Summer Special Majjiga Charu Recipe: మజ్జిగ చారు ఎండాకాలంలో మెజార్టీ పీపుల్ అన్నంలో పోసుకుని తింటుంటారు. అయితే దీనిని ఒక్కొక్కరు ఒక్కో స్టైల్లో చేస్తుంటారు. కానీ ఎవరు ఎలా చేసినా టేస్ట్ మాత్రం చాలా బాగుంటుంది. పైగా ఎక్కువ కష్టపడకుండా చాలా సింపిల్గా ప్రిపేర్ చేసుకోవచ్చు. ఈ క్రమంలోనే మీకోసం వేరే పద్ధతిలో చేసుకునే మజ్జిగ చారు తీసుకొచ్చాం. చాలా అంటే చాలా ఈజీగా, ఎక్కువ కష్టపడకుండానే చేసుకోవచ్చు. పైగా పెద్దగా పదార్థాలు కూడా అవసరం పడదు. అంతేకాకుండా మొదటిసారి చేసే వారు కూడా అదుర్స్ అనిపించేలా చేస్తారు. మరి లేట్ చేయకుండా ఈ మజ్జిగ చారును ఎలా తయారు చేసుకోవాలో ఈ స్టోరీలో చూద్దాం.
కావాల్సిన పదార్థాలు:
- పెరుగు - 500 గ్రాములు
- పచ్చిమిర్చి - 4
- అల్లం ముక్క - కొద్దిగా
- ఉప్పు- రుచికి సరిపడా
- నూనె - 2 టేబుల్ స్పూన్లు
- ఆవాలు - అర టీ స్పూన్
- జీలకర్ర - అర టీ స్పూన్
- పచ్చి శనగపప్పు - అర టీ స్పూన్
- మినప్పప్పు - అర టీ స్పూన్
- దంచిన వెల్లుల్లి రెబ్బలు - 4
- ఎండుమిర్చి - 3
- కరివేపాకు - 3 రెమ్మలు
- పసుపు - అర టీ స్పూన్
- ఉల్లిపాయ - 2
తయారీ విధానం:
- మిక్సింగ్ బౌల్లోకి పెరుగు తీసుకుని విస్కర్ సాయంతో బాగా చిలకాలి. పెరుగును ఎంత క్రిమీగా చేసుకుంటే మజ్జిగ చారు అంత టేస్టీగా ఉంటుంది.
- ఇప్పుడు ఈ పెరుగులోకి రుచికి సరిపడా ఉప్పు, సరిపడా నీళ్లు పోసి బాగా కలపాలి. అయితే ఇక్కడ నీళ్ల క్వాంటిటీ అనేది మీరు తినేదానికి అనుగుణంగా కలుపుకోవాలి.
- ఇలా పెరుగు, ఉప్పు, నీళ్లు బాగా కలుపుకున్న తర్వాత గిన్నెను పక్కన ఉంచాలి.
- మిక్సీజార్లో పచ్చిమిర్చి, అల్లం ముక్క వేసి కచ్చాపచ్చాగా గ్రైండ్ చేసుకోవాలి. రోట్లో దంచుకుంటే రుచి ఇంకా బాగుంటుంది.
- ఈ పచ్చిమిర్చి పేస్ట్ను పెరుగు మిశ్రమంలో కలిపి పక్కన ఉంచాలి.
- స్టవ్ ఆన్ చేసి పాన్ పెట్టి నూనె పోసుకోవాలి. ఆయిల్ హీటెక్కిన తర్వాత తాలింపు గింజలు(ఆవాలు, జీలకర్ర, మినపప్పు, శనగపప్పు) వేసి చిటపటలాడించాలి.
- తాలింపు వేగిన తర్వాత దంచిన వెల్లుల్లి రెబ్బలు వేసి ఓ నిమిషం పాటు వేయించాలి. ఆ తర్వాత ఎండుమిర్చి వేసి మరో రెండు నిమిషాలు వేయించిన తర్వాత ఉల్లిపాయ ముక్కలు వేసి ఫ్రై చేయాలి.
- ఉల్లిపాయ ముక్కలను లైట్గా ఫ్రై చేసిన తర్వాత కరివేపాకు, పసుపు వేసి కలిపి మగ్గించిన తర్వాత కలిపి పెట్టుకున్న మజ్జిగ మిశ్రమాన్ని పోసి ఓ నిమిషం పాటు కలిపి స్టవ్ ఆఫ్ చేయాలి.
- చివరగా కొత్తిమీర తరుగు వేసి సర్వ్ చేసుకుంటే కమ్మగా ఉండే మజ్జిగ చారు రెడీ. నచ్చితే మీరూ ట్రై చేయండి.
టిప్స్:
- మజ్జిగ చారు కోసం ఉపయోగించే పెరుగు పుల్లగా ఉంటే రుచి బాగుంటుంది. ఒకవేళ మీ దగ్గర పుల్లటి పెరుగు లేకపోతే మజ్జిగ చారు రెడీ అయిన తర్వాత రెండు చుక్కల నిమ్మరసం పిండుకుంటే సరి.
- ఈ రెసిపీ కోసం ఉపయోగించే ఉల్లిపాయలను మరీ మెత్తగా ఫ్రై చేయకూడదు. ఒక నిమిషం వేయిస్తే సరిపోతుంది.
- కావాలనుకుంటే తాలింపులో చిటికెడు ఇంగువ వేస్తే రుచి మరింత బాగుంటుంది.
- పచ్చిమిర్చి, అల్లం పేస్ట్ వేయడం వల్ల చారు మంచి రుచితో రెడీ అవుతుంది. ఒకవేళ ఈ పేస్ట్ వద్దనుకుంటే మీ కారానికి తగినట్లుగా ఎండుకారం వేసుకుంటే సరిపోతుంది.
ఘుమఘుమలాడే "చికెన్ మజ్జిగ పులుసు" - ఈ పద్ధతిలో చేస్తే మెతుకు కూడా మిగల్చరు!
చల్లచల్లని "మామిడికాయ మజ్జిగ పులుసు" - ట్రెడిషనల్ టేస్ట్, ట్రెండీ లుక్లో - 5 నిమిషాల్లో రెడీ!
