Mamidikaya Sambar Recipe : చాలా మంది ఎక్కువ ఇష్టపడే రెసిపీలలో సాంబార్ ఒకటి. ఇంట్లో ఏ కర్రీ చేయకపోయినా కేవలం సాంబార్ ఉంటే చాలు ఆ పూట తృప్తిగా భోజనం చేయొచ్చు. ఈ క్రమంలోనే చాలా మంది రకరకాల వెరైటీల్లో సాంబార్ ట్రై చేస్తుంటారు. అలాకాకుండా ఓసారి ఇలా "మామిడికాయ సాంబార్" చేసుకోండి. దీన్నే మామిడికాయ ముక్కల పులుసు అని కూడా అంటారు.
ఈ వేసవి సీజన్లో పచ్చి మామిడికాయలు విరివిగా లభిస్తుంటాయి. సో, ఈ సమ్మర్లో తప్పకుండా ట్రై చేయండి. ఇది లంచ్, డిన్నర్ రెండింట్లోకి అద్భుతంగా ఉంటుంది. ఈ పప్పుచారుతో సైడ్ డిష్గా అప్పడాలను నంజుకొని తింటుంటే కలిగే ఆ ఫీలింగ్ అద్భుతమని చెప్పుకోవచ్చు. మరి, ఈ సూపర్ రెసిపీకి కావాల్సిన పదార్థాలు, తయారీ విధానం ఏంటో ఇప్పుడు చూద్దాం.
కావాల్సిన పదార్థాలు :
- కందిపప్పు - అర కప్పు(100 గ్రాములు)
- పసుపు - పావుటీస్పూన్
- కరివేపాకు - 2 రెమ్మలు
- ఆయిల్ - 2 టీస్పూన్లు
- మామిడికాయ - 1 (మీడియం సైజ్ది)
- ఉప్పు - రుచికి సరిపడా
- కారం - తగినంత
- పచ్చిమిర్చి - 4
- టమాటా - 1
- చింతపండు రసం - 2 టేబుల్స్పూన్లు
- సాంబార్ పొడి - 1 టీస్పూన్
తాలింపు కోసం :
- నూనె - 2 టేబుల్స్పూన్లు
- ఆవాలు - అరటీస్పూన్
- జీలకర్ర - అరటీస్పూన్
- వెల్లుల్లి పేస్ట్ - 1 టీస్పూన్
- ఉల్లిపాయ తరుగు - కొద్దిగా
- ఎండుమిర్చి - 2
- ఇంగువ - చిటికెడు
- కరివేపాకు - కొద్దిగా
వారెవ్వా అనిపించే "మునక్కాడ మజ్జిగ చారు" - ఎండల్లో ఒంటికి ఎంతో చలువ!
తయారీ విధానం :
- ఇందుకోసం ముందుగా కుక్కర్లో కందిపప్పు తీసుకొని శుభ్రంగా కడిగి, తగినన్ని వాటర్ పోసి అరగంటపాటు నానబెట్టుకోవాలి.
- అరగంట తర్వాత అందులో పసుపు, కరివేపాకు, నూనె వేసుకొని బాగా కలిపి మూతపెట్టి 3 నుంచి 4 విజిల్స్ వచ్చేంత వరకు ఉడికించుకోవాలి.
- పప్పు ఉడికేలోపు తాజా పుల్లని పచ్చి మామిడికాయను తీసుకొని శుభ్రంగా కడిగి, పీలర్ సహాయంతో పై చెక్కును తొలగించుకోవాలి. ఆ తర్వాత మునక్కాడ ముక్కల మాదిరిగా పొడవాటి ముక్కలుగా కట్ చేసుకొని పక్కన పెట్టుకోవాలి.
- ఇప్పుడు మెత్తగా ఉడికించుకున్న పప్పుని కుక్కర్లోని ప్రెషర్ మొత్తం పోయాక మూత తీసి పప్పుగుత్తి లేదా గరిటెతో లైట్గా మాష్ చేసుకోవాలి.
- అనంతరం అందులో ఉప్పు, కారం, పచ్చిమిర్చి చీలికలు, టమాటా ముక్కలు, చింతపండు రసం వేసుకోవాలి. అలాగే, రెండున్నర కప్పుల వరకు వాటర్ యాడ్ చేసుకొని మొత్తం కలిసేలా ఒకసారి బాగా కలుపుకోవాలి. అయితే, పప్పుచారు కాబట్టి కాస్త పలుచగానే ఉండేటట్లు చూసుకోవాలి.
- ఆ తర్వాత మీడియం ఫ్లేమ్ మీద మధ్యమధ్యలో కలుపుతూ 5 నుంచి 6 నిమిషాలపాటు మరిగించుకోవాలి.
- ఆ విధంగా మరిగించుకున్నాక అందులో ముందుగా కట్ చేసి పెట్టుకున్న మామిడికాయ ముక్కలను వేసుకొని మరో 2 నుంచి 3 నిమిషాల పాటు ఉడికించుకొని స్టౌ ఆఫ్ చేసుకోవాలి.
- ఇప్పడు తాలింపు కోసం స్టౌపై చిన్న కడాయి పెట్టుకొని ఆయిల్ వేసుకోవాలి. నూనె కాస్త వేడయ్యాక జీలకర్ర, ఆవాలు, దంచిన వెల్లుల్లి పేస్ట్ వేసుకొని వేయించుకోవాలి.
- అవి కాస్త వేగాక ఉల్లిపాయ తరుగు వేసుకొని ఫ్రై చేసుకోవాలి. ఆనియన్స్ కాస్త రంగు మారాక ఎండుమిర్చి తుంపలు, కరివేపాకు, ఇంగువ వేసి చక్కగా వేయించాలి.
- తాలింపు మంచిగా వేగిందనుకున్నాక స్టౌ ఆఫ్ చేసుకొని దాన్ని ముందుగా ప్రిపేర్ చేసుకున్న పప్పు చారులో వేసి మొత్తం కలిసేలా కలుపుకోవాలి.
- ఇక చివర్లో కొత్తిమీర తరుగు వేసుకొని కలిపి మూతపెట్టి 5 నిమిషాలు అలాగే ఉంచి ఆపై సర్వ్ చేసుకుంటే చాలు. అంతే, ఎంతో రుచికరంగా ఉండే కమ్మని "మామిడికాయ సాంబార్" రెడీ!
ఉడుపి స్టైల్ "బీరకాయ సాంబార్" - ఇలా చేశారంటే ఘుమఘుమలాడిపోద్ది!
