ఐస్​క్రీమ్​ కావాలని పిల్లలు మారం చేస్తున్నారా? - ఇలా "కొబ్బరి"తో చేయండి - ఎంజాయ్​ చేస్తారు!

-అందరూ ఇష్టంగా తినే టేస్టీ ఐస్​క్రీమ్ -చాలా ఈజీగా ప్రిపేర్​ చేసుకోండి!

Summer Special Coconut Ice Cream: ఎండాకాలం వచ్చిందంటే పిల్లలు ఇష్టంగా తినే ఆహారాల్లో ఐస్​క్రీమ్​ ముందు వరుసలో ఉంటుంది. స్వీట్​గా, వెన్నలా కరిగిపోయే ఐస్​ను పిల్లలు చాలా ఇష్టపడతారు. అయితే అడుగుతున్నారు కదా అని చాలా మంది పేరెంట్స్​ పార్లర్స్​, షాప్స్​ నుంచి కొనుగోలు చేసి తెస్తుంటారు. అవి ఆరోగ్యానికి అంత హెల్దీ కావు. కాబట్టి పిల్లల కోసం కొంచెం కష్టమైనా సరే ఇంట్లో చేసుకోవడం చాలా మంచిది. అందుకోసమే అద్దిరిపోయే టేస్టీ అండ్​ హెల్దీ కోకోనట్​ ఐస్​క్రీమ్​ రెసిపీ తీసుకొచ్చాం. దీనిని చాలా సింపిల్​గా ప్రిపేర్​ చేసుకోవచ్చు. కేవలం అరగంటలో రెడీ అయ్యే ఈ ఐస్​ టేస్ట్​ వేరె లెవల్​ ఉంటుంది. ఒక్కసారి తిన్నారంటే పిల్లలు మళ్లీ మళ్లీ చేయమని అడుగుతుంటారు. సో, లేట్​ చేయకుండా ఈ రెసిపీపై ఓ లుక్కేయండి.

Coconut (Getty Images)

కావాల్సిన పదార్థాలు:

• కొబ్బరి ముక్కలు - 1 కప్పు
• పాలు - 2 కప్పులు
• కార్న్​ఫ్లోర్​ - 1 టేబుల్​ స్పూన్​
• కండెన్స్​డె మిల్క్​ - 1/3 కప్పు(85ml)
• వెనీలా ఎసెన్స్​ - 1 టీ స్పూన్​
• సన్నగా తరిగిన డ్రైఫ్రూట్స్​ - కొద్దిగా

Milk (Getty Images)

తయారీ విధానం:

• ముందుగా చిక్కటి పాలను మరిగించి పూర్తిగా చల్లార్చుకోవాలి.
• కొబ్బరిని టెంక నుంచి సెపరేట్​ చేసిన తర్వాత గోధుమ రంగులో ఉండే పొట్టు మొత్తాన్ని తీసేయాలి. ఆ తర్వాత చిన్న చిన్న ముక్కలుగా కట్​ చేసుకుని 1 కప్పు కొలతగా తీసుకోవాలి.
• మిక్సీజార్​లోకి కొబ్బరి ముక్కలు వేసి ఓసారి గ్రైండ్​ చేసుకోవాలి. ఆ తర్వాత 1 కప్పు కాచి చల్లార్చిన పాలు పోసుకుని వీలైనంత మెత్తగా రుబ్బుకోవాలి.
• ఇలా గ్రైండ్​ చేసిన మిశ్రమాన్ని ఓ బౌల్​లోకి తీసుకుని పక్కన ఉంచాలి.
• మరో పాన్​లో పాలు పోసుకోవాలి. ఆపై అందులోకి కార్న్​ఫ్లోర్​ వేసి ఉండలు లేకుండా మిక్స్​ చేసుకోవాలి.
• ఈ పాన్​ ను స్టవ్​ మీద పెట్టి లో ఫ్లేమ్​లో చిక్కగా అయ్యే వరకు ఉడికించాలి. కార్న్​ఫ్లోర్​ మిశ్రమం థిక్​గా మారిన తర్వాత స్టవ్ ఆఫ్​ చేసి దించాలి.

Coconut Ice Cream (ETV Bharat)

• ఆ తర్వాత అందులోకి కండెన్సెడ్​ మిల్క్, వెనీలా ఎసెన్స్​​ వేసి ఉండలు లేకుండా బాగా మిక్స్​ చేసుకుని పూర్తిగా చల్లార్చుకోవాలి.
• పాల మిశ్రమం కంప్లీట్​గా కూల్​ అయిన తర్వాత మిక్సీజార్​లోకి వేసుకుని స్మూత్​గా బ్లెండ్​ చేసుకోవాలి.
• ఈ మిశ్రమాన్ని కొబ్బరి పాలలో కలుపుకోవాలి. ఆ తర్వాత లైట్​గా తరిగిన డ్రైఫ్రూట్స్​ వేసుకుని మిక్స్​ చేసుకుని ఐస్​క్రీమ్​ మౌల్డ్స్​లో పోసుకోవాలి.
• ఆ మౌల్డ్స్​ను అల్యూమినియం ఫాయిల్​తో క్లోజ్​ చేసి ఐస్​క్రీమ్​ స్టిక్స్​ పెట్టుకోవాలి. ఆ తర్వాత దానిని ఫ్రీజర్​లో సుమారు 8 నుంచి 10 గంటలు ఉంచాలి.
• ఒకవేళ మీ దగ్గర మౌల్డ్స్​ లేకపోతే గ్లాస్​లలో పోసి ఫాయిల్​ చుట్టేస్తే సరి.
• 10 గంటల తర్వాత ఫ్రీజర్​ నుంచి తీసుకుని సర్వ్​ చేసుకుంటే కొబ్బరి ఐస్​క్రీమ్​ రెడీ. నచ్చితే మీరూ ఓసారి పిల్లల కోసం ట్రై చేయండి.

Coconut Ice Cream (ETV Bharat)

టిప్స్​:

• కండెన్స్​డ్​ మిల్క్​ బదులు పంచదార కూడా వాడవచ్చు. అయితే పంచదారను కార్న్​ఫ్లోర్​ మిశ్రమం ఉడుకుతున్నప్పుడు వేసుకుని కలిపి కుక్​ చేసుకోవాలి.
• వెనీలా ఎసెన్స్​ బదులు యాలకుల గింజల పొడి కూడా వాడుకోవచ్చు.
• కార్న్​ఫ్లోర్​ మిశ్రమం పూర్తిగా చల్లారిన తర్వాత మాత్రమే బ్లెండ్​ చేసుకోవాలి.