ఘాటు ఘాటుగా "అల్లం చారు" - ఈ సీజన్​లో ఒక్కసారైనా ట్రై చేయాల్సిందే!

Tasty Allam Charu Recipe : వర్షాకాలంలో మారిన వాతావణం కారణంగా చాలా మంది జ్వరం, జలుబు, దగ్గు వంటి సీజనల్ ప్రాబ్లమ్స్​తో బాధపడుతుంటారు. దాంతో నోటికి ఏం తిందామన్నా రుచికరంగా అనిపించదు. అలాగే, మరికొందరు చల్లని వేళ ఊరించే కూరలెన్నున్నా, కమ్మగా చారుతో తినడానికి ఇష్టపడుతుంటారు. అలాంటి వారందరి కోసం సింపుల్​గా ప్రిపేర్​ చేసుకునే ఒక సూపర్ రసం రెసిపీని తీసుకొచ్చాం. అదే, స్పైసీ అండ్ టేస్టీ "అల్లం చారు". ఇలా చేసి పెట్టారంటే ఇంటిల్లిపాదీ వేడివేడి అన్నంలో రోజూ తినే దానికంటే నాలుగు ముద్దలు ఎక్కువే లాగిస్తారు! పిల్లలకు కూడా ఈ చారు చాలా బాగా నచ్చుతుంది. మరి, ఘాటు ఘాటుగా ఘుమాయించే ఈ రెసిపీకి కావాల్సిన ఇంగ్రీడియంట్స్ ఏంటి? ఎలా రెడీ చేసుకోవాలో ఇప్పుడు చూద్దాం.

అల్లం (Getty Images)

అవసరమైన పదార్థాలు :

• మూడు చెంచాలు - కందిపప్పు
• రెండు - కరివేపాకు రెబ్బలు
• పావుచెంచా - పసుపు
• ఒకట్రెండు - టమాటాలు
• చెంచా - మిరియాలు
• అంగుళం ముక్క - అల్లం
• ఆరు - వెల్లుల్లి రెబ్బలు
• చెంచా - జీలకర్ర
• అరచెంచా - ధనియాలు
• రెండు చెంచాలు - కొత్తిమీర తరుగు
• మూడు చెంచాలు - నిమ్మరసం
• రుచికి తగినంత - ఉప్పు

ఘుమఘుమలాడే "టమాటా రసం" - ఇలా చేస్తే ఫ్యామిలీ మొత్తం రుచికి ఫిదా!

కందిపప్పు (Getty Images)

తయారీ విధానం :

• సింపుల్​గా చేసుకునే ఈ చారు తయారీ కోసం అరగంట ముందుగా ఒక గిన్నెలో కందిపప్పుని తీసుకొని శుభ్రంగా కడిగి నానబెట్టుకోవాలి.
• అరగంట తర్వాత బాగా నానిన కందిపప్పుని కుక్కర్ గిన్నెలోకి తీసుకొని పసుపు, కరివేపాకు, టమాటా ముక్కలు వేసి తగినన్ని నీళ్లు పోసి నాలుగైదు విజిల్స్ పాటు ఉడికించుకోవాలి.
• పప్పు మిశ్రమం మెత్తగా ఉడికి ప్రెషర్ మొత్తం పోయాక మూత తీసి అందులో అరలీటర్ నీళ్లను పోసి కలిపి ఒకసారి మిశ్రమాన్ని మెత్తగా మెదుపుకోవాలి.
• ఆపై ఆ మిశ్రమాన్ని మరో గిన్నెలోకి వడకట్టి పలుచటి పప్పు నీళ్లని మాత్రమే తీసుకోవాలి.

మిరియాలు (Getty Images)

• ఇప్పుడు చిన్న మిక్సీ గిన్నెలో మిరియాలు, జీలకర్ర, వెల్లుల్లి, అల్లం, ధనియాలు వేసుకొని కచ్చాపచ్చాగా పొడిలా మిక్సీ పట్టుకొని పక్కనుంచాలి.
• అనంతరం చారు తయారీకి స్టవ్‌ మీద వడకట్టుకున్న పప్పు నీళ్లు ఉన్న గిన్నె పెట్టి స్టవ్​ను లో ఫ్లేమ్​లో ఉంచి అందులో టేస్ట్​కి సరిపడా ఉప్పు, కచ్చాపచ్చాగా మిక్సీ పట్టుకున్న మిరియాలు-అల్లం మిశ్రమాన్ని వేసుకుని ఒకసారి బాగా కలపాలి.
• ఆపై లో టూ మీడియం ఫ్లేమ్​లో ఆ మిశ్రమం ఒక పొంగు వచ్చేంత వరకు బాగా మరిగించుకోవాలి.
• ఆ మిశ్రమాన్ని బాగా మరిగించుకున్నాక స్టవ్ ఆఫ్ చేసుకొని అందులో నిమ్మరసం యాడ్ చేసుకొని కొత్తిమీర తరుగు వేసుకోవాలి. ఇప్పుడు ఆ చారుకు తాలింపును సిద్ధం చేసుకోవాలి.

కమ్మని "పుదీనా టమాటా పచ్చడి" - పచ్చిమిర్చి స్పెషల్ - రైస్, టిఫెన్లకు చక్కటి జోడి!

నిమ్మరసం (Getty Images)

తాలింపు కోసం :

• నూనె - ఒకట్రెండు చెంచాలు
• ఆవాలు - అరచెంచా
• మెంతులు - పావు చెంచా
• ఎండుమిర్చి - రెండు
• ఇంగువ - చిటికెడు
• కరివేపాకు - రెండు రెబ్బలు

పోపు దినుసులు (Getty Images)

• ఇందుకోసం స్టవ్ మీద చిన్న పాన్ పెట్టుకొని అందులో నూనె పోసి వేడి చేసుకోవాలి. ఆయిల్ హీట్ అయ్యాక ఆవాలు, మెంతులు వేసి వేయించాలి.
• అవి లైట్​గా వేగాక ఎండుమిర్చి తుంపలు, కరివేపాకు, ఇంగువ వేసుకొని పోపును చక్కగా వేయించుకొని స్టవ్ ఆఫ్ చేసుకోవాలి.
• అనంతరం మంచిగా వేగిన తాలింపును ముందుగా ప్రిపేర్ చేసుకున్న చారులో వేసుకొని ఒకసారి అంతా కలిసేలా మిక్స్ చేసుకుంటే చాలు. అంతే, కమ్మని రుచితో నోరూరించే "అల్లం నిమ్మకాయ చారు" రెడీ అవుతుంది!

అన్నం వార్చిన గంజితో సూపర్ టేస్టీ "అట్లు" - అప్పటికప్పుడు నిమిషాల్లోనే చేసుకోవచ్చు!