ఈ స్టఫ్ఫింగ్ రెడీ చేసుకుంటే చాలు - "పూర్ణాలు, బొబ్బట్లు" రెండూ కుక్ చేసుకోవచ్చు!

Poornam and Bobbatlu with One Stuffing: మహిళలకు అత్యంత ప్రీతికరమైన మాసం శ్రావణం. ఈ నెలలో పౌర్ణమి ముందు వచ్చే శుక్రవారం ఆడపడుచులందరూ "వరలక్ష్మీ వ్రతం" చేసుకుంటారు. ఆయురారోగ్యాలు, సిరిసంపదలు అందించమని అమ్మవారిని నిండు మనసుతో కోరుతూ రకరకాల నైవేద్యాలు సమర్పిస్తారు. అందులో పూర్ణం బూరెలు తప్పనిసరి. ఇక కొద్దిమంది బొబ్బట్లను కూడా నైవేద్యంగా సమర్పిస్తారు. కానీ ఈ రెండూ చేయాలంటే కాస్త టైమ్​ పడుతుంది. ఎందుకంటే రెండింటికి పూర్ణం స్టఫ్ఫింగ్​తో పాటు కోటింగ్​ ప్రిపేర్​ చేసుకోవాలి. అయితే ఇకపై ఆ టెన్షన్​ లేకుండా శనగపప్పు, బెల్లం మిశ్రమంతో పూర్ణాలు, బొబ్బట్లను చేసుకోవచ్చు. ఒక్కసారి స్టఫ్పింగ్​ ప్రిపేర్​ చేసుకుంటే చాలా తక్కువ సమయంలో వీటిని తయారు చేసుకోవచ్చు. మరి ఆ ప్రాసెస్​ ఏంటో ఈ స్టోరీలో చూసేయండి.

శనగపప్పు (Getty Images)

కావాల్సిన పదార్థాలు:

స్టఫ్ఫింగ్​ కోసం:

• పచ్చి శనగపప్పు - 2 కప్పులు
• పసుపు - చిటికెడు
• నెయ్యి - తగినంత
• ఉప్పు - చిటికెడు
• బెల్లం - 2 కప్పులు
• నీళ్లు - తగినన్ని
• ​యాలకుల పొడి - 1 టీ స్పూన్​

బెల్లం తురుము (Getty Images)

స్టఫ్పింగ్​ తయారీ విధానం:

• ఓ గిన్నెలోకి శనగపప్పు తీసుకుని శుభ్రంగా కడిగి సరిపడా వాటర్​ పోసి సుమారు 2 గంటల పాటు నానబెట్టాలి.
• పప్పు నానిన తర్వాత మరోసారి కడిగి నీళ్లు లేకుండా పూర్తిగా ఒంపేసి కుక్కర్​లోకి తీసుకోవాలి. ఆపై అందులోకి రెండు కప్పుల నీళ్లు, పసుపు, ఉప్పు, కొద్దిగా​ నెయ్యి వేసుకుని స్టవ్​ మీద పెట్టి మీడియం ఫ్లేమ్​లో మూడు లేదా నాలుగు విజిల్స్​ వచ్చే వరకు ఉడికించుకోవాలి.
• పప్పు ఉడికిన తర్వాత స్టవ్​ ఆఫ్​ చేసి చల్లారనివ్వాలి. కుక్కర్​ ఆవిరి పోయిన తర్వాత మూత తీసి పప్పును జల్లెడలో వేసుకుని పక్కకు పెట్టుకోవాలి. నీళ్లు పోయిన తర్వాత పప్పును మిక్సీ జార్​లోకి వేసి మెత్తగా గ్రైండ్​ చేసుకోవాలి.

