కొత్తిమీరతో ఎన్నడూ ట్రై చేయని సరికొత్త "పచ్చడి" - చేస్తుంటేనే ఆ ఘుమఘుమలకు కడుపు నిండుతుంది!

కొత్తిమీరతో ఇలా పచ్చడి ప్రిపేర్ చేసుకోండి - ఒక్కసారి తింటే ఎవరైనా టేస్ట్​కి జై కొట్టాల్సిందే!

Tomato Kothimeera Chutney Making Process : కొత్తిమీర ఒక మంచి పోషకాహారం. అయితే మనందరం కొత్తిమీరను రుచికోసమో, సువాసనకోసమో కూరలు, సాంబారు, రసాలు వంటి వాటిలో వేస్తుంటాం. ఇక నాన్​వెజ్ రెసిపీలు, బిర్యానీ వంటి చేసుకున్నప్పుడు మాత్రం ఇది తప్పనిసరిగా ఉండాల్సిందే. అయితే, ఎప్పుడూ కొత్తిమీరను వంటల్లో సైడ్ క్యారెక్టర్​గా కాకుండా మెయిన్​ లీడ్​గా ఉపయోగించి అద్దిరిపోయే రోటి పచ్చడిని ప్రిపేర్ చేసుకోండి. ఎన్నడూ తినని సరికొత్త రుచిని ఆస్వాదిస్తారు. పైగా ఆరోగ్యానికి కూడా ఎంతో మేలు చేస్తుంది. కొత్తిమీర అంటే నచ్చని పిల్లలు కూడా ఈ చట్నీని ఎంతో ఇష్టంగా తింటారు. మరి, సూపర్ టేస్టీ అండ్ హెల్దీ పచ్చడిని ఎలా చేసుకోవాలో ఇప్పుడు చూద్దాం.

Nuvvulu (Getty Images)

టిప్స్ :

• ఈ పచ్చడిలో తగినంత కారం కోసం పచ్చిమిర్చితో పాటు ఎండుమిర్చిని వేసుకోవాలి. ఈ రెండింటి కాంబినేషన్ చట్నీకి సరికొత్త టేస్ట్​ని ఇస్తాయి. అయితే, ఇవి మీ కారానికి తగినట్లు అడ్జస్ట్ చేసుకొని తీసుకోవాలి.
• కొత్తిమీరను వేయించుకునేటప్పుడు మరీ నీరు లేకుండా డ్రైగా మగ్గించుకోవద్దు. ఎందుకంటే పచ్చడి గుజ్జు గుజ్జుగా రావాలంటే కాస్త మగ్గితే సరిపోతుంది.
• ఇక్కడ మీరు ఉల్లిపాయ వద్దనుకుంటే స్కిప్ చేసి పచ్చడిని ప్రిపేర్ చేసుకోవచ్చు.

Pallilu (Getty Images)

తీసుకోవాల్సిన పదార్థాలు :

• కొత్తిమీర - ఒక పెద్ద కట్ట(150 నుంచి 180 గ్రాములు)
• టమాటాలు - నాలుగైదు
• పల్లీలు - 1 టేబుల్​స్పూన్
• నూనె - అర టేబుల్​స్పూన్
• పచ్చిశనగపప్పు - అర టేబుల్​స్పూన్
• మినపప్పు - అర టేబుల్​స్పూన్
• ధనియాలు - ఒక టీస్పూన్
• జీలకర్ర - అరటీస్పూన్
• ఆవాలు - అరటీస్పూన్
• మెంతులు - పావుటీస్పూన్
• పచ్చిమిర్చి - ఐదారు
• ఎండుమిర్చి - 7 నుంచి 8
• తెల్ల నువ్వులు - 1 టేబుల్​స్పూన్
• చింతపండు - కొద్దిగా
• వెల్లుల్లి రెబ్బలు - 7 నుంచి 8
• ఉప్పు - రుచికి సరిపడా
• మీడియం సైజ్ ఉల్లిపాయ - ఒకటి

Kothimeera (Getty Images)

తయారీ విధానమిలా :

• ఈ రెసిపీ తయారీ కోసం ముందుగా టమాటాలను శుభ్రంగా కడిగి కాస్త పెద్ద సైజ్ ముక్కలుగా కట్ చేసుకోవాలి. అదేవిధంగా, కొత్తిమీరను తరుక్కొని శుభ్రంగా కడిగి పక్కన పెట్టుకోవాలి. అయితే, కొత్తిమీరను మరీ చిన్నగా కాకుండా కాస్త పెద్ద సైజ్​లోనే తరుక్కోవాలి.
• ఇప్పుడు స్టవ్ మీద పాన్ పెట్టుకొని ఆయిల్ వేసుకోవాలి. నూనె వేడి అయ్యాక పల్లీలు, పచ్చిశనగపప్పు, మినపప్పు వేసుకొని సన్నని సెగ మీద దోరగా వేయించుకోవాలి.
• అవి వేగాక ధనియాలు, జీలకర్ర, ఆవాలు, మెంతులు వేసి లో ఫ్లేమ్ మీద కొద్దిసేపు ఫ్రై చేసుకోవాలి.
• ఆ తర్వాత అందులో పచ్చిమిర్చి తుంపలు, ఎండుమిర్చిని వేసుకొని ఒక నిమిషం పాటు వేయించుకోవాలి.
• దినుసులన్నీ వేగాక చివరగా ఆ మిశ్రమంలో తెల్ల నువ్వులు వేసి వేడి మీద కొద్దిసేపు రోస్ట్ చేసుకొని స్టవ్ ఆఫ్ చేసుకోవాలి. ఆపై ఆ దినుసులను ఒక ప్లేట్​లోకి తీసుకొని పూర్తిగా చల్లార్చుకోవాలి.

