సూపర్ టేస్టీ "మొక్కజొన్న ఇడ్లీలు" - అప్పటికప్పుడు తక్కువ పదార్థాలతో రెడీ!

Mokkajonna Idli Recipe in Telugu : మార్నింగ్ బ్రేక్​ఫాస్ట్​లో ఆరోగ్యానికి మంచిదని, తేలికగా అవుతుందని అమ్మలంతా వారంలో మూడు నాలుగు రోజులు ఇడ్లీలను ప్రిపేర్ చేస్తుంటారు. అయితే, తెల్లని ఆ ఇడ్లీల్ని చూసి పిల్లలు మాత్రం మొహం మాడ్చుకుంటారు. అందుకే వాళ్లు ఇష్టంగా తినేలా చేసి పెట్టే ఒక అద్భుతమైన ఇన్​స్టంట్ ఇడ్లీ రెసిపీ ఉంది. అదే, సూపర్ టేస్టీ "మొక్కజొన్న ఇడ్లీలు". వీటిని అప్పటికప్పుడు చాలా సింపుల్​గా తయారు చేసుకోవచ్చు. రెగ్యులర్​ చేసుకునే వాటితో పోల్చితే ఇవి సాఫ్ట్​గా, మంచి రుచికరంగానూ ఉంటాయి. పిల్లలతో పాటు ఇడ్లీ అంటే నచ్చనివాళ్లూ ఇష్టంగా తింటారు. పైగా ప్రస్తుతం మొక్కజొన్నలు విరివిగా లభిస్తున్నాయి. అందుకే, మీరూ ఎప్పుడు చేసుకునే రొటీన్ ఇడ్లీలు కాకుండా ఓసారి ఈ వెరైటీ రెసిపీని ట్రై చేయండి.

మొక్కజొన్న పిండి (Getty Images)

కావాల్సిన పదార్థాలు :

• పావుకిలో - మొక్కజొన్నపిండి
• పావు లీటర్ - పెరుగు
• రెండు టీస్పూన్లు - నూనె
• రెండు టేబుల్​స్పూన్లు - కొత్తిమీర తురుము
• రెండు రెబ్బలు - కరివేపాకు
• ఒక టీస్పూన్ - మినపప్పు
• ఒక టీస్పూన్ - శనగపప్పు
• అరటీస్పూన్ - ఆవాలు
• రెండు - పచ్చిమిర్చి
• ఒకటీస్పూన్ - అల్లం తురుము
• ముప్పావు టీస్పూన్ - బేకింగ్​సోడా
• ఒక టీస్పూన్ - ఉప్పు

మిగిలిపోయిన ఇడ్లీలతో కమ్మని "స్నాక్" - పిల్లలైతే యమ్మీ యమ్మీ అంటూ తింటారు!

కరివేపాకు (Getty Images)

చిట్కాలు :

• ఒకవేళ మీ దగ్గర మొక్కజొన్న పిండి లేకపోతే మొక్కజొన్న పొత్తుల నుంచి గింజలను వేరు చేసుకుని శుభ్రంగా కడగాలి. ఆపై వాటిని వాటర్ లేకుండా వడకట్టి పొడి క్లాత్​తో తుడిచి రెండు మూడు రోజుల పాటు బాగా ఎండబెట్టాలి.
• అవి పూర్తిగా ఎండిన తర్వాత మెత్తగా గ్రైండ్ చేసుకుని ఏదైనా డబ్బాలోకి జల్లించి తీసుకుంటే మొక్కజొన్న పిండి రెడీ అవుతుంది.
• మొక్కజొన్న పిండిని ఇంట్లో చేసుకునే టైమ్ లేకపోతే బయట అన్ని సూపర్ మార్కెట్స్​లో అందుబాటులో ఉంటుంది.
• అలాగే, మీరు ఎక్కువ లేదా తక్కువ మొత్తంలో ఇడ్లీలు చేసుకోవాలనుకుంటే ఇంగ్రీడియంట్స్​ని అందుకు అనుగుణంగా అడ్జస్ట్ చేసుకుని తీసుకుంటే సరిపోతుంది.

