పల్లీలు, టమాటాలు లేకుండా కమ్మని "కొత్తిమీర పచ్చడి" - అన్నం, టిఫెన్స్లోకి అదుర్స్ - రెండు నెలలపైనే నిల్వ!
-కొత్తిమీరతో ఈ తీరులో ఓసారి పచ్చడి ప్రిపేర్ చేసుకోండి -నచ్చనివారు కూడా ఫ్యాన్ అయిపోతారు!
Published : May 8, 2025 at 9:55 AM IST
Kothimeera Pachadi at Home: కొత్తిమీర ఒక మంచి పోషకాహారం. అయితే సాధారణంగా దీనిని రుచికోసమో, సువాసన కోసమో కూరలు, సాంబారు, రసాలు వంటి వాటిలో వేస్తుంటాం. ఇక నాన్వెజ్ రెసిపీలు, బిర్యానీ వంటివి చేసుకున్నప్పుడు మాత్రం ఇది తప్పనిసరి. అంతే కాకుండా చాలా మంది కొత్తిమీరతో పచ్చడి కూడా చేస్తుంటారు. కానీ ఈ పచ్చడిలో టమాటాలు వేస్తుంటారు. కానీ ఇవి లేకుండానూ పచ్చడిని ప్రిపేర్ చేసుకోవచ్చు. దీని టేస్ట్ చాలా బాగుంటుంది. వేడివేడి అన్నంలో కొద్దిగా పచ్చడి, నెయ్యి వేసుకుని తింటే అమృతమే. కేవలం అన్నంలోకి మాత్రమే కాకుండా టిఫెన్స్లోకి పర్ఫెక్ట్. పైగా రెండు నెలల పైనే నిల్వ ఉంటుంది. మరి లేట్ చేయకుండా ఈ సూపర్ టేస్టీ అండ్ హెల్దీ కొత్తిమీర పచ్చడిని ఎలా చేసుకోవాలో ఇప్పుడు చూద్దాం.
కావాల్సిన పదార్థాలు:
- కొత్తిమీర కట్ట - 1 పెద్దది
- నూనె - సరిపడా
- ధనియాలు - 2 టీస్పూన్లు
- ఎండుమిర్చి - 25
- ఉప్పు - రుచికి సరిపడా
- చింతపండు - ఉసిరికాయంత
- జీలకర్ర - 1 టీస్పూన్
- వెల్లుల్లి రెబ్బలు - 4
- బెల్లం - 1టీస్పూన్
తాలింపు కోసం:
- నూనె - 3 టేబుల్స్పూన్లు
- పచ్చి శనగపప్పు - 1 టీస్పూన్
- మినప్పప్పు - 1 టీస్పూన్
- జీలకర్ర - అర టీస్పూన్
- ఆవాలు - అర టీస్పూన్
- దంచిన వెల్లుల్లి రెబ్బలు - 8
- ఎండుమిర్చి - 2
- కరివేపాకు - 2 రెమ్మలు
తయారీ విధానం:
- ముందుగా కొత్తిమీరను శుభ్రంగా కడిగి సన్నగా తరిగి పక్కన పెట్టుకోవాలి.
- స్టవ్ ఆన్ చేసి 2టీస్పూన్ల నూనె వేసి ధనియాలు, ఎండుమిర్చి వేసి లో ఫ్లేమ్లో మంచి వాసన వచ్చేవరకు వేయించాలి.
- ఎండుమిరపకాయలు వేగిన తర్వాత ఓ ప్లేట్లోకి తీసుకుని పూర్తిగా చల్లారనివ్వాలి.
- ఇప్పుడు అదే పాన్లోకి మరికొంచెం నూనె వేసి కట్ చేసిన కొత్తిమీర వేసి మీడియం ఫ్లేమ్లో ఫ్రై చేసుకోవాలి.
- కొత్తిమీర పచ్చివాసన పోయిన మంచిగా వేగిన తర్వాత స్టవ్ ఆఫ్ చేసి పూర్తిగా చల్లార్చుకోవాలి.
- మిక్సీజార్లోకి వేయించిన ధనియాలు, ఎండుమిర్చి వేసుకోవాలి. ఇప్పుడు అందులోకి చింతపండు, జీలకర్ర, ఉప్పు, వెల్లుల్లి రెబ్బలు వేసి మెత్తగా గ్రైండ్ చేసుకోవాలి.
- ఇందులోకి ఉడికించిన కొత్తిమీర మిశ్రమం, బెల్లం వేసి కచ్చాపచ్చాగా గ్రైండ్ చేసుకుని పక్కన ఉంచాలి. అవసరమైతే లైట్గా నీళ్లు కలుపుకోవచ్చు.
- స్టవ్ ఆన్ చేసి కడాయి పెట్టి నూనె పోసి వేడి చేసుకోవాలి. ఆయిల్ కాగిన తర్వాత శనగపప్పు, మినప్పప్పు, ఆవాలు, జీలకర్ర వేసి ఫ్రై చేసుకోవాలి.
- తాలింపు గింజలు మగ్గిన తర్వాత ఎండుమిర్చి తుంపలు, దంచిన వెల్లుల్లి రెబ్బలు వేసి మరికొద్దిసేపు వేయించాలి.
- చివరగా కరివేపాకు వేసి చిటపటలాడించిన తర్వాత స్టవ్ ఆఫ్ చేయాలి. ఈ తాలింపులోకి గ్రైండ్ చేసిన కొత్తిమీర మిశ్రమం వేసి బాగా కలుపుకుంటే ఎంతో రుచికరంగా ఉండే కొత్తిమీర పచ్చడి రెడీ.
- ఈ పచ్చడి గాజు జాడీలో స్టోర్ చేసుకుంటే దాదాపు రెండు నెలల వరకు నిల్వ ఉంటుంది. అన్నం, టిఫెన్స్ ఇలా ఎందులోకైనా అద్దిరిపోతుంది. నచ్చితే మీరూ ట్రై చేయండి.
చిట్కాలు:
- ఈ పచ్చడి కోసం లేత కాడలు కలిగిన కొత్తిమీరను ఉపయోగించాలి. ముదిరింది వాడితే తొందరగా ఉడకదు. పైగా రుచి కూడా అంత బాగుండదు.
- ఇక్కడ ఎండుమిర్చిని మీరు తినే కారానికి అనుగుణంగా వేసుకోవాలి. అలాగే వీటిని కేవలం లో ఫ్లేమ్లో మాత్రమే వేయించాలి. మిర్చి సరిగ్గా వేగకపోతే పచ్చడి తొందరగా పాడవుతుంది.
- కొత్తిమీరను వేయించుకునేటప్పుడు మరీ నీరు లేకుండా డ్రైగా మగ్గించుకోవద్దు. ఎందుకంటే పచ్చడి గుజ్జు గుజ్జుగా రావాలంటే కాస్త మగ్గితే సరిపోతుంది.
- కావాలనుకుంటే పసుపు, ఇంగువను తాలింపు టైమ్లో వేసుకుని ఫ్రై చేసుకోవచ్చు.
రాగి పిండితో అద్భుతమైన "కిచిడీ" - అమోఘమైన రుచి - ఎముకలకు ఫుల్లు బలం!
