Traditional Recipe Timmanam Sweet: స్వీట్స్ అంటే ఇష్టంలేనిది ఎవరికి చెప్పండి. లడ్డూ, జిలేబీ, పాలకోవా, బర్ఫీ, హల్వా, రసగుల్లా, గులాబ్జామున్ వంటి రకరకాల స్వీట్స్ను ఎంతో ఇష్టంగా తింటారు. ప్రస్తుతం మిఠాయిలు కావాలంటే షాప్స్కు వెళ్లి తెచ్చుకుంటున్నారు. కానీ ఒకప్పుడు ఇన్ని రకాల స్వీట్స్ లభించేవి కావు. ఇంట్లో ఉండే పదార్థాలతోనే రుచికరంగా, ఆరోగ్యకరంగా చేసుకునేవారు. అలాంటి వాటిలో ఇది కూడా ఒకటి. అదే 'తిమ్మనం'. ఈ స్వీట్నే కొన్ని ప్రాంతాల్లో కొబ్బరి పాయసం అని కూడా పిలుస్తారు. ఇది క్రీమిగా ఉండి నోట్లో వేసుకోగానే కరిగిపోతుంది. పిల్లలు, పెద్దలందరూ ఇష్టంగా తింటారు. మరి లేట్ చేయకుండా ఈ పాతకాలం నాటి తిమ్మనం ఎలా చేసుకోవాలో చూసేయండి.
కావాల్సిన పదార్థాలు:
- బియ్యం - అర కప్పు
- పచ్చికొబ్బరి ముక్కలు - కప్పు
- పాలు - రెండున్నర కప్పులు
- బెల్లం తురుము - అరకప్పు
- యాలకుల పొడి - అర టీస్పూన్
- నెయ్యి - తగినంత
- ఎండుకొబ్బరి ముక్కలు - 2 టేబుల్స్పూన్లు
- కిస్మిస్ - 10
- జీడిపప్పులు - 15
- బాదం - 10
తయారీ విధానం:
- ఓ బౌల్లో బియ్యం తీసుకొని శుభ్రంగా కడిగి, సరిపడా వాటర్ పోసి సుమారు గంటపాటు నానబెట్టుకోవాలి.
- బియ్యం నానిన తర్వాత నీళ్లు వంపేసి మిక్సీజార్లోకి వేసుకోవాలి. ఆపై అందులోకి పచ్చికొబ్బరి ముక్కలు, అరకప్పు నీళ్లు పోసి మెత్తగా గ్రైండ్ చేసి పక్కన ఉంచాలి.
- స్టవ్ ఆన్ చేసి కడాయి పెట్టి పాలు పోసి మీడియం ఫ్లేమ్లో మరిగించుకోవాలి.
- పాలు బాగా మరుగుతున్నప్పుడు గ్రైండ్ చేసుకున్న బియ్యం పేస్ట్ వేసి కలుపుతూ సన్నని సెగ మీద సుమారు 10 నిమిషాలు ఉడికించుకోవాలి.
- బియ్యం మిశ్రమం చక్కగా ఉడికి, క్రీమ్లాగా తయారైన తర్వాత దింపి పక్కన పెట్టాలి.
- ఇప్పుడు అదే స్టవ్పై మరో పాన్ పెట్టి బెల్లం తురుము, అరకప్పు వాటర్ పోసి మరిగించాలి.
- బెల్లం పూర్తిగా కరిగిన తర్వాత యాలకుల పొడి వేసి కలిపి స్టవ్ ఆఫ్ చేయాలి.
- పాలు, బియ్యం మిశ్రమం గోరువెచ్చగా ఉన్నప్పుడు మరిగించిన బెల్లం వాటర్ను వడకట్టి పోసుకుని బాగా కలిపి పక్కన ఉంచాలి.
- ఇప్పుడు స్టవ్ ఆన్ చేసి కడాయి పెట్టి నెయ్యి వేసి కరిగించాలి. వేడివేడి నెయ్యిలో జీడిపప్పు పలుకులు, సన్నగా తరిగిన బాదం, కిస్మిస్, ఎండుకొబ్బరి ముక్కలు వేసి మంచి కలర్ వచ్చే వరకు సిమ్లో ఫ్రై చేసుకోవాలి. డ్రై ఫ్రూట్స్ మంచిగా వేగిన తర్వాత పాలు, బెల్లం మిశ్రమంలో వేసి కలుపుకోవాలి.
- అంతే ఎంతో టేస్టీగా ఉండే పాతకాలం నాటి తిమ్మనం రెడీ. దీనిని గోరువెచ్చగా లేదా ఫ్రిడ్జ్లో పెట్టుకొని అయినా తినొచ్చు. నచ్చితే మీరూ ఈరెసిపీ ట్రై చేయండి.
చిట్కాలు:
- ఈ స్వీట్ రెసిపీ కోసం ముడి బియ్యం అయితే బాగుంటుంది. మీ దగ్గర అవి లేకపోతే నార్మల్ రైస్ అయినా తీసుకోవచ్చు.
- ఇక్కడ బెల్లం కరిగితే సరిపోతుంది. పాకం అవసరం లేదు. అలాగే బెల్లాన్ని మీరు తినే స్వీట్కు అనుగుణంగా కలుపుకోవాలి. ఒకవేళ స్వీట్ ఎక్కువ కావాలనుకుంటే మరికొంచెం బెల్లం కరిగించి మిక్స్ చేసుకుంటే సరి.
- పాలు, బియ్యం మిశ్రమం గోరువెచ్చగా ఉన్నప్పుడు మాత్రమే బెల్లం నీళ్లు పోసుకోవాలి. వేడి మీద పోసుకుంటే పాలు విరిగే అవకాశం ఉంటుంది.
అమ్మాయిలు, చిన్నారులకు బలాన్నిచ్చే 'తియ్యని స్నాక్' - ఈ రెసిపీకి పాకం అవసరం లేదు!
