Tasty Dileepa Payasam: 'పాయసం' స్వీట్ రెసిపీలలో మెజార్టీ జనం ఎక్కువగా తినేది. పండగలు, వ్రతాలు, పూజల సమయాల్లో చాలా మంది ఈ రెసిపీని ప్రిపేర్ చేస్తుంటారు. ఇక ఈ పాయసాన్ని కూడా చాలా మంది వివిధ రకాలుగా చేస్తుంటారు. కొందరు బియ్యంతో చేస్తే, మరికొందరు సగ్గుబియ్యంతో చేస్తారు. ఇంకొందరు సేమ్యా పాయసం చేస్తారు. మరి మీరు ఎప్పుడైనా దిలీప పాయసం తిన్నారా? చాలా రుచికరంగా ఉండే ఈ పాయసం అలా నోట్లో వేసుకోగానే ఇలా కరిగిపోతుంది. పైగా చాలా తక్కువ పదార్థాలతో తయారు చేసుకోవచ్చు. ఈ పాయసాన్నే పెసరపప్పు పాయసం కూడా అంటారు. మరి లేట్ చేయకుండా ఈ రెసిపీపై ఓ లుక్కేయండి.
కావాల్సిన పదార్థాలు:
- పెసరపప్పు - 2 కప్పులు
- నెయ్యి - తగినంత
- బెల్లం - రెండున్నర కప్పులు
- యాలకుల పొడి - అర టీ స్పూన్
- పాలు - 3 కప్పులు
- జీడిపప్పు - 10
- కిస్మిస్ - 10
తయారీ విధానం:
- ముందుగా పాలను బాగా మరిగించి చల్లార్చుకోవాలి.
- స్టవ్ ఆన్ చేసి మందపాటి గిన్నె పెట్టి నీళ్లు పోసుకోవాలి. ఇక్కడ నీళ్లను పెసరపప్పు ఉడకడానికి సరిపడేలా పోసుకుంటే సరిపోతుంది. అంటే రెండు కప్పుల పెసరపప్పుకు మూడు లేదా నాలుగు కప్పుల నీరు పోసుకుంటే సరిపోతుంది. ఈ నీటిని మరిగించుకోవాలి.
- ఇంకో స్టవ్ ఆన్ చేసి పాన్ పెట్టి నెయ్యి వేసి వేడి చేసుకోవాలి. అందులోకి జీడిపప్పు, కిస్మిస్ వేసి ఎర్రగా వేయించుకుని పక్కకు పెట్టుకోవాలి.
- అదే నెయ్యిలో పెసరపప్పు వేసి దోరగా వేయించుకుని స్టవ్ ఆఫ్ చేసి మరుగుతున్న నీటిలో వేసుకోవాలి.
- పెసరపప్పును మధ్యమధ్యలో కలుపుతూ ఉడికించుకోవాలి. పప్పు బాగా ఉడికిన తర్వాత బెల్లం తురుము వేసి కలుపుకోవాలి.
- బెల్లం కరిగి ఉడుకుతున్నప్పుడు వేయించిన డ్రైఫ్రూట్స్ను కొన్ని, యాలకుల పొడి వేసి కలుపుకోవాలి.
- పప్పు, బెల్లం బాగా ఉడికిన తర్వాత స్టవ్ ఆఫ్ చేసి పక్కన ఉంచాలి. ఇప్పుడు ఆ పాయసంలోకి కాచి చల్లార్చిన పాలను పోసుకోవాలి.
- ఇప్పుడు ఈ పాయసాన్ని ఓ బౌల్లోకి తీసుకని మిగిలిన డైఫ్రూట్స్తో గార్నిష్ చేసుకుంటే దిలీప పాయసం రెడీ. నచ్చితే మీరూ ట్రై చేయండి.
చిట్కాలు:
- పప్పును వేయించుకుండానే ఓసారి కడిగి కుక్కర్లో ఉడికించినా సరిపోతుంది.
- పాల బదులు చిక్కటి కొబ్బరి పాలు పోసి చేసుకున్నా రుచి అద్దిరిపోతుంది.
- కేవలం జీడిపప్పు, కిస్మిస్ మాత్రమే కాకుండా బాదం, చిరోంజి వంటి ఇతర డ్రైఫ్రూట్స్ కూడా యాడ్ చేసుకోవచ్చు.
సమ్మర్ స్పెషల్ "తాటిముంజల పాయసం" - మండుటెండల్లో కూల్కూల్గా ఒక్కో గుటక వేస్తుంటే ఆ మజానే వేరు!