పెరుగు (Getty Images)

తయారీ విధానం :

• మొక్కజొన్న ఇడ్లీ తయారీ కోసం ముందుగా పచ్చిమిర్చి, కొత్తిమీర, అల్లంను వీలైనంత సన్నగా తరుక్కొని రెడీగా ఉంచుకోవాలి. అలాగే, పెరుగుని కొన్ని వాటర్ పోసి కాస్త పలుచగా గిలకొట్టుకుని పక్కనుంచాలి.
• ఇప్పుడు స్టవ్ మీద పాన్​లో నూనె వేసి వేడి చేసుకోవాలి. ఆయిల్ కాగిన తర్వాత శనగపప్పు, మినపప్పు, ఆవాలు, కరివేపాకు వేసి వేయించుకోవాలి.
• అవి వేగాక సన్నని అల్లం తురుము, పచ్చిమిర్చి తరుగు వేసి పచ్చివాసన పోయేంత వరకు ఫ్రై చేయాలి.

పోపు దినుసులు (Getty Images)

• అనంతరం అందులో మొక్కజొన్నపిండి యాడ్ చేసి రెండు నిమిషాల పాటు లో టూ మీడియం ఫ్లేమ్​లో కలుపుతూ మాడిపోకుండా చక్కగా వేయించి స్టవ్ ఆఫ్ చేసుకోవాలి.
• ఇప్పుడు ఒక వెడల్పాటి మిక్సింగ్ బౌల్ తీసుకుని అందులో వేయించి చల్లార్చుకున్న మొక్కజొన్నపిండి, గిలకొట్టిన పెరుగు, సన్నని కొత్తిమీర తరుగు, ఉప్పు వేసి మిశ్రమం మొత్తం బాగా కలిసేలా కలుపుకోవాలి.
• తర్వాత ఆ మిశ్రమంలో తగినన్ని నీళ్లు పోసి ఇడ్లీ పిండిలా ప్రిపేర్ చేసుకుని పది నిమిషాల పాటు పక్కన ఉంచాలి.

కొత్తిమీర (Getty Images)

• పది నిమిషాల తర్వాత పిండి మిశ్రమంలో బేకింగ్​సోడా వేసి మరోసారి బాగా కలుపుకోవాలి.
• అనంతరం ఇడ్లీ పాత్రలో కొద్దిగా వాటర్ తీసుకుని స్టవ్ మీద ఉంచి బాయిల్ చేసుకోవాలి.
• ఆ వాటర్ వేడయ్యేలోపు ఇడ్లీ ప్లేట్స్​కి కాస్త నెయ్యి రాసుకొని ముందుగా ప్రిపేర్ చేసుకున్న పిండిని వేసుకోవాలి.
• తర్వాత వాటిని ఇడ్లీ కుక్కర్​లో పెట్టి సుమారు పావుగంట పాటు ఆవిరి మీద ఉడికించుకోవాలి.
• ఇడ్లీలు మంచిగా ఉడికిన తర్వాత బయటకు తీసుకుని కొత్తిమీర లేదా కొబ్బరి చట్నీతో వేడి వేడిగా సర్వ్ చేసుకున్నారంటే చాలు. అంతే, సూపర్ టేస్టీగా ఉండే "మొక్కజొన్న ఇడ్లీలు" రెడీ!
• చట్నీతో కాకుండా నేరుగా తిన్నా ఈ ఇడ్లీలు మంచి రుచికరంగా ఉంటాయి!

పల్లీలతో చట్నీలే కాదు - ఇలా కరకరలాడే "వడలు" చేసుకోండి! - టేస్ట్ సూపర్!

మరమరాలతో "గుంత పొంగనాలు" - అప్పటికప్పుడు చేసుకోవచ్చు - ఇడ్లీ, దోశ పిండితో పనిలేదు!