రెండే రెండు ఉల్లిపాయలతో కిర్రాక్ "చట్నీ" - బ్రేక్ఫాస్ట్ ఏదైనా పర్ఫెక్ట్ కాంబినేషన్ - నిమిషాల్లో రెడీ!
- ఇంటిల్లిపాదీ మెచ్చే సూపర్ పచ్చడి - కేవలం నిమిషాల్లోనే రెడీ!
Published : May 14, 2025 at 7:06 PM IST
Tasty and Instant Onion Chutney: బ్రేక్ఫాస్ట్ ఏదైనా అందులోకి కాంబినేషన్గా చట్నీ ఉండాల్సిందే. అయితే మెజార్టీ జనాలు టిఫెన్స్లోకి పల్లీ చట్నీ చేస్తుంటారు. రెగ్యులర్గా అదే తినాలంటే కాస్త బోర్ కొడుతుంది. కొత్తగా ఏదైనా పచ్చడి చేయొచ్చు కదా అని అమ్మలను అడుగుతుంటారు. దీంతో టిఫెన్స్లోకి ఏం చేయాలా అని తెగ ఆలోచిస్తుంటారు. అయితే ఇకపై అలా ఆలోచించాల్సిన అవసరం లేకుండా ఈ పచ్చడి చేసుకోండి. అదే ఉల్లిపాయ పచ్చడి. ఈ పచ్చడిని చాలా రకాలుగా చేసి ఉంటారు కానీ, ఓసారి ఈ పద్దతిలో చేసుకోండి. టిఫెన్ కన్నా పచ్చడే ఎక్కువ తినేస్తారు. పైగా ఈ పచ్చడి కోసం ఎక్కువ ఉల్లిపాయలు అవసరం లేదు. జస్ట్ రెండు ఉల్లిపాయలు చాలు. చేసుకోవడం కూడా నిమిషాల్లో పని. మరి లేట్ చేయకుండా ఈ ఆనియన్ చట్నీ ఎలా చేయాలో చూసేయండి.
కావాల్సిన పదార్థాలు:
- నూనె - 2 టీస్పూన్లు
- ఉల్లిపాయలు - 2(మీడియం సైజ్)
- ఎండుమిర్చి - 10
- వెల్లుల్లి రెబ్బలు - 15
- చింతపండు - ఉసిరికాయ సైజ్
- ఉప్పు - రుచికి సరిపడా
తాలింపు కోసం:
- నూనె - 2 టీస్పూన్లు
- ఆవాలు - అర టీస్పూన్
- జీలకర్ర - అర టీస్పూన్
- శనగపప్పు - అర టీస్పూన్
- మినపప్పు - అర టీస్పూన్
- కరివేపాకు - 2 రెమ్మలు
తయారీ విధానం:
- ముందుగా ఉల్లిపాయల పొట్టు తీసేసి పొడుగ్గా, మీడియం సైజ్లో కట్ చేసుకుని పక్కన ఉంచాలి. అలాగే వెల్లుల్లి రెబ్బలను పొట్టు తీసి పెట్టుకోవాలి.
- స్టవ్ ఆన్ చేసి నూనె పోసి ఉల్లిపాయ ముక్కలు వేసి అవి సెపరేట్ అయ్యేంతవరకు వేయించాలి.
- ఉల్లిపాయలు లైట్గా మగ్గిన తర్వాత వెల్లుల్లి రెబ్బలు వేసి లో ఫ్లేమ్లో 2 నిమిషాల పాటు వేయించుకోవాలి. ఆ తర్వాత తొడిమలు తీసేసిన ఎండుమిర్చి వేసి కలిపి మరో నిమిషం వేయించుకోవాలి.
- చివరగా చింతపండు వేసి ఓ నిమిషం సేపు వేయించి స్టవ్ ఆఫ్ చేసి పూర్తిగా చల్లారనివ్వాలి.
- ఈ మిశ్రమం చల్లారిన తర్వాత మిక్సీజార్లో వేసి ముందుగా కచ్చాపచ్చాగా గ్రైండ్ చేసుకోవాలి.
- ఆ తర్వాత కొద్దిగా వాటర్, ఉప్పు వేసి వీలైనంత మెత్తగా గ్రైండ్ చేసుకోవాలి. అలాగే నీళ్లను మరీ ఎక్కువగా, మరీ తక్కువగా కాకుండా పోసుకోవాలి.
- ఇలా గ్రైండ్ చేసిన పచ్చడిని ఓ గిన్నెలోకి తీసుకోవాలి. ఇప్పుడు దీనికి తాలింపు పెట్టుకోవాలి.
- స్టవ్ ఆన్ చేసి కడాయి పెట్టి నూనె వేసుకోవాలి. ఆయిల్ హీటెక్కిన తర్వాత ఆవాలు, జీలకర్ర, మినప్పప్పు, శనగపప్పు వేసి లో ఫ్లేమ్లో ఎర్రగా వేయించాలి.
- ఇవి వేగిన తర్వాత కరివేపాకు వేసి క్రిస్పీగా వేయించి స్టవ్ ఆఫ్ చేయాలి. చివరగా ఈ తాలింపును పచ్చడిలో కలుపుకుంటే సూపర్ టేస్టీగా ఉండే ఉల్లిపాయ చట్నీ రెడీ. నచ్చితే మీరూ ట్రై చేయండి.
చిట్కాలు:
- ఈ పచ్చడి కోసం ఉల్లిపాయలు పెద్దది అయితే ఒకటి, మీడియం సైజ్వి అయితే రెండు తీసుకోవాలి.
- మీరు తినే కారానికి అనుగుణంగా ఎండుమిర్చి తీసుకోవాలి. ఒకవేళ మీ దగ్గర ఎండుమిర్చి లేకపోతే ఉల్లిపాయలను గ్రైండ్ చేసే ముందు ఎండు కారం అయినా కలుపుకోవచ్చు.
- ఉల్లిపాయలను నూనెలో వేయించేటప్పుడు అవి మరీ రంగు మారకూడదని గుర్తించుకోవాలి. లైట్గా మగ్గితే చాలు.
- మీకు పచ్చడి పల్చగా కావాలనుకుంటే నీళ్లు ఎక్కువ కలుపుకోవచ్చు. కానీ ఈ పచ్చడి కాస్త గట్టిగా ఉంటేనే రుచి బాగుంటుంది.
క్యాటరింగ్ స్టైల్ "టమాటా పచ్చడి" - పుల్ల పుల్లగా అద్దిరిపోతుంది - అన్నం, టిఫెన్స్లోకి పర్ఫెక్ట్!
అమ్మమ్మల కాలం నాటి కమ్మని "పెసరపప్పు పచ్చడి" - సమ్మర్లో ఒంటికి చలువ, పొట్టకి హాయి!
