దాబా స్టైల్​ "బెండకాయ కర్రీ" - జిగురు లేకుండా భలే కమ్మగా!

Punjabi Style Bhindi Masala Fry : పిల్లల నుంచి పెద్దల వరకు అంతగా ఇష్టపడని కూరగాయల్లో ఒకటి బెండకాయ. బంకగా, సప్పగా ఉంటుందని చాలా మంది దీన్ని పక్కన పెడుతుంటారు. అలాంటి వారు కూడా ఇష్టంగా తినే ఒక సూపర్ రెసిపీ ఉంది. అదే, పంజాబీ దాబా స్టైల్​లో కమ్మని "బెండకాయ మసాలా కర్రీ". ఇలా చేశారంటే అస్సలు జిగురు లేకుండా కర్రీ చాలా రుచికరంగా ఉంటుంది. ఇది అన్నంతో పాటు చపాతీ, రోటీ, పుల్కా ఇలా దేనిలోకైనా అద్దిరిపోయే టేస్ట్​నిస్తుంది. బ్యాచిలర్స్ కూడా ఈ రెసిపీని చాలా సులభంగా రెడీ చేసుకోవచ్చు. మరి, అందుకు అవసరమైన పదార్థాలేంటి? ఎలా ప్రిపేర్ చేసుకోవాలో ఇప్పుడు చూద్దాం.

బెండకాయలు (Getty Images)

కావాల్సిన పదార్థాలు :

• బెండకాయలు - అరకిలో
• నూనె - తగినంత
• జీలకర్ర - రెండు టీస్పూన్లు
• ఆవాలు - ఒక టీస్పూన్
• ఉల్లిపాయలు - నాలుగు
• అల్లంవెల్లుల్లి పేస్ట్ - రెండు టీస్పూన్లు
• ధనియాల పొడి - రెండు టీస్పూన్లు
• ఉప్పు - రుచికి తగినంత
• కారం - రెండు టేబుల్​స్పూన్లు(తగినంత)
• వేయించిన జీలకర్ర పొడి - రెండు టీస్పూన్లు
• గరంమసాలా - ఒక టీస్పూన్
• పసుపు - కొద్దిగా
• టమాటాలు - నాలుగు

చల్లని వేళ కరకరలాడే "మొక్కజొన్న గారెలు" - ఈ సీక్రెట్ టిప్​తో సూపర్ టేస్ట్!

టమాటా పేస్ట్ (Bharat)

తయారీ విధానం :

• పంజాబీ దాబా స్టైల్​లో నోరూరించే ఈ కర్రీ కోసం ముందుగా తాజా లేత బెండకాయలను తీసుకోవాలి. ఆపై వాటిని శుభ్రంగా కడిగి చిన్న చిన్న ముక్కలుగా కట్ చేసుకోవాలి.
• అలాగని, బెండకాయ ముక్కలను మరీ చిన్నగా కట్ చేసుకోవద్దు. కనీసం ఒకటిన్నర అంగుళం పొడువు ఉండేలా కట్ చేసుకుని ఒక గిన్నెలోకి తీసుకోవాలి.
• అలాగే, రెసిపీలోకి అవసరమైన ఉల్లిపాయలను వీలైనంత సన్నగా కట్ చేసుకుని పక్కనుంచాలి. టమాటాలను మీడియం సైజ్ ముక్కలుగా కట్ చేసుకుని మిక్సీ జార్​లో వేసి పేస్ట్​లా మిక్సీ పట్టుకోవాలి.

ఉల్లిపాయలు (Getty Images)

• ఇప్పుడు స్టవ్ మీద కడాయి లేదా పాన్​లో నాలుగైదు టేబుల్​స్పూన్ల నూనె వేసి వేడి చేసుకోవాలి. ఆయిల్ కాగిన తర్వాత ముందుగా కట్ చేసుకున్న బెండకాయ ముక్కలను వేసి హై ఫ్లేమ్​ మీద కలుపుతూ నాలుగైదు నిమిషాల పాటు వేయించుకోవాలి.
• ఇలా హై ఫ్లేమ్​లో బెండకాయ ముక్కలను వేయించడం ద్వారా అందులోని జిగురు తగ్గి కర్రీ మంచి రుచికరంగా వస్తుంది.
• బెండకాయ ముక్కలు మంచిగా వేగి లైట్ గోల్డెన్ కలర్ వచ్చాక వాటిని ఒక ప్లేట్​లోకి తీసుకుని పక్కనుంచాలి.

