Trendy Sorakaya Majjiga Pulusu: ఎండలు మండిపోతున్నాయి. పెరుగుతున్న ఉష్ణోగ్రతల కారణంగా చాలా మంది ఒంటికి చలువు చేసే ఆహారాలను తమ డైట్లో చేర్చుకుంటారు. ముఖ్యంగా మజ్జిగ పులుసు ఈ సమ్మర్లో అధికంగా చేసుకుని తింటుంటారు. పుల్లటి మజ్జిగలో ఉల్లిపాయలు, తాలింపు మిశ్రమాన్ని వేసి చేసుకునే ఈ పులుసును తింటుంటే తినబుద్ధి అవుతుంది. అయితే ఎప్పుడూ చేసుకునే విధంగా కాకుండా ఓసారి సొరకాయతో మజ్జిగ పులుసు చేసుకోండి. ఏంటీ సొరకాయతో కూర, పచ్చడి మాత్రమే కాకుండా పులుసు కూడా చేసుకుంటారా అని సందేహమా? కానీ నిజమే. ఈ కూరగాయతో రుచికరమైన పులుసు చేసుకోవచ్చు. టేస్ట్ చాలా బాగుంటుంది. పైగా ఇందులో ఉల్లిపాయలు, వెల్లుల్లి అవసరం లేదు. మరి లేట్ చేయకుండా ఈ సొరకాయ మజ్జిగ పులుసు ఎలా చేసుకోవాలో ఓ లుక్కేయండి.
కావాల్సిన పదార్థాలు:
పేస్ట్ కోసం:
- పచ్చి శనగపప్పు - 1 టేబుల్ స్పూన్
- ధనియాలు - 1 టీస్పూన్
- జీలకర్ర - అర టీస్పూన్
పులుసు కోసం:
- నూనె - 1 టేబుల్ స్పూన్
- తాలింపు గింజలు(ఆవాలు, మినపప్పు, మెంతులు) - 1 టేబుల్స్పూన్
- ఎండుమిర్చి - 2
- సొరకాయ ముక్కలు - 200 గ్రాములు
- కరివేపాకు - 2 రెమ్మలు
- ఇంగువ - పావు టీ స్పూన్
- ఉప్పు - సరిపడా
- పసుపు- అర టీస్పూన్
- అల్లం తురుము - 1 టీస్పూన్
- పచ్చిమిర్చి - 4
- పచ్చి కొబ్బరి ముక్కలు - 2 టేబుల్స్పూన్లు
- చిక్కటి పెరుగు - అరకేజీ
- కొత్తిమీర తరుగు - కొద్దిగా
తయారీ విధానం:
- ఓ గిన్నెలోకి పచ్చి శనగపప్పు, జీలకర్ర, ధనియాలు, పావు కప్పు వాటర్ పోసి సుమారు 20 నిమిషాల పాటు నానబెట్టాలి.
- పులుసులోకి అవసరమయ్యే సొరకాయను పొట్టు తీసేసి చిన్న చిన్న ముక్కలుగా కట్ చేసి పక్కన ఉంచాలి. అలాగే ఓ గిన్నెలోకి పెరుగు తీసుకుని చిలికి సరిపడా నీళ్లు పోసి కలిపి పక్కన ఉంచాలి.
- స్టవ్ ఆన్ చేసి పాన్ పెట్టి ఆయిల్ పోసుకోవాలి. నూనె కాగిన తర్వాత తాలింపు గింజలు, ఎండుమిర్చి వేసి ఫ్రై చేయాలి.
- అవి మగ్గిన తర్వాత సొరకాయ ముక్కలు, కరివేపాకు, ఇంగువ, ఉప్పు, పసుపు వేసి ఓసారి కలపాలి.
- ఆ తర్వాత అల్లం తరుగు వేసి కలిపి మూత పెట్టి ముక్కలను నూనెలో మగ్గించుకోవాలి.
- ముక్కలు మగ్గేలోపు నానిన పప్పును గ్రైండ్ చేసుకోవాలి. అందుకోసం మిక్సీజార్లోకి నానిన శనగపప్పు మిశ్రమాన్ని వాటర్తో సహా వేసుకోవాలి. ఆ తర్వాత అందులోకి పచ్చిమిర్చి, పచ్చికొబ్బరి ముక్కలు వేసి మెత్తగా గ్రైండ్ చేసి పక్కన ఉంచాలి.
- ఈ పేస్ట్ను ముందే తయారు చేసుకున్న మజ్జిగలో వేసి బాగా మిక్స్ చేసుకోవాలి.
- సొరకాయ ముక్కలు బాగా మగ్గిన తర్వాత స్టవ్ ఆఫ్ చేసి మజ్జిగలో కలుపుకోవాలి.
- ఇలా కలుపుకున్న తర్వాత మజ్జిగ ఉన్న గిన్నెను స్టవ్ మీద పెట్టి లో ఫ్లేమ్లో సుమారు 5 నుంచి 10 నిమిషాలు మగ్గించుకోవాలి.
- మజ్జిగ పులుసు మగ్గిన తర్వాత చివరగా కొత్తిమీర తరుగు వేసి కలిపి దింపేసుకుంటే ఎంతో రుచికరంగా ఉండే సొరకాయ మజ్జిగ పులుసు రెడీ.
చిట్కాలు:
- ఈ రెసిపీ కోసం పుల్లటి పెరుగు వాడితే రుచి మరింత బాగుంటుంది.
- మజ్జిగ పులుసు అనేది కొద్దిగా చిక్కగానే ఉండాలి. ఒకవేళ మీకు పల్చగా కావాలనుకుంటే నీళ్లు యాడ్ చేసుకోవచ్చు.
- కావాలనుకుంటే తాలింపులో ఉల్లిపాయలు కూడా వేసుకోవచ్చు.
ఒంట్లో వేడిని తగ్గించే "మజ్జిగ చారు" - ఈ పద్ధతిలో చేస్తే ఘుమఘుమలాడే రుచి! - తినడమే కాదు తాగేస్తారు!
ఘుమఘుమలాడే "చికెన్ మజ్జిగ పులుసు" - ఈ పద్ధతిలో చేస్తే మెతుకు కూడా మిగల్చరు!
