ఊతప్పం మరింత టేస్టీగా - ఈ పొడితో ప్రిపేర్ చేస్తే కేక!

- ఈ టిప్​తో మరింత రుచిగా ఊతప్పం - తిని తీరాల్సిందే!

Onion Podi Uthappam Recipe : చాలా మందికి ఇష్టమైన టిఫెన్లలో ఊతప్పం కూడా ఒకటి. వేడివేడిగా క్రిస్పీగా ఉండే ఊతప్పం.. పల్లీ చట్నీ, అల్లం చట్నీతో తింటే టేస్ట్ అద్దిరిపోతుంది. అయితే.. ఊతప్పంపై మామూలుగా ఆనియన్స్​, పచ్చిమిర్చి వేసి చేస్తుంటారు. వీటితో పాటుగా కాస్త పప్పుల పొడి కూడా వేస్తే రుచి ఇంకా బాగుంటుంది. మరి టేస్టీగా పప్పుల పొడితో ఊతప్పం ఎలా చేయాలో ఇప్పుడు చూద్దాం.

కావాల్సిన పదార్థాలు :

ఊతప్పం పిండి కోసం..

• మినపప్పు-కప్పు
• బియ్యం- రెండున్నర కప్పులు
• మెంతులు- టీస్పూన్​
• అరకప్పు-పోహా అటుకులు
• ఉప్పు-రుచికి సరిపడా
• వంటసోడా- రెండు చిటికెలు
• ఉల్లిపాయ ముక్కలు
• పచ్చిమిర్చి ముక్కలు
• క్యారెట్​ తురుము
• కొత్తిమీర తురుము

పప్పుల పొడి కోసం..

• శనగపప్పు- పావుకప్పు
• మినపప్పు- 2 టేబుల్​స్పూన్లు
• మిరియాలు -టీస్పూన్​
• కరివేపాకు-2
• వెల్లుల్లి రెబ్బలు -10
• ఎండుమిర్చి-15
• నల్ల నువ్వులు-టీస్పూన్​
• ఇంగువ - రెండు చిటికెలు
• ఉప్పు-రుచికి సరిపడా

తయారీ విధానం..

• ముందుగా ఊతప్పం పిండి కోసం.. నాలుగు గంటలపాటు బియ్యం, మినపప్పు నానబెట్టుకోవాలి. అలాగే అరగంట సేపు మెంతులు నానబెట్టుకోవాలి. అటుకుల్ని నీళ్లలో వేసి తీసి పక్కన పెట్టుకోవాలి.
• ఇప్పుడు వీటిని మిక్సీలో వేయాలి. తగినన్ని నీళ్లు పోసుకుంటూ.. మెత్తగా గ్రైండ్​ చేసుకోవాలి. పిండిని 12 గంటలపాటు పులియబెట్టాలి.
• తర్వాత పప్పుల పొడి కోసం.. స్టౌపై కడాయి పెట్టండి. ఇందులో శనగపప్పు, మినప్పప్పు, మిరియాలు, వెల్లుల్లిరెబ్బలు, కరివేపాకు వేయండి.
• కరివేపాకు దోరగా ఫ్రై అయ్యే వరకు మీడియం ఫ్లేమ్​లో గరిటెతో కలుపుతూ వేయించండి. తర్వాత ఎండుమిర్చి, నల్ల నువ్వులు, ఇంగువ వేసి ఫ్రై చేయండి.
• ఎండుమిర్చి దోరగా వేగిన తర్వాత వీటిని ఒక ప్లేట్లోకి తీసుకుని పూర్తిగా చల్లారనివ్వండి.
• ఇందులో రుచికి సరిపడా ఉప్పు కలిపి.. తర్వాత మిక్సీలో వేసుకుని బరకగా గ్రైండ్​ చేసుకోండి.
• మరుసటి రోజు మీరు ఊతప్పం చేయడానికి కావాల్సినంత పిండిని మరొక గిన్నెలోకి తీసుకోండి. (మిగిలిన పిండిని ఫ్రిడ్జ్​లో స్టోర్​ చేసుకోండి.)
• ఈ పిండిలో రుచికి సరిపడా ఉప్పు, చిన్న గిన్నెలో వంటసోడా కరిగించి వేసుకోండి.
• పిండిలో సరిపడా నీళ్లు పోసి గరిటెతో బాగా కలపండి. (పిండి కాస్త పల్చగా ఉండాలి.)
• ఇప్పుడు స్టౌపై దోశల పెనం పెట్టి కాస్త ఆయిల్ వేయండి. పెనంపై గరిటె పిండి వేసి అలా వదిలేయండి. పైన కొన్ని ఉల్లిపాయ, పచ్చిమిర్చి ముక్కలు, క్యారెట్​ తురుము, టేబుల్​స్పూన్​ పప్పుల పొడి వేయండి. ఊతప్పం అంచుల వెంట నూనె వేయండి.
• పెనంపై మూత పెట్టి మీడియం ఫ్లేమ్​లో ఊతప్పం 5 నిమిషాలు ఉడికించుకోండి. తర్వాత ఊతప్పం మరో వైపు తిప్పి పైన కొద్దిగా ఆయిల్​ వేయండి.
• రెండు వైపులా ఊతప్పం క్రిస్పీగా వేగిన తర్వాత ప్లేట్లోకి తీసుకోండి.
• మిగిలిన పిండితో ఇలానే ఊతప్పం చేసుకుంటే సరిపోతుంది.
• ఊతప్పం ఈ విధంగా పప్పుల పొడితో చాలా రుచిగా ఉంటుంది. నచ్చితే మీరు కూడా ఇలా ట్రై చేయండి.