రాలేదు- ఆట మధ్యలో ఆ తమాషా ఏంటి?'

భారత్​ 587 పరుగులు చేసినా ఇంగ్లాండ్ గెలుస్తుందా? గత గణాంకాలు ఏం చెబుతున్నాయి?