Trees That Remove Vastu Defects : మొక్కలను, చెట్లను పూజించడం హిందూ సంప్రదాయంలో ఒక భాగం. ముఖ్యంగా కొన్ని రకాల జాతక దోషాల కారణంగా ఏర్పడే సమస్యలకు పరిహారంగా కొన్ని చెట్లను పూజించడం ద్వారా సమస్యల నుంచి బయట పడవచ్చునని శాస్త్రం చెబుతోంది. ముఖ్యంగా ఏలినాటి శని బాధలను పోగొట్టుకోడానికి, వాస్తు సమస్యల నివారణకు ఏ చెట్లను పూజించాలి? ఎలా పూజించాలి అనే ఆసక్తికర విషయాలు ఈ కథనంలో తెలుసుకుందాం.
వాస్తు దోషాలను తొలగించే జమ్మిచెట్టు
సహజంగా మన ఇంట్లో మనకు తెలియకుండానే కొన్ని వాస్తు దోషాలు ఉంటాయి. తెలిసో తెలియకో జరిగే ఈ తప్పులకు పరిహారంగా ఇంట్లో జమ్మిచెట్టును పెంచుకుంటే మంచిదని వాస్తు శాస్త్రం చెబుతోంది.
సానుకూల శక్తులు పెంచే జమ్మి చెట్టు
జ్యోతిష శాస్త్రం ప్రకారం జమ్మి చెట్టు శనీశ్వరుడికి సంబంధించినదిగా తెలుస్తోంది. ఇంట్లో సానుకూల శక్తుల కోసం మనం అనేక రకాల మొక్కలను పెంచడం సర్వ సాధారణం. అయితే శనీశ్వరుడి చెట్టుగా భావించే జమ్మి చెట్టును ఇంట్లో పెంచుకోవడం వలన మన ఇళ్లలో ఆనందం, శ్రేయస్సు వృద్ధి చెందుతాయని విశ్వాసం.
వాస్తు ఏమి చెబుతోంది?
వాస్తు శాస్త్రం సూచించిన ప్రకారం జమ్మి చెట్టును ఇంటి ప్రధాన ద్వారం కుడి వైపున నాటితే శుభకరమని తెలుస్తోంది. ఒకవేళ ప్రధాన ద్వారం వద్ద జమ్మిచెట్టుని నాటడానికి సరిపడా స్థలం లేకపోతే మేడమీద దక్షిణం వైపు జమ్మి చెట్టును నాటడం సకల శుభాలను ఇస్తుందని శాస్త్ర వచనం.
జమ్మి చెట్టు నాటడానికి శుభ సమయం ఎప్పుడంటే?
వాస్తు శాస్త్రం ప్రకారం జమ్మిచెట్టును విజయదశమి రోజు నాటడం అత్యుత్తమం. కుదరకపోతే శనివారం రోజు జమ్మి చెట్టును నాటవచ్చు. శనివారం జమ్మి చెట్టును నాటడం వలన శనీశ్వరుని అనుగ్రహంతో పాటు పరమశివుని అనుగ్రహాన్ని కూడా పొందవచ్చు.
జమ్మిచెట్టు పూజావిధానం
శుభ ఫలితాల కోసం ప్రతినిత్యం జమ్మి చెట్టుకు నీరు పోసి సంరక్షించాలి. క్రమం తప్పకుండా జమ్మి చెట్టుకు ప్రదక్షిణలు చేస్తూ, పసుపు కుంకుమలతో పూజించాలి. సాయం సంధ్యా సమయంలో జమ్మి చెట్టు వద్ద ఆవ నూనెతో దీపం వెలిగించాలి. ఇలా చేయడం వలన జాతకంలో ఏలినాటి శని ప్రభావం ఉన్నా, అర్ధాష్టమ శని, అష్టమ శని వలన కలిగే దుష్ప్రభావాలు పోతాయని విశ్వాసం.రాహువు అనుగ్రహం కోసం
శనివారం, సోమవారం జమ్మిచెట్టుకు కొమ్మను పసుపుకుంకుమలతో పూజించి, ఎర్ర కలువ పూలతో శమీ చెట్టు మంత్రాలను జపిస్తూ పూజిస్తే జాతకంలో బలహీనమైన రాహు స్థానం బలపడుతుందని విశ్వాసం. జాతక దోషాల వలన కలిగే దుష్ప్రభావాలు కూడా తొలగిపోతాయని జ్యోతిష్య శాస్త్ర పండితులు సూచిస్తున్నారు.
ఏలినాటి శని బాధలు పోగొట్టే రావిచెట్టు
రావిచెట్టు అద్భుతమైన శక్తులు ఉంటాయని జ్యోతిష్య శాస్త్రం చెబుతోంది. ప్రత్యేకించి శివాలయంలో కానీ హనుమాన్ ఆలయంలో కానీ ఉన్న రావి చెట్టు కింద నువ్వుల నూనెతో కానీ, ఆవనూనెతో కానీ ప్రతిరోజూ సంధ్యాసమయంలో దీపాన్ని పెడితే ఏలినాటి శనిబాధల నుంచి విముక్తి లభిస్తుంది. రోజు కుదరకపోయినా ప్రతి శనివారం సాయంకాలం వేళ రావి చెట్టు కింద దీపాన్ని పెడితే శనిదేవుని అనుగ్రహంతో కఠినమైన సమస్యలు కూడా తొలగిపోతాయని విశ్వాసం.
వృక్షో రక్షతి రక్షితః
ఒక రకంగా మన పూర్వీకులు చెట్లను పూజించే ఈ పద్ధతులు పెట్టడం వెనుక పర్యావరణ పరిరక్షణ కూడా దాగి ఉంది. కొన్ని రకాల మొక్కలు ఆక్సిజన్ ఎక్కువగా విడుదల చేస్తాయి. ఉదాహరణకు తులసి, మామిడి, రావి, జమ్మి, వేప చెట్లు వంటివి. అందుకే మనం నివసించే చుట్టుపక్కల ఇలాంటి చెట్లను పెంచడం మంచిది. పూజల పేరుతో నిత్యం వాటికి నీళ్లు పోస్తూ, అవి ఎండిపోకుండా సంరక్షించడం కూడా పర్యావరణ పరిరక్షణలో భాగమే! ప్రతిరోజూ ఈ చెట్లకు ప్రదక్షిణాలు చేయడం ఆరోగ్యానికి కూడా ఎంతో మేలు!ఏది ఏమైనా మన పెద్దలు గురువులు చెప్పినట్లుగా జమ్మి చెట్టును, రావి చెట్టుని పూజించి వాస్తు, జాతక దోషాలను తొలగించుకుందాం. సుఖ సంతోషాలను, శ్రేయస్సును పొందుదాం. శుభం భూయాత్!
ముఖ్య గమనిక : పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. వీటిలో అన్నిటికీ ఆధునిక శాస్త్రీయ ఆధారాలు లేకపోవచ్చుననే విషయాన్ని పాఠకులు గమనించాలి. దీన్ని ఎంతవరకు విశ్వసించాలనేది పూర్తిగా మీ వ్యక్తిగత విషయం.
