How to Make Tomato Coconut Chutney : మార్నింగ్ టిఫెన్స్లోకి కొబ్బరి చట్నీని చాలా మంది ఇష్టపడతారు. అయితే.. ఎప్పుడూ ఒకేలా కాకుండా ఈసారి కాస్త వెరైటీగా ట్రై చేయండి. అందుకే.. మీకోసం 'టమాటా - కొబ్బరి చట్నీ' రెసిపీ తీసుకొచ్చాం. చాలా తక్కువ పదార్థాలతో.. తక్కువ టైమ్లో దీన్ని ప్రిపేర్ చేసుకోవచ్చు. పైగా టేస్ట్ మస్త్ ఉంటుంది! మరి, ఈ చట్నీ తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఈ స్టోరీలో తెలుసుకుందాం.
కావాల్సిన పదార్థాలు :
- టమాటాలు - 300 గ్రాములు
- నూనె - 4 టీస్పూన్లు
- ఆవాలు - అరటీస్పూన్
- జీలకర్ర - అరటీస్పూన్
- శనగపప్పు - ఒక టీస్పూన్
- మినప పప్పు - ఒక టీస్పూన్
- ఎండుమిర్చి - 6
- పచ్చిమిర్చి - 6
- కరివేపాకు - 1 రెబ్బ
- పచ్చికొబ్బరి ముక్కలు - 1 కప్పు
- ఉప్పు - రుచికి సరిపడా
- చింతపండు - గోలి సైజంత
తాలింపు కోసం :
- నూనె - 1 టేబుల్స్పూన్
- జీలకర్ర - అరటీస్పూన్
- ఆవాలు - అరటీస్పూన్
- కరివేపాకు - 1 రెమ్మ
తయారీ విధానం :
- ఇందుకోసం ముందుగా రెసిపీలోకి కావాల్సిన టమాటా, పచ్చి కొబ్బరిని శుభ్రంగా కడిగి చిన్న ముక్కలుగా కట్ చేసుకొని పక్కన పెట్టుకోవాలి.
- ఇప్పుడు స్టౌపై పాన్ పెట్టుకొని రెండు టీస్పూన్ల ఆయిల్ వేసుకోవాలి. అది కాస్త వేడెక్కాక ఆవాలు, జీలకర్ర, శనగపప్పు, మినప పప్పు, ఎండుమిర్చి వేసి కాసేపు వేయించుకోవాలి.
- తాలింపు బాగా వేగిందనుకున్నాక.. అప్పుడు కారం గల పచ్చిమిర్చి ముక్కలు వేసి మరోసారి మిశ్రమాన్ని ఫ్రై చేసుకోవాలి. ఆ తర్వాత కరివేపాకు కూడా వేసి కాసేపు వేయించుకోవాలి.
- ఇప్పుడు అందులో ముందుగా కట్ చేసి పెట్టుకున్న పచ్చికొబ్బరి ముక్కలను వేసి మూడు నిమిషాల పాటు బాగా ఫ్రై చేసుకోవాలి.
- అనంతరం ఆ మిశ్రమాన్ని మిక్సీ జార్లోకి తీసుకుని పక్కన ఉంచుకోవాలి.
- ఆ తర్వాత అదే పాన్లో రెండు టీస్పూన్ల నూనె పోసుకొని వేడి చేసుకోవాలి. ఆయిల్ కాస్త హీట్ అయ్యాక.. ముందుగా కట్ చేసి పెట్టుకున్న టమాటా ముక్కలను వేసి బాగా మగ్గించుకోవాలి.
- టమాటా ముక్కలు బాగా మగ్గాయనుకున్నాక స్టౌ ఆఫ్ చేసుకొని దించుకోవాలి. ఆపై దాన్ని ముందుగా మిక్సీ జార్లోకి తీసుకున్న కొబ్బరి మిశ్రమంలో వేసుకోవాలి.
- అలాగే.. ఉప్పు, చింతపండు, కొద్దిగా వాటర్ యాడ్ చేసుకొని మెత్తని పేస్ట్లాగా గ్రైండ్ చేసుకోవాలి. తర్వాత పచ్చడికి తాలింపు పెట్టుకోవాలి.
- ఇందుకోసం స్టౌపై పాన్ పెట్టుకొని ఆయిల్ వేసుకోవాలి. అది హీట్ అయ్యాక జీలకర్ర, ఆవాలు, కరివేపాకు వేసుకొని వేయించుకోవాలి.
- తాలింపు వేగాక దాన్ని మిక్సీ పట్టుకున్న పచ్చడిలో కలుపుకుంటే చాలు. అంతే.. ఎంతో టేస్టీగా ఉండే "టమాటా కొబ్బరి చట్నీ" రెడీ!
- ఈ చట్నీని దోశలు, గారెలు.. ఇలా టిఫెన్స్లోకి మాత్రమే కాదు అన్నంలో వేసుకొని తిన్నా టేస్ట్ చాలా బాగుంటుంది!
ఇవీ చదవండి :
అదుర్స్ అనిపించే "హోటల్ స్టైల్ కొబ్బరి చట్నీ" - రుచికే కాదు ఆరోగ్యానికీ ఈ పచ్చడి మంచిదే!
టిఫెన్ స్పెషల్ : "రాయలసీమ పల్లీ చట్నీ" - పదే పది నిమిషాల్లో రెడీ!
