Vamaku Pulihora: పులిహోర అంటే అందరికీ ఇష్టమే. పండగలు, పూజలు, వ్రతాల సమయంలో ప్రిపేర్ చేస్తుంటారు. ఇక పులిహోర అంటే మెజార్టీ పీపుల్ చింతపండు, నిమ్మకాయతో చేస్తుంటారు. కానీ మీకు తెలుసా? కేవలం వీటితో మాత్రమే కాకుండా వామాకుతో కూడా పులిహోర చేసుకోవచ్చు. టేస్ట్ చాలా అద్భుతంగా ఉంటుంది. అన్నీ ఉంటే కేవలం 10 నిమిషాల్లో ఇది తయారవుతుంది. పైగా స్కూల్కు వెళ్లే పిల్లలకు, ఆఫీసులకు వెళ్లే పెద్దవారికి లంచ్బాక్స్గా కూడా దీనిని పెట్టొచ్చు. ఇక వామాకుతో కలిగి లాభాల గురించి ప్రత్యేకంగా చెప్పక్కర్లేదు. జలుబు, దగ్గు సహా జీర్ణ సంబంధిత సమస్యలకు ఇది ఎంతగానో ఉపయోగపడుతుంది. మరి లేట్ చేయకుండా ఈ వామాకు పులిహోర ఎలా చేయాలో చూసేయండి.
కావాల్సిన పదార్థాలు:
- వాము ఆకులు - 1 కప్పు
- ఉడికించిన అన్నం - 1 కప్పు
- సైంధవ లవణం - సరిపడా
- నిమ్మరసం - అర చెక్క
- పల్లీలు - అర కప్పు
- శనగపప్పు - 1 టీస్పూన్
- మినప్పప్పు - 1 టీస్పూన్
- ఆవాలు - అర టీస్పూన్
- జీలకర్ర - అర టీస్పూన్
- ఎండుమిర్చి - 2
- పచ్చిమిర్చి - 2
- కరివేపాకు - 2 రెమ్మలు
- పసుపు - పావు టీస్పూన్
- కొత్తిమీర తరుగు - కొద్దిగా
- ఇంగువ - చిటికెడు
- నూనె - పావు కప్పు
తయారీ విధానం:
- ముందుగా వాము ఆకులను శుభ్రంగా కడిగి వీలైనంత సన్నగా తరిగి పక్కన పెట్టుకోవాలి. అలాగే అన్నాన్ని కూడా రెడీగా ఉంచాలి.
- స్టవ్ ఆన్ చేసి పాన్ పెట్టి నూనె పోసుకోవాలి. నూనె వేడెక్కాక పల్లీలు వేసి లో ఫ్లేమ్లో వేయించాలి.
- పల్లీలు సరిగా వేగిన తర్వాత తీసి పక్కన ఉంచాలి. అదే పాన్లో శనగపప్పు, మినప్పపు, ఆవాలు, జీలకర్ర వేసి ఫ్రై చేయాలి.
- తాలింపు గింజలు వేగిన తర్వాత పచ్చిమిర్చి, ఎండుమిర్చి, కరివేపాకు, ఇంగువ, పసుపు వేసి మిక్స్ చేసుకోవాలి.
- పచ్చిమిర్చి వేగిన తర్వాత తరిగి పెట్టుకున్న వామాకు వేసి మగ్గించాలి.
- వామాకు నూనెలో మగ్గిన తర్వాత ఉడికించిన అన్నాన్ని వేసి కలుపుకోవాలి. వామాకు మిశ్రమం, అన్నం బాగా కలిసిన తర్వాత రుచికి సరిపడా సైంధవ లవణం వేసి మిక్స్ చేసుకోవాలి.
- ఆ తర్వాత నిమ్మరసం వేసి మిక్స్ చేసుకుని స్టవ్ ఆఫ్ చేయాలి. చివరగా కొత్తిమీర తరుగు, వేయించిన పల్లీలు వేసి మిక్స్ చేసుకుని సర్వ్ చేసుకుంటే సూపర్ టేస్టీ వామాకు పులిహోర రెడీ. నచ్చితే మీరూ ట్రై చేయండి.
చిట్కాలు:
- లేతవి, తాజా వామాకులు అయితే ఈ పులిహోర టేస్ట్ బాగుంటుంది. ఉడికించిన అన్నం ఉంటే ఇది 5 నిమిషాల్లో రెడీ అవుతుంది.
- పల్లీలు వేయించుకుని పక్కకు తీసుకుని లాస్ట్లో కలపడం వల్ల తినేటప్పుడు పంటికి తగిలి అదో టేస్ట్ ఉంటుంది. అదే అన్నింటితో కలిపి వేయించుకుంటే కాస్త మెత్తబడే అవకాశం ఉంటుంది.
- వామాకు నూనెలో సరిగ్గా వేగకపోతే పులిహోర రుచి మారుతుంది. కాబట్టి వీలైనంత వరకు మగ్గించుకోవాలి.
ఘుమఘుమలాడే "చేపల పచ్చడి" - ఈ కొలతలతో చేస్తే పక్కా మూడు నెలలు నిల్వ!
IRCTC బ్యాంకాక్ టూర్ - బీచ్లో ఎంజాయ్మెంట్తో పాటు సఫారీ వరల్డ్ టూర్ కూడా - ధర తక్కువే!