జీలకర్ర (Getty Images)

• అనంతరం అదే పాన్​లో ఆరు టేబుల్​స్పూన్ల నూనె వేసి వేడి చేసుకోవాలి. ఆయిల్ కాగిన తర్వాత జీలకర్ర, ఆవాలు వేసి వేయించాలి. అవి వేగాక సన్నని ఉల్లిపాయ తరుగు యాడ్ చేసి లో టూ మీడియం ఫ్లేమ్​లో ఆనియన్స్ లైట్ గోల్డెన్ కలర్​లోకి వచ్చేంత వరకు కలుపుతూ ఫ్రై చేసుకోవాలి.
• ఉల్లిపాయలు రంగు మారుతున్న క్రమంలోనే కరివేపాకు వేసి వేయించాలి.
• ఆ తర్వాత అల్లంవెల్లుల్లి పేస్ట్, ధనియాల పొడి, రుచికి తగినంత ఉప్పు, కారం, వేయించిన జీలకర్ర పొడి, గరంమసాలా వేసి మసాలాలన్నీ బాగా కలిసేలా కలుపుతూ వేయించాలి.
• అవన్నీ నూనెలో మంచిగా వేగి ఆయిల్ పైకి తేలాలి. అప్పుడే కూరకు మంచి ఫ్లేవర్ వస్తుందని గుర్తుంచుకోవాలి.

"మిర్చీ బజ్జీలు" బండి మీద అమ్మే టేస్ట్ రావట్లేదా? - "పిండి" ఇలా కలిపితే సూపర్ వస్తాయి!

ఉప్పు (Getty Images)

• ఆవిధంగా వేయించుకున్నాక అందులో మిక్సీ పట్టుకున్న టమాటా పేస్ట్ జత చేసి అంతా బాగా కలిసేలా కలపాలి.
• తర్వాత స్టవ్​ను మీడియం ఫ్లేమ్​లో ఉంచి మధ్యమధ్యలో కలుపుతూ ఆ మిశ్రమం నుంచి ఆయిల్ సెపరేట్ అయ్యేంత వరకు మగ్గించుకోవాలి. అందుకోసం ఏడెనిమిది నిమిషాల టైమ్ పట్టొచ్చు.
• అనంతరం ఆ మిశ్రమంలో ముందుగా వేయించి పక్కనుంచిన బెండకాయ ముక్కలను వేసి మీడియం ఫ్లేమ్​లో నాలుగైదు నిమిషాల పాటు కలుపుతూ మగ్గించుకోవాలి. బెండకాయ ముక్కలు నూనెలో చక్కగా మగ్గాలి. అప్పుడే పులుపు, కారాలు బెండకాయలకు చక్కగా పడుతాయి.
• బెండకాయ మంచిగా మగ్గి ఆయిల్ తేలుతున్నప్పుడు స్టవ్ ఆఫ్ చేసుకుని దింపేసుకుంటే చాలు. అంతే, పంజాబీ దాబా స్టైల్​లో ఘుమఘుమలాడే "బెండకాయ మసాలా" కర్రీ రెడీ అవుతుంది!

మసాలా దినుసులు (Getty Images)

చిట్కాలు :

• ఈ రెసిపీ కోసం లేతగా ఉండే బెండకాయలు తీసుకోవాలి. అలాగే, మసాలాలను ఆయిల్ తేలే వరకు వేయించుకోవాలి.
• ఈ రెసిపీలో వీలైనంత వరకు వాటర్ వేయకుండా ప్రిపేర్ చేసుకోవాలి. అంటే, ఈ కర్రీ మొత్తం నూనెలోనే మగ్గాలని గుర్తుంచుకోవాలి. అప్పుడే అసలైన పంజాబీ దాబా స్టైల్​ రుచిని ఎంజాయ్ చేస్తారు.

ఘుమాయించే "చికెన్ కర్రీ" - చల్లని వేళ వేడివేడి అన్నంలోకి అదుర్స్​!