నెయ్యి (Getty Images)

• స్టవ్​ ఆన్​ చేసి కడాయి పెట్టి బెల్లం తురుము, కొన్ని నీళ్లు పోసి కరిగించుకోవాలి.
• బెల్లం కరిగిన తర్వాత అందులోకి గ్రైండ్​ చేసుకున్న పప్పు వేసుకుని బాగా కలిపి ఉడికించుకోవాలి.
• పప్పు దగ్గరపడి పాన్​కు అంటుకోకుండా సెపరేట్​ అయినప్పుడు యాలకుల పొడి, కొద్దిగా నెయ్యి వేసి కలిపి స్టవ్​ ఆఫ్​ చేసి చల్లారనివ్వాలి. దీంతో స్టఫ్పింగ్​ రెడీ అయినట్లే. ఈ స్టఫ్పింగ్​తో పూర్ణాలు, బొబ్బట్లు చేసుకోవాలి.

పూర్ణం మిశ్రమం (ETV Bharat)

పూర్ణాల కోసం:

• మినప్పప్పు - 1 కప్పు
• బియ్యం - 2 కప్పులు
• ఉప్పు - సరిపడా
• పంచదార - 1 టేబుల్​స్పూన్​

తయారీ విధానం:

• మిక్సింగ్​ బౌల్​లోకి బియ్యం, మినప్పప్పు వేసి రెండుమూడు సార్లు శుభ్రంగా కడిగి సరిపడా నీళ్లు పోసి సుమారు 3 గంటల పాటు నానబెట్టాలి.
• నానిన బియ్యం, పప్పును మరోసారి కడిగి మిక్సీజార్​లో వేసి కొద్దికొద్దిగా నీళ్లు పోస్తూ మెత్తగా గ్రైండ్​ చేసుకోవాలి.
• ఇలా గ్రైండ్​ చేసుకున్న దోశ పిండిని ఓ గిన్నెలోకి తీసుకుని ఉప్పు, పంచదార వేసి కలిపి ఓ అరగంట పక్కన ఉంచాలి.
• ఈలోపు ప్రిపేర్ చేసుకున్న​ స్టఫ్పింగ్​ను రెండు భాగాలుగా చేసుకోవాలి. అందులో సగభాగం పూర్ణాలు చేసుకోవడానికి ఉపయోగించాలి. అందుకోసం మిశ్రమాన్ని కొంచెం కొంచెం తీసుకుంటూ ఉండలుగా చేసుకోవాలి.

దోశ పిండి (ETV Bharat)

• స్టవ్​ ఆన్​ చేసి కడాయి పెట్టి డీప్​ఫ్రైకి సరిపడా నూనె పోసుకోవాలి. ఆయిల్​ హీటెక్కిన తర్వాత పూర్ణం ఉండను దోశ పిండిలో ముంచి కాగుతున్న నూనెలో వేసుకోవాలి.
• కడాయికి సరిపడే విధంగా వేసుకున్న తర్వాత మంటను మీడియం ఫ్లేమ్​లో పెట్టి రెండు వైపులా గోల్డెన్​ బ్రౌన్​ కలర్​ వచ్చే వరకు ఫ్రై చేసుకోవాలి.
• ఇలా రెండు వైపులా వేయించుకున్న తర్వాత తీసి ప్లేట్​లో పెట్టుకోవాలి. మిగిలిన ఉండలను కూడా ఇలానే పిండిలో ముంచి నూనెలో వేసి డీప్​ఫ్రై చేసుకోవాలి. అంతే పూర్ణం బూరెలు రెడీ.

పూర్ణం బూరెలు (ETV Bharat)

బొబ్బట్ల కోసం:

• మైదా - 2 కప్పులు
• ఉప్పు - చిటికెడు
• ​నెయ్యి - తగినంత
• నూనె- కొద్దిగా

తయారీ విధానం:

