Oil Free Vada Making Process: వడలు అంటే అందరికీ ఇష్టమే. కానీ వాటిని తినాలంటే కొందరు వెనకడుగు వేస్తుంటారు. ఎందుకంటే అవి ఆయిల్ ఫుడ్ కావడమే కారణం. బరువు పెరగడం నుంచి ఎన్నోరకాల సమస్యలకు ఆయిల్ ఫుడ్ కారణమవుతుందని నిపుణులు చెబుతుంటారు. అందుకే, వీటిని తినాలనే కోరికను బలవంతంగా ఆపుకుంటారు.
అయితే అలాంటివారు ఇకపై ఎటువంటి టెన్షన్ లేకుండా హ్యాపీగా వడలు తినేయొచ్చు. అందుకే మీకోసం అద్దిరిపోయే రెసిపీ తీసుకొచ్చాం. వీటిని నూనెలో డీప్ఫ్రై చేసే అవకాశం లేదు. చాలా హెల్దీగా అతి తక్కువ సమయంలో ప్రిపేర్ చేసుకోవచ్చు. మరి లేట్ చేయకుండా ఆయిల్ ప్రీ వడలు ఎలా ప్రిపేర్ చేసుకోవాలో ఈ స్టోరీలో తెలుసుకోండి.
కావలసిన పదార్థాలు:
- మినప్పప్పు - 1 కప్పు
- ఉల్లిపాయ - 1
- పచ్చిమిర్చి -3
- అల్లం - 1/2 అంగుళం
- జీలకర్ర - అర టీ స్పూన్
- కరివేపాకు - కొద్దిగా
- కొత్తిమీర - కొద్దిగా
- ఉప్పు - రుచికి సరిపడా
తయారీ విధానం :
- ముందుగా ఓ బౌల్లోకి మినప్పప్పును తీసుకుని శుభ్రంగా కడగాలి. తర్వాత పప్పు పూర్తిగా మునిగే వరకు నీరు పోయాలి. ఈ పప్పును కనీసం 4 నుంచి 5 గంటల పాటు నానబెట్టాలి. ఒకవేళ ఉదయం బ్రేక్ఫాస్ట్గా చేసుకోవాలనుకుంటే రాత్రి నానబెడితే సరిపోతుంది.
- పప్పు నానిన తర్వాత మరోసారి కడిగి నీళ్లు లేకుండా వంపేసి మిక్సీ జార్‌లోకి లేదా గ్రైండర్‌లోకి వేసుకుని గ్రైండ్ చేసుకోవాలి.
- పప్పు రుబ్బేటప్పుడు అస్సలు నీరు కలపకూడదు. అవసరమైతే ఒకటి లేదా రెండు టీస్పూన్ల చల్లటి నీటిని మాత్రమే వేయాలి.
- పిండిని గట్టిగా, నునుపుగా రుబ్బుకోవాలి. మరీ మెత్తగా కాకుండా కొంచెం బరకగా ఉంటే వడలు క్రిస్పీగా వస్తాయి. ఇలా రుబ్బిన పిండిని ఒక పెద్ద గిన్నెలోకి తీసుకోవాలి.
- ఇందులోకి ఉల్లిపాయ తరుగు, పచ్చిమిర్చి ముక్కలు, జీలకర్ర, అల్లం తరుగు, కరివేపాకు, కొత్తిమీర తరుగు, రుచికి సరిపడా ఉప్పు వేసి పదారాలన్నీ పిండిలో కలిసే విధంగా కలుపుకోవాలి.
- స్టవ్ ఆన్ చేసి ఇడ్లీ పాత్ర పెట్టి రెండు గ్లాసులు నీరు పోసి మూత పెట్టి మరిగించుకోవాలి.
- ఈ లోపు ఇడ్లీ ప్లేట్స్కి లైట్గా ఆయిల్ అప్లై చేసుకుని పిండిని కొద్దికొద్దిగా తీసుకుని వడులుగా వత్తుకుని ప్లేట్స్లో పెట్టుకోవాలి. ఇలా పిండి మొత్తాన్ని ప్లేట్స్లోకి వేసుకోవాలి.
- నీరు మరుగుతున్నప్పుడు ఇడ్లీ ప్లేట్లు ఉంచి మూత పెట్టి మీడియం ఫ్లేమ్లో 15 నిమిషాల పాటు ఉడికించుకోవాలి. అంటే ఈ రెసిపీలో వడలు ఆవిరి మీద ఉడుకుతాయన్నమాట. అందుకే, అవి తెల్లగా ఉంటాయి.
- వడలు ఉడికిన తర్వాత స్టవ్ ఆఫ్ చేసి ఓ 5 నిమిషాలు అలానే వదిలేసి ఈ తర్వాత ప్లేట్లోకి సర్వ్ చేసుకుని నచ్చిన చట్నీ, సాంబార్తో తింటే అద్దిరిపోతుంది. చుక్క నూనె లేని ఈ వడలు నచ్చితే మీరు ఇంట్లో ట్రై చేయండి.
టిప్స్:
- పప్పులు ఎంతసేపు నానితే వడలు అంత రుచికరంగా వస్తాయి.
- పిండిని రుబ్బేటప్పుడు వీలైనంత తక్కువ నీరు ఉపయోగించండి. పిండి గట్టిగా ఉంటే నూనె లేకుండా వడలు చేయడం సులభం అవుతుంది.
- రుబ్బిన పిండిని 5-10 నిమిషాలు బాగా చేత్తో లేదా విస్క్‌తో కలపండి.
- వడలు ఉడికాయో లేదో తెలుసుకోవడానికి టూత్‌పిక్ లేదా కత్తిని గుచ్చి చూడండి. అది శుభ్రంగా వస్తే ఉడికినట్లు.
ఎగ్ లేదు, ఓవెన్ అవసరమే లేదు - ఇంట్లోనే బేకరీ స్టైల్ ప్లఫీ ప్లఫీ బ్రెడ్ - చాలా ఈజీగా!
'మైసూర్ బోండా' తయారీలో ఫెయిల్ అయ్యేది అక్కడే - ఈ పద్ధతిలో చేస్తే పిండి ఉడకడంతో పాటు రుచి!
