BRS Leaders Kept Under House Arrest : రాష్ట్రంలో ఎమ్మెల్యేలు కౌశిక్రెడ్డి, అరికెపూడి గాంధీ సవాళ్లు ప్రతిసవాళ్లతో రాజకీయం ఒక్కసారి వేడెక్కింది. ఇవాళ అరికెపూడి గాంధీ నివాసంలో బీఆర్ఎస్ శ్రేణులు భేటీ నిర్వహించాలనుకున్నారు. ఈ భేటీకి ఎమ్మెల్యే కౌశిక్రెడ్డి కూడా హాజరవుతారని బీఆర్ఎస్ నేతలు చెప్పారు. ఈ నేపథ్యంలో పోలీసులు అప్రమత్తమయ్యారు. దీంతో కౌశిక్రెడ్డి, అరికెపూడి గాంధీ, శంభీపూర్ రాజులతో పాటు మాజీ మంత్రులు హరీశ్రావు, సబితా ఇంద్రారెడ్డి, తలసాని శ్రీనివాస్ యాదవ్,ఎమ్మెల్యేలు, బీఆర్ఎస్ నేతలు, కార్యకర్తలను ఎక్కడికక్కడ గృహనిర్బంధం చేశారు.
హరీశ్రావు ఇంటి వద్ద ఉద్రిక్తత : కోకాపేటలోని మాజీమంత్రి హరీశ్రావును పోలీసులు హౌస్ అరెస్ట్ చేశారు. హరీశ్రావు ఇంటి వద్దకు భారీగా పోలీసులు చేరుకున్నారు. ఇంటి ముందు బారికేట్లు ఏర్పాటు చేసి హరీశ్ను కలిసేందుకు వచ్చిన ప్రజలను అడ్డుకున్నారు. ఈ క్రమంలో హరీశ్రావు భుజానికి గాయమైందని పరామర్శించడానికి వచ్చిన ఎమ్మెల్యే సునీత లక్ష్మారెడ్డి, మాలోతు కవితలను పోలీసులు అడ్డుకున్నారు. వీరిని అరెస్ట్ చేసి పోలీసు స్టేషన్కు తరలించారు. గురువారం పోలీసుల తోపులాటలో తీవ్రంగా గాయపడిన మాజీ మంత్రి హరీశ్రావు చేతి నొప్పితో ఆసుపత్రికి వెళ్తానంటే పోలీసులు అనుమతించలేదు.
బీఆర్ఎస్ శ్రేణులను తక్షణమే విడుదల చేయాలి : రాష్ట్రవ్యాప్తంగా బీఆర్ఎస్ నాయకులు, కార్యకర్తలను ఎక్కడికక్కడ ముందస్తు అరెస్టులు చేయడాన్ని తీవ్రంగా ఖండిస్తున్నట్లు మాజీమంత్రి హరీశ్రావు తెలిపారు. అరెస్టు చేసిన బీఆర్ఎస్ శ్రేణులను తక్షణమే విడుదల చేయాలని బీఆర్ఎస్ పక్షాన ప్రభుత్వాన్ని డిమాండ్ చేశారు. ఎమ్మెల్యే కౌశిక్రెడ్డిపై దాడికి పాల్పడిన వారిని అరెస్టు చేయకుండా బీఆర్ఎస్ శ్రేణులను అరెస్టు చేయడం అప్రజాస్వామికమని పేర్కొన్నారు. ప్రభుత్వానికి చిత్తశుద్ధి ఉంటే ఎమ్మెల్యేలపై దాడి చేసిన గాంధీ, వారి అనుచరులు అరెస్టు చేయాలని డిమాండ్ చేశారు.
బీఆర్ఎస్ నేతలు నిర్బంధం : పేట్ బషీరాబాద్ ఏసీపీ కె.రాములు నేతృత్వంలో ఎమ్మెల్యే కేపీ వివేకానంద నివాసం, క్యాంపు కార్యాలయం వద్ద భారీగా పోలీసులు మోహరించారు. ఎమ్మెల్యే అరికెపూడి గాంధీ నివాసం వద్ద భారీగా పోలీసుల బందోబస్తు ఏర్పాటు చేశారు. ఎమ్మెల్యేను గృహనిర్బంధం చేశారు. ఎమ్మెల్సీ శంభీపూర్ రాజు నివాసం వద్ద భారీగా పోలీసులు మోహరించారు. ఎమ్మెల్సీ ఇంటికి చేరుకున్న పలువురు బీఆర్ఎస్ నాయకులను అదుపులోకి తీసుకున్నారు. ఆయన ఇంటి వద్ద భారీగా బందోబస్తు ఏర్పాటు చేశారు. బీఆర్ఎస్ కార్పొరేటర్లు ఇళ్ల వద్ద కూడా పోలీసులు బందోబస్తు నిర్వహించి బయటకు రాకుండా చర్యలు తీసుకున్నారు.
సబితా ఇంద్రారెడ్డి హౌస్ అరెస్టు : ఎమ్మెల్యే సబితా ఇంద్రారెడ్డి ఇంటి ముందు పోలీసులు మోహరించారు. ఈ సందర్భంగా ఆమె మాట్లాడుతూ, నిర్బంధాలు, ఆంక్షలు బీఆర్ఎస్కు కొత్త కాదని అన్నారు. ప్రజలకు వాస్తవ పరిస్థితులు అర్థం అవుతున్నాయని తెలిపారు. ప్రజాపాలనకు నిదర్శనం నిర్బంధాలు అని సబితా ఇంద్రారెడ్డి ధ్వజమెత్తారు. సూరారం కార్పొరేటర్ మంత్రి నారాయణను 50 మంది కార్యకర్తలను అరెస్టు చేసి జీడిమెట్ల పీఎస్కు పోలీసులు తరలించారు.
