ఇడ్లీ, దోశల్లోకి రుచికరమైన "కొబ్బరి చట్నీ" - ఇలా చేస్తే పక్కా హోటల్​ టేస్ట్!

Perfect Kobbari Chutney Recipe : మార్నింగ్ బ్రేక్​ఫాస్ట్​లోకి ఎంత రుచికరమైన టిఫెన్ చేసుకున్నా అందులోకి సరైన చట్నీ ఉన్నప్పుడే సంతృప్తిగా తిన్నామన్నా ఫీలింగ్ కలుగుతుంది. ఈ క్రమంలోనే ఎక్కువ మంది చేసుకునే వాటిల్లో పల్లీ చట్నీతో పాటు కొబ్బరి చట్నీ ముందు వరుసలో ఉంటుంది. ఇది అందరికీ తెలిసిన రెసిపీనే అయినా కొన్నిసార్లు అంత రుచికరంగా రాదు. అలాంటి వారు ఓసారి ఈ కొలతలతో "కొబ్బరి చట్నీని" చేసి చూడండి. పైగా గణేశ్ నవరాత్రులు కొనసాగుతున్న వేళ ఇంట్లో పూజకు వినియోగించిన కొబ్బరి చిప్పలు మిగిలిపోయి ఉంటాయి. వాటితో ఇలా మార్నింగ్ టిఫెన్స్​లోకి ఓసారి చట్నీని చేయండి. ఈ చట్నీ ఇడ్లీ, దోశ, వడ, బోండా, ఊతప్పం ఇలా ఏ టిఫెన్​లోకైనా చాలా రుచికరంగా ఉంటుంది. పైగా దీన్ని తయారు చేసుకోవడం కూడా చాలా ఈజీ! మరి, లేట్ చేయకుండా పర్ఫెక్ట్​ రుచితో నోరూరించే ఈ కొబ్బరి చట్నీని ఎలా చేసుకోవాలో ఇప్పుడు చూద్దాం.

పచ్చికొబ్బరి (Getty Images)

అవసరమైన ఇంగ్రీడియంట్స్ :

• కొబ్బరి ముక్కలు - రెండు చిన్న కప్పులు
• నూనె - రెండు టేబుల్​స్పూన్లు
• పచ్చిమిర్చి - 12(తగినన్ని)
• ఎండుమిర్చి - నాలుగు
• చిన్న సైజ్ ఉల్లిపాయలు - రెండు
• పుట్నాల పప్పు - నాలుగు టేబుల్​స్పూన్లు
• జీడిపప్పు పలుకులు - 15 నుంచి 20
• చింతపండు - కొద్దిగా

అన్నం వార్చిన గంజితో సూపర్ టేస్టీ "అట్లు" - అప్పటికప్పుడు నిమిషాల్లోనే చేసుకోవచ్చు!

ఉల్లిపాయలు (ETV Bharat)

తయారీ విధానం :

• ఈ చట్నీ తయారీ కోసం ముందుగా ప్రధాన ఇంగ్రీడియంట్ అయిన పచ్చికొబ్బరిని రెండు చిన్న కప్పుల పరిమాణంలో చిన్న చిన్న ముక్కలుగా కట్ చేసుకొని సిద్ధంగా ఉంచుకోవాలి.
• అలాగే, ముందుగానే ఉల్లిపాయలను సన్నగా కట్ చేసుకొని పక్కన పెట్టుకోవాలి.
• ఇప్పుడు స్టవ్ మీద పాన్ పెట్టి నూనె వేసి వేడి చేసుకోవాలి. ఆయిల్ లైట్​గా హీట్ అయ్యాక పచ్చిమిర్చిలను ముక్కలుగా తుంపి వేసుకోవాలి.
• అలాగే, అందులోనే ఎండుమిర్చిని కూడా వేసి కాసేపు కలుపుతూ వేయించాలి. అవి కొద్దిగా వేగాక ముందుగా కట్ చేసి పెట్టుకున్న సన్నని ఉల్లిపాయ ముక్కలు జత చేసి లో ఫ్లేమ్​లో ఆనియన్స్ కాస్త కలర్ మారేంత వరకు ఫ్రై చేసుకోవాలి.

