Hanuman Jayanti 2025 : హిందూ సంప్రదాయంలో హనుమంతుడికి ప్రత్యేక స్థానముంది. హనుమాన్ ఆలయం లేని ఊరంటూ ఉండదంటే అది అతిశయోక్తి కాదు. కార్యసిద్ధిని, శత్రుజయాన్ని అందించే హనుమను ప్రార్ధిస్తే శక్తికి, జ్ఞానానికి లోటుండదని శాస్త్రవచనం. అలాంటి రామభక్త హనుమాన్ జయంతి శ్రీరామనవమి తరువాత సరిగ్గా ఆరు రోజులకు వస్తుంది. ఏడాదిలో రెండుసార్లు హనుమాన్ జయంతి జరుపుకొంటారు. మరి ఇలా రెండుసార్లు జరుపుకోవడం వెనుక ఉన్న కారణం ఏమిటి? అసలు ఎందుకిలా జరుపుకుంటారు? అనే ఆసక్తికర విషయాలు ఇప్పుడు తెలుసుకుందాం.
కార్యసిద్ధి శత్రుజయం అందించే హనుమ
పురాణాల ప్రకారం చైత్రశుద్ధ పౌర్ణమి రోజు హనుమాన్ జయంతి జరుపుకొంటాం. ఈ ఏడాది ఏప్రిల్ 12 వ తేదీ శనివారం రోజు హనుమాన్ జయంతిని జరుపుకోనున్నాం. హనుమంతునికి ఇష్టమైన శనివారం రోజు హనుమాన్ జయంతి రావడం మరింత విశేషమని పండితులు చెబుతున్నారు.
హనుమజ్జయంతి ఏడాదిలో రెండు సార్లు ఎందుకు?
రామాయణం సుందరకాండలో వివరించిన ప్రకారం సీతను రావణుడు అపహరించినప్పుడు సీతాన్వేషణకై లంకకు బయలుదేరిన హనుమంతుడు సీతమ్మను వెతుకుతూ చివరకు ఓ మంగళవారం తెల్లవారుజామున అశోకవనంలో ఆచూకీ కనుగొన్నాడు. ఆ రోజు చైత్రమాసం, చిత్రా నక్షత్రం, పౌర్ణమి రోజు. సీతమ్మను కనుగొన్న ఆనందంలో హనుమంతుడు అశోక వనాన్ని ధ్వంసం చేసి, రావణ సైనికులను హతమారుస్తాడు. అనంతరం రావణాసురుని సైన్యం హనుమంతుని తోకకు నిప్పంటించగా ఆ తోకతో హనుమంతుడు సగం లంకను దహనం చేస్తాడు. హనుమంతుడు రావణ సైన్యంపై విజయం సాధించినందుకు గుర్తుగా చైత్ర శుద్ధ పౌర్ణమి రోజును హనుమంతుని విజయోత్సవంగా జరుపుకోవాలి. ఇది తెలియని వారు ఆ రోజును హనుమాన్ జయంతిగా జరుపుకుంటారు. ఇది ప్రతి ఏటా ఏప్రిల్లో చైత్ర శుద్ధ పౌర్ణమి రోజు వస్తుంది. ఈ ఏడాది ఏప్రిల్ 12 వ తేదీ జరుపుకోనుంది హనుమత్ విజయోత్సవం.
అసలైన హనుమాన్ జయంతి ఇదే!
నిజానికి హనుమాన్ జయంతి వైశాఖ మాసం బహుళ పక్షంలో వచ్చే దశమి, పూర్వాభాద్ర నక్షత్రం రోజున నిర్వహించాలి. ఈ పండుగ సాధారణంగా ప్రతి సంవత్సరం మే నెల చివరిలో కానీ, జూన్ మొదటి వారంలో కానీ వస్తుంది. పురాణాల ప్రకారం ఈ రోజే అసలైన హనుమాన్ జయంతి. హనుమంతుడుపై ఉన్న ఏకైక ప్రామాణికమైన పుస్తకం పరాశర సంహితలో కూడా ఈ విషయం నిర్ధారించారు. ఈ పుస్తకం ప్రకారం ప్రతి సంవత్సరం ఒకసారి మాత్రమే అది మే చివరి వారంలో హనుమంతుడు జయంతి ఉత్సవాలు జరుపుకోవాలి. ఈ రోజే అసలైన హనుమంతుని జయంతి.
హనుమాన్ జయంతి రోజు హనుమను ఎలా పూజించాలి
హనుమాన్ జయంతి రోజు హనుమకు తమలపాకుల దండను సమర్పించాలి. సింధూరంతో, తమలపాకులతో హనుమంతునికి అష్టోత్తర శతనామ పూజలు జరిపించాలి.
ఎలాంటి నైవేద్యాలు హనుమకు ప్రీతికరం
హనుమంతునికి అరటిపండ్లు ప్రీతికరం. అందుకే హనుమాన్ జయంతి రోజు హనుమకు అరటి పండ్లను సమర్పించాలి. అలాగే వడపప్పు, పానకం హనుమకు నివేదించాలి. ఇంకా హనుమంతునికి ఎంతో ఇష్టమైన వడమాల, అప్పాల మాల సమర్పిస్తే కార్యసిద్ధి, జయం లభిస్తాయని శాస్త్ర వచనం. బెల్లం, శనగలు, బూందీ లడ్డు కూడా హనుమంతునికి ప్రీతికరమైన ప్రసాదాలు. అలాగే ఈ రోజున ఎరుపు రంగు పండ్లను దానం చేయడం శుభప్రదంగా భావిస్తారు.
ఈ పారాయణాలు శుభప్రదం
హనుమాన్ జయంతి రోజు హనుమాన్ చాలీసా, సుందరకాండ పారాయణ చేస్తే విశేషమైన శుభఫలితాలు ఉంటాయని విశ్వాసం.
రానున్న హనుమత్ విజయోత్సవం రోజున రోజున మనం కూడా హనుమను ఆరాధిద్దాం. సకలవిజయాలను, కార్యసిద్ధిని పొందుదాం.
జైశ్రీరామ్!
ముఖ్య గమనిక : పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. వీటిలో అన్నిటికీ ఆధునిక శాస్త్రీయ ఆధారాలు లేకపోవచ్చుననే విషయాన్ని పాఠకులు గమనించాలి. దీన్ని ఎంతవరకు విశ్వసించాలనేది పూర్తిగా మీ వ్యక్తిగత విషయం
