Tatsy and Healthy Biscuits: 'బిస్కెట్లు' చిన్న పిల్లల ఫేవరెట్ ఐటమ్. ఇక వీటిల్లో కూడా ఎన్నో రకాల ఫ్లేవర్లు ఉన్నాయి. అందుకే బయటికి వెళ్లారంటే, కచ్చితంగా రెండు మూడు రకాల ఫ్లేవర్స్ కలిగిన ప్యాకెట్లు కొనాల్సిందే. ఇక వీటిని కొద్దిమంది టీ లేదా పాలలో ముంచుకుని తింటే, మరికొద్దిమంది నేరుగా తింటుంటారు. ఎలా తిన్నా వీటి టేస్ట్ అద్దిరిపోతాయి. అయితే ఇకపై బిస్కెట్లు తినాలనిపించినప్పుడు బయట మార్కెట్లో కొనకుండా ఇంట్లోనే చాలా సింపుల్గా ప్రిపేర్ చేసుకోవచ్చు. అందుకు మీకోసం రెండు రకాల బిస్కెట్ రెసిపీలు తీసుకొచ్చాం. వీటి టేస్ట్ అద్దిరిపోతాయి. మరి లేట్ చేయకుండా ఆ బిస్కెట్లు ఎలా తయారు చేసుకోవాలో చూసేయండి.
కొబ్బరి బిస్కెట్లు:
కావలసినవి:
- మైదా - అర కప్పు
- వెన్న - అర కప్పు
- పంచదార పొడి -అర కప్పు
- ఎండు కొబ్బరి తురుము - అర కప్పు
- ఉప్పు - చిటికెడు
- బేకింగ్ పౌడర్ - చెంచా
- మిల్క్‌ పౌడర్ - 3 టేబుల్‌ స్పూన్లు
- చిక్కటి పాలు - 3 చెంచాలు
తయారీ విధానం:
- ఓ ప్లేట్లోకి బటర్, షుగర్ పౌడర్ వేసి 5 నిమిషాల పాటు హై స్పీడ్లో బీట్ చేయాలి.
- ఆపై అందులోకి మైదా, కొబ్బరి తురుము, మిల్క్‌ పొడి, పాలు, బేకింగ్ పౌడర్, ఉప్పు వేసి బాగా మిక్స్ చేసుకోవాలి.
- బేకింగ్ ట్రే లేదా ఓ స్టీల్ ప్లేట్ తీసుకుని లైట్గా బటర్ అప్లై చేయాలి.
- ఆ తర్వాత ఐస్‌క్రీమ్‌ స్కూప్‌తో చిన్న ఉండల్లా తీసి బిస్కెట్లుగా చేయాలి. ఇలా చేసిన బిస్కెట్స్ను ఎండు కొబ్బరి తురుములో డిప్ చేసి రెండువైపులా కోట్ చేయాలి.
- ఇలా కోట్ చేసిన బిస్కెట్లను బటర్ అప్లై చేసిన ప్లేట్ లేదా ట్రేలో ఉంచాలి. మిగిలిన పిండితో కూడా ఇలానే చేసి ప్లేట్లో పెట్టుకోవాలి.
- అవెన్‌ను 170 డిగ్రీల వద్ద ప్రీహీట్ చేసి 18 నిమిషాలు బేక్‌ చేయాలి. అదే ఓవెన్ లేకుండా అయితే స్టవ్ ఆన్ చేసి అడుగు మందంగా ఉన్న పాన్ పెట్టి అందులో ఒక లేయర్ వరకు ఇసుక లేదా ఉప్పు పోసుకోవాలి.
- ఆపై దాని మధ్యలో స్టాండ్ లేదా ప్లేట్ ఉంచి మూత పెట్టి హై ఫ్లేమ్లో పది నిమిషాలు ప్రీహీట్ చేసుకోవాలి.
- ఆ తర్వాత మూత తీసి కొబ్బరి బిస్కెట్లు ఉన్న ప్లేట్ను స్టాండ్ మీద ఉంచి మూత పెట్టి సిమ్లో 25 నుంచి 30 నిమిషాలు కుక్ చేసుకోవాలి.
- బిస్కెట్లు రెడీ అయిన తర్వాత స్టవ్ ఆఫ్ చేసి ఓ 5 నిమిషాల తర్వాత మూత తీస్తే తియ్యటి కొబ్బరి బిస్కెట్లు రెడీ.
నాన్ ఖటాయ్
కావలసినవి:
- గోధుమపిండి - పావు కేజీ
- నెయ్యి - 125 గ్రాములు
- యోగర్ట్ - 125 గ్రాములు
- ఐసింగ్‌ షుగర్ - పావు కప్పు
- శనగపిండి - 125 గ్రాములు
- యాలకుల పొడి - అర చెంచా
- డ్రై ఫ్రూట్స్‌ పలుకులు - గుప్పెడు
తయారీ:
- మిక్సింగ్‌ బౌల్‌లోకి గోధుమపిండి, నెయ్యి, యోగర్ట్, పంచదార పొడి, శనగపిండి, యాలకుల పొడి వేసి బాగా మిక్స్ చేసుకోవాలి.
- ఇప్పుడు బేకింగ్ ట్రే లేదా ఓ స్టీల్ ప్లేట్ తీసుకుని లైట్గా బటర్ అప్లై చేయాలి.
- పిండిని బాగా కలుపుకున్న తర్వాత కొద్దికొద్దిగా తీసుకుని గుండ్రటి బిస్కెట్లు చేయాలి. ఆ బిస్కెట్ల మధ్యలో లైట్గా గాటు పెట్టి డ్రై ఫ్రూట్స్‌ పలుకులు చల్లి బేకింగ్ ట్రేలో సెట్ చేసుకోవాలి. ఒకదానికొకటి తగలకుండా కొంచెం ఖాళీ ఉండాలి.
- అవెన్‌ను ప్రీహీట్ చేసి 180 డిగ్రీల వద్ద 18 నిమిషాలు బేక్‌ చేయాలి. అదే ఓవెన్ లేకుండా అయితే స్టవ్ ఆన్ చేసి అడుగు మందంగా ఉన్న పాన్ పెట్టి అందులో ఒక లేయర్ వరకు ఇసుక లేదా ఉప్పు పోసుకోవాలి.
- ఆపై దాని మధ్యలో స్టాండ్ లేదా ప్లేట్ ఉంచి మూత పెట్టి హై ఫ్లేమ్లో పది నిమిషాలు ప్రీహీట్ చేసుకోవాలి.
- ఆ తర్వాత మూత తీసి బిస్కెట్లు ఉన్న ప్లేట్ను స్టాండ్ మీద ఉంచి మూత పెట్టి సిమ్లో 20 నుంచి 25 నిమిషాలు కుక్ చేసుకోవాలి.
- బిస్కెట్లు రెడీ అయిన తర్వాత స్టవ్ ఆఫ్ చేసి చల్లారాక చూస్తే నాన్ ఖటాయ్ రెడీ. నచ్చితే మీరూ ఈ బిస్కెట్లను రెడీ చేసి పిల్లలకు పెట్టండి.
క్రిస్పీ అండ్ టేస్టీ "వంకాయ పకోడీ" - ఇలా చేసుకుంటే 15 రోజులు నిల్వ! - నూనె పీల్చవు!
ఓవెన్, ఈస్ట్ లేకుండానే "దిల్పసంద్"- ప్రిపరేషన్ వెరీ ఈజీ - బేకరీ స్టైల్ టేస్ట్ పక్కా!