పచ్చిమిర్చి (Getty Images)

• ఉల్లిపాయలు చక్కగా వేగి లైట్ గోల్డెన్ కలర్​లోకి వచ్చాయనుకున్నాక పుట్నాల పప్పుని వేసుకొని ఒకసారి బాగా కలిపి స్టవ్ ఆఫ్ చేసుకోవాలి. ఆపై ఆ మిశ్రమాన్ని పూర్తిగా చల్లారనివ్వాలి.
• అనంతరం మిక్సీ జార్ తీసుకొని అందులో చల్లారిన పచ్చిమిర్చి మిశ్రమం, ముందుగా కట్ చేసి పెట్టుకున్న సన్నని పచ్చికొబ్బరి ముక్కలు, జీడిపప్పు పలుకులు, రుచికి తగినంత ఉప్పు, రెండు రెక్కల చింతపండు వేసుకొని ముందుగా వాటర్ లేకుండా కచ్చాపచ్చాగా గ్రైండ్ చేసుకోవాలి.
• ఆ తర్వాత తగినన్ని నీళ్లను పోసుకొని ఒకసారి కలిపి మరోసారి మెత్తని పేస్ట్​లా మిక్సీ పట్టుకోవాలి. ఆపై దాన్ని ఒక గిన్నెలోకి తీసుకొని పక్కనుంచాలి. ఇప్పుడు అందులోకి పోపుని రెడీ చేసుకోవాలి.

అచ్చం టిఫెన్ సెంటర్ రుచితో "బోండాలు" - మైదా, వంటసోడా లేకుండానే!

జీడిపప్పు (Getty Images)

పోపు కోసం :

• నూనె - ఒకట్రెండు టేబుల్​స్పూన్లు
• పోపు దినుసులు - రెండు టీస్పూన్లు
• ఎండుమిర్చి - నాలుగు
• వెల్లుల్లి రెబ్బలు - నాలుగు
• కరివేపాకు - కొద్దిగా

పోపు దినుసులు (Getty Images)

• తాలింపు తయారీకి స్టవ్ మీద చిన్న కడాయి పెట్టుకొని నూనె వేసి హీట్ చేసుకోవాలి. ఆయిల్ కాగిన తర్వాత తాలింపు గింజలు వేసుకొని వేయించాలి.
• అవి లైట్​గా వేగాక ఎండుమిర్చి ముక్కలు, కచ్చాపచ్చాగా దంచిన వెల్లుల్లి రెబ్బలు, కరివేపాకు వేసి పోపుని చక్కగా వేయించి స్టవ్ కట్టేయాలి.
• అనంతరం ఆ తాలింపుని ముందుగా రెడీ చేసుకున్న పచ్చడిలో వేసుకొని మిక్స్ చేసుకుంటే చాలు. అంతే, పర్ఫెక్ట్​ రుచితో నోరూరించే "కొబ్బరి చట్నీ" రెడీ అవుతుంది!

చిట్కాలు :

• ఈ చట్నీలో ఉల్లిపాయలు వేసుకోవడం ద్వారా రెసిపీకి అదనపు రుచి వస్తుంది. అలాగే, ఆనియన్స్​ మంచిగా వేయించుకోవాలి.
• జీడిపప్పు పలుకులు యాడ్ చేసుకోవడం కూడా కొబ్బరి చట్నీకి సూపర్ టేస్ట్​ని తీసుకొస్తుంది.

దుకాణంలో దొరికే బ్రెడ్​తో "కమ్మని పూరీలు" - నూనె పీల్చకుండానే పొంగుతాయి!