Tomatoes (Getty Images)

• ఆలోపు స్టవ్ మీద అదే పాన్ ఉంచి మరో టేబుల్​స్పూన్ ఆయిల్ వేసుకొని వేడి చేసుకోవాలి.
• నూనె వేడయ్యాక మీడియం సైజ్​లో కట్ చేసుకున్న టమాటా ముక్కలు, శుభ్రంగా కడిగిన చింతపండు వేసి కలుపుతూ కాసేపు వేయించుకోవాలి.
• ఆ తర్వాత మూత పెట్టి మీడియం ఫ్లేమ్ మీద టమాటాలు సాఫ్ట్​గా మగ్గే వరకు కుక్ చేసుకోవాలి.
• టమాటాలు మగ్గిన తర్వాత అందులో కడిగి పక్కన పెట్టుకున్న కొత్తిమీర తరుగును వేసి కాసేపు మగ్గించుకోవాలి. అంతేకానీ, మరీ డ్రైగా అయ్యేంత వరకు మగ్గించుకోవాల్సిన పనిలేదు.
• కొత్తిమీరను మగ్గించుకునేటప్పుడే పొట్టు తీసిన వెల్లుల్లి రెబ్బలను వేసుకొని కొద్దిసేపు వేయించుకోవాలి.
• కొత్తిమీర మిశ్రమం చక్కగా మగ్గిన తర్వాత స్టవ్ చేసుకొని పాన్​ని దింపి పక్కనుంచాలి.

Kothimeera Chutney (ETV Bharat)

• ఇప్పుడు మిక్సీ జార్​లో ముందుగా వేయించుకున్న పల్లీల మిశ్రమం వేసుకొని కాస్త బరకగా మిక్సీ పట్టుకోవాలి.
• ఆ తర్వాత అందులో మగ్గించుకున్న కొత్తిమీర టమాటా మిశ్రమం, ఉప్పు వేసుకొని రోట్లో దంచుకొన్న మాదిరిగా కచ్చాపచ్చాగా గ్రైండ్ చేసుకోవాలి.
• అనంతరం పచ్చడిని ఒక గిన్నెలోకి తీసుకొని పక్కనుంచాలి. ఇప్పుడు అదే మిక్సీ జార్​లో పెద్ద సైజ్​ ఉల్లిపాయ ముక్కలు, కొద్దిగా ప్రిపేర్ చేసుకున్న పచ్చడిని వేసుకొని కచ్చాపచ్చాగా గ్రైండ్ చేయాలి.
• తర్వాత ఆ మిశ్రమాన్ని గిన్నెలోకి తీసుకున్న మిగిలిన పచ్చడిలో వేసుకొని మొత్తం కలిసేలా ఒకసారి బాగా కలుపుకోవాలి.
• ఇప్పుడు పచ్చడికి తాలింపుని సిద్ధం చేసుకోవాలి.

Tomato Kothimeera Chutney (ETV Bharat)

తాలింపు కోసం :

1. నూనె - 3 నుంచి 4 టేబుల్​స్పూన్లు
2. తాలింపు గింజలు - 2 టేబుల్​స్పూన్లు
3. కరివేపాకు - కొద్దిగా
4. ఇంగువ - చిటికెడు

• ముందుగా స్టవ్ మీద చిన్న కడాయి పెట్టుకొని ఆయిల్ వేసుకోవాలి. నూనె వేడయ్యాక పోపు దినుసులు వేసి దోరగా వేయించుకోవాలి.
• అవి వేగాక కరివేపాకు, ఇంగువ వేసి ఒకసారి కలిపి స్టవ్ ఆఫ్ చేసుకోవాలి. ఆ తర్వాత అందులో ముందుగా ప్రిపేర్ చేసుకున్న పచ్చడిని వేసి మొత్తం కలిసేలా బాగా మిక్స్ చేసుకోవాలి. అంతే, నోరూరించే కమ్మని "కొత్తిమీర టమాటా పచ్చడి" రెడీ అయిపోతుంది!
• ఈ పచ్చడిని మిక్సీలో కంటే రోట్లో దంచుకుంటే టేస్ట్ అనేది మరింత అద్భుతంగా ఉంటుంది. రోలు అందుబాటులో లేనివారు మిక్సీలో ప్రిపేర్ చేసుకోవచ్చు.