సూపర్​ హెల్దీ "టమాటా మసాలా ఓట్స్"​ - 10 నిమిషాల్లోనే రుచికరమైన బ్రేక్​ఫాస్ట్​!

How to Make Tomato Masala Oats: మనం రోజంతా ఉత్సాహంగా ఉండటానికి బ్రేక్​ఫాస్ట్​ ఎంతో ఉపయోగపడుతుంది. అయితే కొన్ని కారణాల వల్ల చాలా మంది ఇంట్లో చేయడం మానేస్తుంటారు. బయట హోటల్స్​, టిఫెన్​ సెంటర్స్​ వైపు మొగ్గు చూపుతుంటారు. అయితే అలా బయట తినే ఫుడ్​తో అనారోగ్య సమస్యలు వచ్చే అవకాశం ఉంటుంది. అలా కాకుండా ఉండాలంటే ఇంట్లోనే ప్రిపేర్​ చేసుకోవాలి. బ్రేక్​ఫాస్ట్​ చేసే టైమ్​ లేదంటారా? కేవలం 10 నిమిషాల్లో సూపర్​ టేస్టీ అండ్​ హెల్దీ టమాటా మసాలా ఓట్స్​ ప్రిపేర్​ చేసుకోవచ్చు. రుచి చాలా బాగుంటుంది. పిల్లలు కూడా వద్దనకుండా తినేస్తారు. మరి లేట్​ చేయకుండా ఈ రెసిపీ ఎలా చేయాలో ఇప్పుడు చూద్దాం.

కావాల్సిన పదార్థాలు:

• నూనె - 2 టేబుల్​ స్పూన్లు
• ఉల్లిపాయ - 1
• కరివేపాకు - 2 రెమ్మలు
• ఉప్పు - రుచికి సరిపడా
• అల్లం వెల్లుల్లి పేస్ట్​ - 1 టీ స్పూన్​
• పసుపు - పావు టీ స్పూన్​
• నాటు పండిని టమాటాలు - 200 గ్రాములు
• కారం - 1 టీ స్పూన్​
• ఓట్స్​ - 110 గ్రాములు
• మిరియాల పొడి - పావు టీ స్పూన్​
• గరం మసాలా - పావు టీ స్పూన్​
• కొత్తిమీర తరుగు - కొద్దిగా

తయారీ విధానం:

• ఉల్లిపాయ, టమాటాలను సన్నగా కట్​ చేసుకోవాలి.
• స్టవ్​ ఆన్​ చేసి పాన్​ పెట్టి నూనె పోసుకోవాలి. ఆయిల్​ హీటెక్కిన తర్వాత కట్​ చేసిన ఉల్లిపాయ ముక్కలు వేసి మగ్గించాలి.
• ఆనియన్స్​ కాస్త మగ్గిన తర్వాత కరివేపాకు వేసి మరో నిమిషం పాటు ఫ్రై చేయాలి.
• ఉల్లిపాయలు లైట్​గా రంగు మారిన తర్వాత ఉప్పు, అల్లం వెల్లుల్లి పేస్ట్​, పసుపు వేసి కలిపి అల్లం పచ్చివాసన పోయే వరకు మరిగించుకోవాలి.
• టమాటా ముక్కలు వేసి బాగా కలిపి మూత పెట్టి మీడియం ఫ్లేమ్​ మీద కుక్​ చేసుకోవాలి.
• టమాటాలు మెత్తగా ఉడికిన తర్వాత పావు లీటర్​ నీళ్లు పోసుకోవాలి. నీళ్లను ఓ సారి కలిపి మూత పెట్టి మరిగించుకోవాలి.
• నీరు బాగా మరుగుతున్నప్పుడు కారం వేసుకుని కలుపుకోవాలి. ఆ తర్వాత ఓట్స్​ వేసుకుని ఉండలు లేకుండా బాగా కలుపుకోవాలి.
• మూత పెట్టి మీడియం ఫ్లేమ్​లో ఓట్స్​ దగ్గరకు అయ్యేంతవరకు కుక్​ చేసుకోవాలి. ఓట్స్​ బాగా ఉడికిన తర్వాత మిరియాల పొడి, గరం మసాలా వేసి కలుపుకోవాలి.
• చివరగా కొత్తిమీర తరుగు వేసి కలిపి స్టవ్​ ఆఫ్​ చేసుకుని సర్వ్​ చేసుకుంటే టమాటా మసాలా ఓట్స్​ రెడీ.
• కేవలం 10 నిమిషాల్లోనే ఈ రెసిపీ రెడీ అవుతుంది. నచ్చితే మీరూ ఓసారి ట్రై చేయండి.

రెగ్యులర్​ దోశ తిని బోర్​ కొట్టిందా? - ఇలా "పంచరత్న దోశ" ట్రై చేయండి - సూపర్​గా ఉంటుంది!

"మఖానా గుంత పొంగనాలు" - ఇలా చేస్తే టేస్ట్​ అదుర్స్​ - పైగా ఆరోగ్యం బోనస్​!