టేస్టీ టేస్టీ "గోధుమ రవ్వ బన్​ దోశ" - పప్పులు నానబెట్టాల్సిన పనిలేదు - నిమిషాల్లో రెడీ!

Wheat Rava Bun Dosa: గోధుమ రవ్వ చాలా మంది ఇళ్లలో ఉంటుంది. ఈ రవ్వతో మెజార్టీ పీపుల్​ ఉప్మా , ఇడ్లీ, దోశలు అంటూ రకరకాల వెరైటీలు చేసుకుంటుంటారు. అయితే కేవలం ఇవి మాత్రమే కాకుండా బన్​ దోశలు కూడా వేసుకోవచ్చు. ఇవి చాలా టేస్టీగా ఉంటాయి. బ్రేక్​ఫాస్ట్​ చేయడానికి ఇడ్లీ లేదా దోశ పిండి లేనప్పుడు ఈ రెసిపీ చాలా ఉపయోగపడుతుంది. కేవలం నిమిషాల్లో దీనిని ప్రిపేర్​ చేసుకోవచ్చు. మరి లేట్​ చేయకుండా ఈ గోధుమరవ్వ బన్​ దోశను ఎలా ప్రిపేర్​ చేసుకోవాలో ఈ స్టోరీలో చూద్దాం.

Wheat Rava (ETV Bharat)

కావలసిన పదార్థాలు:

• గోధుమరవ్వ - 1 కప్పు
• పెరుగు - 1/2 కప్పు
• నూనె - 2 టేబుల్​ స్పూన్లు
• ఆవాలు - అర టీ స్పూన్​
• జీలకర్ర - 1/2 టీ స్పూన్
• మినప్పప్పు - అర టీ స్పూన్​
• శనగపప్పు - అర టీ స్పూన్​
• ఉల్లిపాయ - 1 చిన్నది
• పచ్చిమిర్చి - 2
• కొత్తిమీర - కొద్దిగా
• కరివేపాకు - 2 రెమ్మలు
• వంట సోడా - చిటికెడు
• ఉప్పు - రుచికి తగినంత
• నూనె లేదా నెయ్యి - దోశలు వేయడానికి తగినంత

Curd (Getty Images)

తయారీ విధానం:

• ఓ బౌల్​లోకి గోధుమరవ్వ, పెరుగు, కప్పు నీళ్లు పోసి బాగా కలిపి మూత పెట్టి కనీసం పావు గంట సేపు నానబెట్టాలి.
• 15 నిమిషాల తర్వాత మిక్సీజార్​ తీసుకుని నానిన రవ్వ, కొద్దిగా వాటర్​ పోసి వీలైనంత మెత్తగా గ్రైండ్​ చేసుకుని మిక్సింగ్​ బౌల్​లోకి తీసుకోవాలి.
• స్టవ్​ ఆన్​ చేసి పాన్ పెట్టి​ నూనె వేసుకోవాలి. నూనె కాగిన తర్వాత ఆవాలు, జీలకర్ర, మినప్పపు, శగనపప్పు వేసి దోరగా వేయించుకోవాలి.
• ఆ తర్వాత అందులోకి ఉల్లిపాయ, పచ్చిమిర్చి, కరివేపాకు, కొత్తిమీర తరుగు వేసి ఓ నిమిషం పాటు వేయించి స్టవ్​ ఆఫ్​ చేయాలి.
• ఈ తాలింపును గోధుమ రవ్వ మిశ్రమంలో వేసుకుని, రుచికి తగినంత ఉప్పు, వంటసోడా వేసి బాగా కలపాలి.
• పిండిని దోశల పిండిలాగా జారుడుగా కలుపుకోవడానికి తగినంత నీరు పోయాలి. పిండి మరీ గట్టిగా లేదా మరీ పలుచగా ఉండకూడదు. బాగా కలిపిన తర్వాత 15-20 నిమిషాలు పక్కన పెట్టండి.
• స్టవ్​ ఆన్​ చేసి లోతు ఎక్కువగా ఉన్న పెనం పెట్టి నూనె పోసి వేడి చేసుకోవాలి. నూనె వేడెక్కిన తర్వాత స్టవ్​ను మీడియం ఫ్లేమ్​లో పెట్టి ఒక గరిటెడు పిండిని తీసుకొని పెనం మధ్యలో మరీ పలుచగా కాకుండా కొంచెం మందంగా గుండ్రంగా వేయండి. బన్ దోశ సాధారణ దోశల కంటే కొంచెం మందంగా ఉంటుంది.
• దోశ చుట్టూ కొద్దిగా నూనె లేదా నెయ్యి వేయండి. మూత పెట్టి బంగారు రంగులోకి వచ్చేవరకు కాల్చుకోవాలి. ఆ తర్వాత రెండో వైపుకు తిప్పి కాల్చండి. దోశను ఎక్కువసేపు కాల్చకుండా రెండు వైపులా కొద్దిగా రంగు మారగానే తీసేయండి. ఎక్కువసేపు కాల్చితే గట్టిగా వచ్చే అవకాశం ఉంది.
• వేడి వేడి గోధుమరవ్వ బన్ దోశలను సాంబార్, చట్నీ లేదా మీకు ఇష్టమైన ఇతర సైడ్ డిష్​లతో సర్వ్ చేసుకుంటే సరి.

Bun Dosa (ETV Bharat)

టిప్స్​:

• లావుగా ఉండే గోధుమరవ్వ బదులు సన్నగా ఉండేది ఎంచుకుంటే బన్​ దోశలు మరింత రుచిగా వస్తాయి.
• పుల్లటి పెరుగును వాడటం వల్ల దోశలు సాఫ్ట్​గా రావడంతో పాటు ప్రత్యేకమైన రుచి లభిస్తుంది.
• కొన్నిసార్లు కొద్దిగా శనగపిండి లేదా మైదా కలపడం వల్ల దోశలకు మంచి బైండింగ్ వస్తుంది.
• దోశ వేసిన తర్వాత మూత పెట్టడం వల్ల అది లోపల బాగా ఉడుకుతుంది. మెత్తగా ఉంటుంది.

Wheat Rava Bun Dosa (ETV Bharat)

పాల్వంచ టిఫెన్ సెంటర్​​ "పల్లీ చట్నీ" - చట్నీ కోసమే అక్కడ టిఫెన్ తింటారు! - ఇలా ప్రిపేర్ చేసుకోండి!

చల్లచల్లని "మామిడికాయ మజ్జిగ పులుసు" - ట్రెడిషనల్ టేస్ట్, ట్రెండీ లుక్​లో - 5 నిమిషాల్లో రెడీ!