• మిక్సింగ్​ బౌల్​లోకి మైదా, ఉప్పు, కొద్దిగా నెయ్యి వేసి కలపాలి. నెయ్యి మొత్తం పిండిలో కలిసిన తర్వాత కొద్దికొద్దిగా నీళ్లు పోసుకుంటూ సాఫ్ట్​గా చపాతీ ముద్దలా మిక్స్​ చేసుకోవాలి.
• పిండిని బాగా కలుపుకున్న తర్వాత నూనె యాడ్​ చేసుకుని మరోసారి కలిపి మూత పెట్టి సుమారు 2 గంటల పాటు పక్కన ఉంచాలి.
• మిగిలిన స్టఫ్పింగ్​ను కొద్దిగా తీసుకుని ఉండలుగా చేసుకోవాలి. అలాగే ముందుగా కలిపి పెట్టుకున్న మైదా పిండిని మరోసారి కలిపి మీడియం సైజ్​లో ఉండలుగా చేసుకోవాలి.
• ఓ ఉండ తీసుకుని దానిని కొంచెం చేతితోనే స్ప్రెడ్​ చేసి, దాని మధ్యలో శనగపప్పు మిశ్రమాన్ని పెట్టి అంచులు క్లోజ్​ చేయాలి. ఉండలన్నింటిని ఇలానే చేసుకోవాలి.

మైదా పిండి (Getty Images)

• స్టవ్​ ఆన్​ చేసి దోశ పెనం పెట్టి హీట్​ చేసుకోవాలి. ఈలోపు చపాతీ పీట మీద ఓ బటర్​ పేపర్​ ఉంచి స్టఫ్పింగ్​ చేసుకున్న ఒక ఉండను ఉంచి లైట్​గా ప్రెస్​ చేయాలి. అనంతరం దానిపైన మరో బటర్​ పేపర్​ ఉంచి చపాతీ కర్రతో లైట్​గా బొబ్బట్లుగా వత్తుకోవాలి.
• పాన్​ హీటెక్కిన తర్వాత ప్రిపేర్​ చేసుకున్న భక్ష్యాలను ఉంచి ఓ వైపు 10 సెకన్ల పాటు కాల్చుకోవాలి.
• రెండో వైపుకు తిప్పుకుని మరో 10 సెకన్లు కాల్చుకున్న తర్వాత మధ్యమధ్యలో నెయ్యి అప్లై చేసుకుంటూ రెండు వైపులా ఎర్రగా కాల్చుకోవాలి.
• ఇలా చేసుకున్న వాటిని ఓ ప్లేట్​లోకి తీసుకోవాలి. మిగిలిన ఉండలన్నింటినీ ఈ పద్ధతిలో చేసుకుంటే ఎంతో టేస్టీగా ఉండే ​బొబ్బట్లు రెడీ. చూశారుగా ఒక్క స్టఫ్పింగ్​ ప్రిపేర్​ చేసుకుంటే రెండు రకాల(పూర్ణాలు, బొబ్బట్లు) ప్రసాదాలు చేసి వరలక్ష్మీ అమ్మవారికి నైవేద్యంగా పెట్టొచ్చు.

బొబ్బట్లు (Getty Images)

చిట్కాలు:

• పూర్ణాలు, భక్ష్యాలు చేసుకునేందుకు స్టఫ్పింగ్​ ప్రిపేర్​ చేసుకోవాలనుకుంటే శనగపప్పు, బెల్లాన్ని కొంచెం ఎక్కువగానే చేసుకోవాలి. శనగపప్పు, బెల్లం సమాన కొలతలుగా తీసుకోవాలి. అప్పుడే అవి టేస్టీగా వస్తాయి.
• కావాలనుకుంటే స్టఫ్పింగ్​ను వ్రతానికి ముందు రోజే ప్రిపేర్​ చేసుకుని చల్లారిన తర్వాత ఫ్రిజ్​లో పెట్టి, వ్రతం రోజు తీసి పూర్ణాలు, బొబ్బట్లు చేసుకుంటే సరిపోతుంది.

కరకరలాడే "ఆలూ వడలు" - ఇన్​స్టంట్​గా చేసుకోవచ్చు - నూనె పీల్చకుండా వస్తాయి!

వరలక్ష్మీ వ్రతం వేళ కరకరలాడే " మినప మసాలా గారెలు" - నూనె పీల్చకుండా టేస్టీగా వస్తాయి!