కమ్మని "మిరియాల తమలపాకు రసం" - వేడివేడిగా తింటే అద్దిరిపోతుంది, ప్రిపరేషన్​ ఈజీ!

Miriyala Tamalapaku Rasam: వాతావరణం చల్లగా ఉన్నప్పుడు వేడివేడి అన్నంలోకి ఏదైనా రసం పోసుకుని తింటే కమ్మగా ఉంటుంది. అందుకే చాలా మంది టమాటాలతో చారు ప్రిపేర్​ చేస్తుంటారు. అయితే ఎప్పుడూ టమాటాలతో కాకుండా ఓసారి ఇలా మిరియాలు, తమలపాకుతో రసం చేసుకోండి. ఘుమఘుమలాడే వాసన, ఘాటైన రుచితో సూపర్​ టేస్టీగా ఉంటుంది. ప్రిపరేషన్​ కూడా చాలా ఈజీ. ఇక ఈ రసంలోకి సైడ్​ డిష్​గా వడియాలు, అప్పడాలు వంటివి ఉంటే ఆ ఫీలింగ్​ గురించి చెప్పక్కర్లేదు. మరి లేట్​ చేయకుండా కమ్మని, ఘాటైన మిరియాల తమలపాకు రసం ఎలా చేసుకోవాలో చూసేయండి.

కావాల్సిన పదార్థాలు:

• చింతపండు - నిమ్మకాయ సైజ్​
• ఉప్పు - సరిపడా
• పసుపు - పావు టీస్పూన్​
• బెల్లం పొడి - 1 టీస్పూన్​

తమలపాకులు (Getty Images)

మసాలా పొడి కోసం:

• శొంఠి - కొద్దిగా
• కందిపప్పు - 1 టీస్పూన్​
• మిరియాలు - అర టీస్పూన్​
• ధనియాలు - 1 టీస్పూన్​
• జీలకర్ర - అర టీస్పూన్​
• ఎండుమిర్చి - 5
• పిప్పళ్లు - 3

మసాలా దినుసులు (ETV Bharat)

పేస్ట్​ కోసం:

• కరివేపాకు - గుప్పెడు
• కొత్తిమీర కాడలు - 1 కట్ట
• తమలపాకులు - 7

తాలింపు కోసం:

• నెయ్యి - 3 టీస్పూన్లు
• ఆవాలు - అర టీస్పూన్​
• ఎండుమిర్చి - 2
• కరివేపాకు - 2 రెమ్మలు
• ఇంగువ - చిటికెడు

మసాలా పొడి (ETV Abhiruchi)

తయారీ విధానం:

• ముందుగా చింతపండును ఓ గిన్నెలోకి తీసుకుని శుభ్రంగా కడిగి ఓ కప్పు వాటర్​ పోసి నానబెట్టాలి. ఈలోపు కొత్తిమీర ఆకులను సన్నగా కట్​ చేసుకుని కాడలు పక్కన పెట్టాలి. చారు కోసం కొత్తిమీర కాడలు వాడాలి. అలాగే తమలపాకులను సన్నగా కట్​ చేసుకోవాలి.
• చింతపండు నానిన తర్వాత గుజ్జును సెపరేట్​ చేసి రెడీగా పెట్టుకోవాలి.
• అడుగు మందంగా ఉన్న గిన్నెలో చింతపండు గుజ్జు, రుచికి సరిపడా ఉప్పు, పసుపు, బెల్లం పొడి వేసి కలుపుకోవాలి.

చింతపండు గుజ్జు (ETV Abhiruchi)

• ఆ తర్వాత ఈ గిన్నెను స్టవ్​ మీద పెట్టి లో ఫ్లేమ్​లో మరిగించుకోవాలి. ఈలోపు మరో స్టవ్​ ఆన్​ చేసి శొంఠి, కందిపప్పు, మిరియాలు వేసి లో ఫ్లేమ్​లో వేయించుకోవాలి.
• ఇవి కాస్త వేగిన తర్వాత ధనియాలు, జీలకర్ర, ఎండుమిర్చి వేసి మరోసారి ఫ్రై చేయాలి. చివరగా పిప్పళ్లు వేసి ఓ నిమిషం వేయించి ఓ ప్లేట్​లోకి తీసి చల్లారనివ్వాలి.

మసాలా పేస్ట్​ (ETV Abhiruchi)

• అదే పాన్​లోకి కరివేపాకు, కొత్తిమీర కాడలు, తమలపాకు ఆకులు వేసి లో ఫ్లేమ్​లోనే కొద్దిసేపు వేయించుకోవాలి.
• ఈ ఆకులు కూడా వేగిన తర్వాత స్టవ్​ ఆఫ్​ చేసి పూర్తిగా చల్లారనివ్వాలి. ముందుగా మిక్సీజార్​లోకి శొంఠి ధనియాల మిశ్రమం వేసి మెత్తని పొడిలా గ్రైండ్​ చేసి గిన్నెలోకి తీసుకోవాలి.
• అదే మిక్సీజార్​లోకి కరివేపాకు తమలపాకుల మిశ్రమం వేసి కొన్ని నీళ్లు పోసి మెత్తని పేస్ట్​లా గ్రైండ్​ చేసుకోవాలి.
• మరుగుతున్న చింతపండు రసంలోకి గ్రైండ్​ చేసి పొడి, పేస్ట్​, మరికొన్ని నీళ్లు పోసి ఓ 5 నిమిషాలు మరిగించుకోవాలి.

మిరియాల తమలపాకు రసం (ETV Abhiruchi)

• ఈలోపు మరో స్టవ్​ మీద చిన్న పాన్​ పెట్టి నెయ్యి వేసుకోవాలి. నెయ్యి బాగా కాగిన తర్వాత స్టవ్​ ఆఫ్​ చేసి ఆవాలు, ఎండుమిర్చి, కరివేపాకు, ఇంగువ వేసి వేయించి చారులో కలిపి స్టవ్​ బంద్​ చేయాలి.
• చివరగా చారులో సన్నగా తరిగిన కొత్తిమీర వేసి కలిపి వేడేవేడిగా ఉన్నప్పుడే అన్నంలో పోసుకుని తింటే ఎంతో కమ్మగా ఉండే మిరియాల తమలపాకు రసం రెడీ. నచ్చితే మీరూ ట్రై చేయండి.

మిరియాల తమలపాకు రసం (ETV Abhiruchi)

చిట్కాలు:

• తమలపాకులు ఎలాగూ ఘాటు ఉంటాయి కాబట్టి మిరియాలను కాస్త చూసి వేసుకోవాలి. ఎందుకంటే మరీ ఘాటు ఎక్కువైతే రసం తినలేరు.
• అలాగే చింతపండు పులుపుకు తగినట్లుగా వాటర్ పోసుకోవాలి. అదే విధంగా రసం పొడికి కావాల్సిన మసాలా దినుసులను కేవలం లో ఫ్లేమ్​లో వేయిస్తేనే అవి మంచిగా వేగి రసం రుచికరంగా ఉంటుంది.

బేకరీ స్టైల్​ "వెజ్​ శాండ్​విచ్​" - నిమిషాల్లో రెడీ - పిల్లలకు స్నాక్స్​గా పర్ఫెక్ట్​!

కరకరలాడే "మొక్కజొన్న పకోడీలు" - సూపర్​ టేస్టీగా ఉంటాయి - పది నిమిషాల్లో తయార్​!